الليله .. الليله

الليله الليله الطاروق يبغاله =نار ٍ توهج وهاجوس ٍ يصاليها
تزاحم الشعر والشاعر على باله = علوم يجهربها وعلوم يخفيها
وطعون غبرالسنين وهرج عذاله = ياكبرهافي عيون اللي يحاتيها
الى تريـّح فضيخ القلب والداله =عينه من النوم تلقى مايقزيها
حـــــر ٍ وقع في وسط محباله = يبغى العشا واقضبته الناس بيديها
عزيز نفس ٍ ونزل في غيرمنزاله = لوان دعواه فيها بعض مافيها
يبغى الفرج من بني عمه ولاجاله = يزهم وربعه ملقيته علابيها
والطيب والموقف الغصّـاب ورجاله = والله لاعدها الليله باساميها
المدح ماكل من يبغاه يحتاله =يبغى قلوب ٍ مثبت ٍ كراسيها
يبغى مثل راشد ابوشهاب واشكاله = اللي الى قال كلمه مارجع فيها
شيخ ٍ الى كبرت القاله رجعناله =وتصغر كبار الامور الى سعى فيها
كلمة نعم عندكل الناس تثناله = ومقدرا ً عندقاصيها ودانيها
حفيد شيخ ٍ يقول ويحتمي القاله =عقيد قوم ٍ معربة ٍ عزاويها
شيخ ٍ يفك السجين وطـيّبٍ فاله = والى درع في جموع القوم يفنيها
كم راس شيخ بحدالسيف يشتاله = من سرجها لين تاطاه بمواطيها
من هيبته مات محد شِــرب فنجاله = عــز ٍ من الله للعليا وراعيها
عقيدنا وانت ياراشد مـِـن عياله = واحفاد الاجواد مايختل ماضيها
تكفى ياراشد سهوم الموت قتاله = واظن ماللجروح الا مداويها
يامسندي ذاخرك لليوم وامثاله = لاتخلف الهقوه اللي فيك هاقيها
والله ماعذرك ياراشد غير في حاله = اللي مايقدر على الوقفه يخليها
لكن ترى الذيب ماله عذر من خاله = اللي علومه علوم ومبتلش فيها
اللي ظروف الزمان تحطم آماله = وايامها كنها عنده لياليها
عيا زمانه يسانع له ويصفاله = والنفس ماكل ماتلقاه يرضيها
شافت حبربش زمان المال وانذاله = مراجل الناس صارت في مخابيها
يقـّـدَم العبد والصانع !! لجل ماله = وتهان الاجواد لان الفقر واطيها
وانا اتعجب لميل الوقت واهواله = والاترى النفس رب البيت مغنيها
والتبع ماشره عليه ولا اتعناله = والديره اللي تظم اللاش ماجيها
افخربربعي هل الردات والطاله = وانصا منازل كبار القوم واجيها
مثل ابوسالم ذرا المحتاج وظلاله = اللي ورانا قـِـدم رجله معنيها
الظاهر انه مخليني على باله = ودعواي عنده من اولها لتاليها
ماغير حر ٍ وقع له وسط محباله =وانصاد قبل يتعشا من ثناديها
وابغاك بالجاه تشفع له وترفاله = الحمله اللي يقال انه مسويها
واللي مايارد على هداج وحباله = ماشرب من بارد الجمه وصافيها
واللي ليا احتجت تقصر دوني افعاله =افعاله اللي على الفاقات مابغيها
مابغيه في الحشر يعطيني من اعماله = ابغا حقوق العواني عندعانيها
وا لــبسه من قِـدم ماطاه لعقاله = منظومة ٍ من بحور الشعر جانيها
قصيدة ٍ من سمان الشعر وجزاله =من سمعها قال صح لسان راعيها
تنظم على اسمه وتكتب له وتقراله = فريدة النوع زاهيته وزاهيها

الشمالي محمد

مشكووووووره اختي




عهود على النقل الرائع



صح لساااااان الشاااااعر..







ســــــلاااااااام,,,

الاخ جواد شكـــــرا جزيلا لمرورك الكريم

تنظم على اسمه وتكتب له وتقرالـه فريـدة النـوع زاهيتـه وزاهيهـا

مشكورة عهود على النقل الرائع وصح لسان قايلها ............لك تحياتي

والله هذي تبي لها صفووووووووف تلعب على لحنها

الله يسلمك يا عهوود على الاختياااااااااار

رووووووووووووووووعه



سلام

قصيدة خاصة جيدة فيها مدح وشهامة ورجولة يراها قائلها في من يمدح

شكرا جزيلا لمروركم الكريم

لكم تحيتي واحترامي