إذا المراجل لبسـت شمـاغ وعقـال ..... قـل للعـذارى يلبـسـنّ العمـايـم

مرتادي المنتدى يسرني أن أقدم لكم هذه القصيده ...
والتي أعجبتني كلماتها وأحببت أن أنقلها لكم ...
هذه القصيده كتبتها الشاعره ... نوف بنت شطيط العتيبي ...
أتمنى أن تنال القصيده على رضاكم ...
فإلى القصيده ...

إذا المراجل لبسـت شمـاغ وعقـال = قـل للعـذارى يلبـسـنّ العمـايـم
ما عاد يفـرق زول حرمـه ورجـال = دام الفعايـل تشبـه البعـض دايـم
المرجله مـا هيـب كلمـه وتنقـال = وتروح ما راحـت هبـوب النسايـم
والا خشونة صوت أو رفـع الأثقـال = أو رزة صـدور وفـعـل الـزلايـم
ولا هي بعد مفتـاح موتـر وجـوال = وإلا ردى لسانـن حديثـه شتـايـم
المرجله شيمه عـن القيـل والقـال = رفيع نفس (ن ) حر بالجـو حايـم
المرجلـه عقـلٍ وزن وزنـه جبـال = ودون العقـل وش فرقنـا والبهايـم
يا مسندي لو مايل الوقت بـي مـال = يا ولد أبويـه يـا عظيـم العزايـم
يا معرب الجدين من العـم والخـال = يا نخـوة المفـزوع وقـت الهزايـم
المرجله يا خوي هي طولـة البـال = هي العـزم هـي الصبـر فالظلايـم
فيهـا الكـرم عـزه دلـه وفنجـال = فيها الكرامه عن ردى الطبـع شايـم
والدين لامنـه خـذا القلـب منـزال = مشى طريق الحـق وابليـس نايـم
ومن لا عرف ربه في طيـب الحـال = لابـد وقـت الضيـق بالهـم هايـم
حتى صلاتك مع جماعـات ورجـال = في خيرها يـا خـوي نعـم الغنايـم
ولامن نصف ليلك قم صفـي البـال = يا عظم أجرك بيـن ساجـد وقايـم
ولا من رفع ربي لـه كـل الأعمـال = حسن الذكر لا قالـو فـلان صايـم
وخلك شريف القصد يا طيـب الفـال = سـوء المقاصـد فالبيـوت الهدايـم
واحذر تبيع النفس فـي دب الأنـذال = وتتبع خـوي إبليـس راع النمايـم
النفس خيـل لـك إذا كنـت خيّـال = ومن لا قوى نفسـه قوتـه الهزايـم
ولا صرت ما تدري لو يش أنت رجال = والله خسـارة فيـك ذبـح التمايـم

تسلم ياقلب الاسد قصيدة رئعة وصح لسانك ولسان الشاعرة

صح لسانك يا قلب الاسد وقصيده رائعة وكني شفتها في الساحة من قبل

بس يكفي التنسيق المميز منك يا صاحبي

جزاك الله خيرا على هذا النقل والعمل المميز
بحق وكلمة صدق قصيدة جميلة وافية بمعانيها انه عمل جبار
جزاك الله خيرا على هذا العمل الجبار والمتميز جعله الله في ميزان أعمالك ونفع الله بك وبعلمك ووفقك الله لما يحب ويرضى ولما فيه الخير والصلاح

و

يا قــــــــلــب الأســــــــــــــد

مــــــــــــــــــــرعب الـنــفـــــــــــــــــوس

	الشمالي

مشكور على مرورك وهو بحد ذاته فخر لي تواجدك في متصفحي ...
والله يعطيك الف عافيه ..!!