ألحقوني ياناس ! البلدية والشرطة ترا قصرنا !

السلام عليكم ورحمة الله وبركاته
كيف الحال جميعاً
اليوم وأنا طالع للحوش تتوقعون وش شفت !؟ صراحة شيء يضيق الصدر ! مدري وين البلدية عنه !
الحمدالله أني لقطت لكم الصوره عشان تشوفون " الحقيقة " معي ..

نملة تمشي كذا !؟ وين البلدية عنها أرا ماتجي تذبحها .. مايدرون أني ماأحب النمل ..

وهذي هي وهي تسحب حبة قمح .. وشوفها مخليه الباقي وماشالته !
بلغ السيل الزبى يالبلدية .. ورا ماتشيلونه !؟
عاد كله كوم وهالنملة كوم ثاني

وين الشرطه !؟ هااه وينها ؟ ورا ماتجي وتذبحها !؟ مابقي الا هي تسرق بسكوتي ..
........
هذا وضعكم بهالقسم ! ..
اللي مدري وش أقول غير " إذا كثرت خطاها أعرف أنها رباضة "
و "كج الماء تخرج منه زبدة " !

ههههههههههههههههههههههههههههههههه
والله انك صادق وانا اخوك من سجلت بالمنتدى وهذي مواضعهم ولا يزعلون مني كلها يشتكون من البلديه والشرطه

.
.
.


لاشييء
" الضيف بحكم المعزّب"..

من غير ما تتمهزا ... فينا حفاظاً على مشاعرنا
الكلام واضح وصريح ومشاكل الناس مع البلدية
والشرطة فالحقيقة أكبر من أن تغطيها أنت ...

شوف لك غير هالقسم واقرأ فيه ... سلام

هي وحده من الثنتين ..
يا إنك من خارج الديره ... والا من طرفهم .. والأخيره هي الأرجح ..!!!

بسم الله الرحمن الرحيم !
يعني مافي أمل تفهمون ! ماأحد علق عالبلدية وقال أنهم صح ومحد قال أنكم غلط ! كل اللي قصدتة ان كثرة المواضيع ذي مالها سنع ! مالية القسم وبس
أتمنى " توسعون مدارككم العقلية " .. وبعدها تعقبون عالموضوع .. لاوبعد اتهمتوني أني من خارج الديرة .. يعني مايجي احد من هالديرة يتكلم كذا !؟ كذا تشككوني بنفسي وباأنتمائي ترا .. ولا اللي جاي يقولي من طرفهم خخخ حسيت أني يهودي داخل منتدى عربي
شكل عندكم شحنات سالبة و جالسين تفرغونها غلط..
يالله بس تصبحون ع خير وعلى مواضيع بلدية وشرطة
\
/
أنا عبدالعزيز
تعجبني يافاهمني أنت

شد حيلك وعطنا اللي عندك يالاشئ والا ماعندك شئ.. !!!
يمكن مداركنا العقليه ضيقه زي ماقلت .. نبغى شئ يوسعها ..!!

موضوع ماله طعم ولا رائحه

والي يتكلمون ويكتبون من حقهم ومو من حقك تمنعهم وتستهزي بهم

شيء افضل من لاشيء

بلا سماجة


................
/////////

هذاالقسم ماوضع ألالمثل هالأمورومناقشتهاواذهب لأغلب منتديات المدن والمحافظات والقرى تجدها تتكلم هكذا أوأشد وأتمنى تتقبل كلامي بصدررحب لكن يبدو أنك أردت تستخف دمك في المكان غيرالمناسب0

وأخيراً تجرأ عضو وأخبرنا عن حقيقتنا
اتوقع أن العضو (( لاشيء )) لم يخطأ في موضوعه
بس يمكن اسلوبه الساخر هو اللي زعلنا علشانا ماتعودنا هالاساليب الحلوه
انا رأيي مافيه مشكله نتكلم عن أخطاء البلدية ولا الشرطة ولا أي دائرة حكومية
بس المشكلة أن حنا نحمل الدائرة كامل الخطأ
نعطيكم أمثلة لبعض المواضيع التي طرحت وهي في غير محلها ( لنهتم بالموضوع ونبعد عن كاتبه وشخصه ) :
1- في أحد المواضيع تم التعليق على شعار المرور (( لاتتصل حتى تصل )) وقيل أن هذا الشعار لاينطبق على مرورنا بحيث أنهم مايوصلون اذا اتصل عليهم ,, أنا معكم أن معظم افراد الشرطة عندنا خيخه (( اي كلام )) بس من قال ان الشعار علشان اتصالكم او تبون تصورون وبس ( مع اسفي لكل عضو )
2- في احد المواضيع تم وضع هذه الصورة

وعلق عيها بعبارة ( منحدر خطر لماذا يوضع تقاطع فيه )
في اعتقادي انه كان من المفروض ان نشكر القائمين على المشروع على هذه الاضافه الجميلة والتي سوف تخدمنا كثيرا وسوف ترجع السوق لهذه الجهة بعد توقف النشاط فيها وبالنسبة لخطورة المنحدر فوجود الاشارة انهت المسألة الا اذا كنتم ترون ان الخطر يجب ان لا يتواجد حتى عندما تعرضون انتم انفسكم له .

3- وفي احد المواضيع تم ادراج هذه الصورة

وتم التعليق عليها بأن هذه الصورة متكررة في معظم احياء تمير
هل تريدون من القائم على هذا المشروع انيحط البلك في بيتهم ولايطلع الا على حبه حبه علشان ماتشوفون مثل هالشيء ,,
او يمكن قصد العضو ليش يشخمط على الجدار اللي جنب البلك ,, ونادرا مانقرا موضوع يتكلم عن اخطاء ابناءنا .

4- في احد المواضيع تم حميل البلديه فيه سعة الارصفه وضيق الشوارع وصب جام الغضب عليها على رغم التنويه في احد المواضيع من مشرف القسم بان المشروع معتمد من قبل وزارة المواصلات وان هذه المواصفات هي المواصفات الجديدة في معظم المدن ولا اتوقع ان الرصفات اللي في الرياض ماشافها الامير سلمان او بلاه موب عل قولة واحد من الاعضاء من طرفهم ما ادري طرفكم .

لا أحب ان اتصيد للاخطاء ولكن كما طرح سابقاً لا نكون مثل المدن الاخرى ( على قولة جلنار الوشم ) بان كتابتها ماهي الا تصيد للاخطاء وتصفية حسابات ورواسب قبلية سخيفة تزيد من الفكرة السيئة المأخوذه عن بلدتنا .

ختاماً شكراً عضونا الممتع ( لاشيء ) لطرحك مثل هذا الموضوع الذي قد يغير من مواضيعنا القادمة والتي كانت في السابق ( صور ونزل ) .

والى اللقاء في حقيقه أخرى