يانسيم الشوق وقف (طلبتك) لو ثواني

يامداهيل الغلا والجـود وأسـرار المعانـي
أرتوى نهر العذوبه .. فاح ريـح الشاذليـه

ماكتبتك من فراغ ولا قريتـك مـن لسانـي
سافري بي سافري بي ياللحـون السامريـه

بارك الله في وفاه وبـارك الله فـي زمانـي
الزمان اللي منحني من عطـاه أغـلا هديـه

في عيونه زود شوق وثورة أحلام وأمانـي
وفي خفوقه حس مرهف بعثر الاحساس فيّه

جيت لاهب النسيم العذب لو ماحـدً دعانـي
أسبق الخطوه وشوقـي مستهيـم الراعبيـه

صوتها قبل أنتبه (ياهيـه) بالغفلـه خذانـي
والتفت مجنون ليلى ؟ وين ليلـى العامريـه

ساقني مع نبرة الصوت وترانيـم الاغانـي
واحتويته كلمتين .. ونبضتين .. وصدق نيه

ساقني عطر الشمال وصوت شيخً مرحبانـي
أعشق التاريخ من شأنه عسى أيامه مديـه

له مع الموعد حضور وله مع الهاجس مكاني
كل ماشب الغرام وضاقـت الدنيـا الفضيـه

أرتويته مثل ماهـو فـي معانيـه أحترانـي
أكتبـه صـوتً يمثـل ذات والنيـه مطيـه

أن قريتـه ماكتبتـه وان كتبنـي ماقرانـي
كن نبض قلوبنـا خـارج نطـاق الجاذبيـه

أذكره في كل لحظـه مانسيتـه لـو نسانـي
له من أشواقي سلام وله من أعماقي تحيـه

دام علمني بوصله كيف ؟ وش معنى التفاني
والله أنه فـي عيونـي ساكـنً ذيـه وذيـه

الحبيب اللي عطاني نبض قلبـه واحتوانـي
ماسمع مني مـلام ولا حصـل منّـه خطيـه

يستحق أعطيه قلبي مثـل ماقلبـه عطانـي
يستحق أعطيه كلي زود من فـوق العطيـه

هو حياتي في حياتي .. هو بعد عمري حناني
هو شروق الشمس والظلمأ بدنياي الشقيـه

مالكٍ روحي وفكري مامعـه بالقلـب ثانـي
عايشً داخل عروقي ولكثر أشعـاري هويـه

الله اللي لي هداه .. والله اللي لـه هدانـي
أيه أنا بالحب أنانـي كثـر مابـه نرجسيـه

آه من ليلً سريته ؟ آه مـن ليـلً سرانـي
هام بي صوب النجوم وصرت لنجومه ضحيه

يوم أفكر في زماني ؟ وش خذيته من زماني
آه ياكثر العذاب اللـي عطـاه الوقـت لّيـه

الهوى يالعنبو حـي الهـوى همـه طوانـي
لين شفت الموت ياردبي على حوض المنيـه

يقطع الحظ التعيس اللي على مثلـه رمانـي
يـوم سلمتـه مفاتيـح الغـرام السرمديـه

ماشربت الصبر لو ماالشوق من كأسه سقاني
شربةٍ تقطع ضماي وتفرض الموعـد علّيـه

يانسيم الشوق (وقف) طالبك لوهـي ثوانـي
أنشد الرحال عن صمته وعشقـه والقضيـه

وكل شكري للحبيب وكـل حبـي وأمتنانـي
والقصيد أحساس صادق بالحروف الابجديـه

أذكره في كل لحظـه مانسيتـه لـو نسانـي
له من أشواقي سلام وله من أعماقي تحيـه

تسلم ويسلم لسان الشاعر
لاعدمناك

اخي العزيز اشكر لك هذه القصيدة ولكن لي طلب بسيط
ارجو أن تبين اذا كانت من شعرك أو منقولة
ولك مني كل تحية