توبة العوني .. لمحمد العبدالله العوني

يالله يـا والـي علـى كـل والـي=يا خير من يدعـى لكشـف الجليلـه
يا مالك المخلوق محصـي الرمالـي=الكـون والدنيـا وما به فهـي لـه
ما كـان له أول ومـا كـان تالـي=ملكه يدبـر به علـى ما يبـي لـه
يقضـي ويمضـي قـادرٍ ما يبالـي=يفعـل علـى ما راد محـدٍ كفيلـه
يرفع وياضـع ما يشـأ ما يسالـي=ولحـدٍ فعل من دون أمـره فعيلـه
أشهـد فـلا غيـره إلـه ولا لـي=ربٍ سـواه لايـذ نلـتـجـي لـه
ماله شريـكٍ جـل فـوق متعالـي=وعلمـه أحـاط بـدقـها والجليلـه
يا واحـدٍ فـوق السمـوات عالـي=من سطوتـه كـل الخـلايق ذليلـه
يا فـارج الشّـدة بضيـق المجالـي=افـرج لعبـدك يـا منجـي خليلـه
وانظر بعينك يا أبا الافـراج حالـي=فـردٍ غريـبٍ والمصاغـي قليلـه
يا راحـم ارحـم شيبتي وانخذالـي=ويا جابر اجبـر عثرتـي والفشيلـه
والطف وناظر يا الوالي في سوالـي=تقطعـت مالـي سـوى الله دليلـه
وحيـد مالي غيـر ظـلك اظلالـي=ذليـل مالـي غيـر عـزك وسيلـه
لا اخوان لا عمان لا مـن خوالـي=ولا من صديقٍ للأمور اشتكـي لـه
لو كان ما يجلـي سـوى الله جالـي=ما شفت عبـدٍ هرجتـه لي جميلـه
تقطعـت وذم العـرى والمـدالـي=مـن جملـة الخـلان والمستخيلـه
قضت من المخلـوق محـدٍ بقالـي=إلا أنـت ياللـي ما يخلـي عميلـه
عادوني كل الخلق شـرق وشمالـي=ولا بقى غيـرك ذرى نلتجـي لـه
شافونـي مذلـولٍ وحيـدٍ وخالـي=دلالي من الفزعات مومـي شليلـه
وأنـا بعـون الله متـانٍ احبـالـي=متجـودٍ بحبـال منشـي المخيلـه
واليـوم كـلٍ له صديـقٍ اموالـي=أخـوال واقــرابٍ وآل وجبيلــه
وأنا لـي اللـي زابنـه ما يسالـي=جزل العطا مبري العظـام العليلـه
إلـى دعـوا حيـانهـم فـر بالـي=رفعت طرفي له وقمت اشتكـي لـه
والـى ترجـوا هم رجيتـه بحالـي=بقلبي وعينـي والعـروق النحيلـه
والـى تنــادوا بينـهم بالتعـالـي=ناديـت بإسمـك يامنشـي المخيلـه
من لاذ بك ما حال بالضجيـج تالـي=صار أول لو هـو عظامـه هزيلـه
أنـا دخيـلك يـا عظيـم الجلالـي=حاشـا كرم جـودك يضيـع دخيلـه
تبريت من غيـرك بحالـي ومالـي=ولجيـت أنا بحمـاك عن كل حيلـه
من شر خلقـك لايـذٍ بـك ولا لـي=غيـرك مـلاذٍ شامـخٍ ينعنـي لـه
يارب مالي غيـر جـودك ولا لـي=وإن كـان خليتـن فلا لـي عقيلـه
يـا عالـمٍ كـل الخطـا والعدالـي=اشوف مالي غيـر عـدلك وسيلـه
ولا تواخـذنـي بماضـي أفعالـي=يا ساتر العـورات مضفـي جميلـه
لو كـان ذنبـي راجـحٍ بالجبالـي=عفوك عظيـم ليـس ذنبـي عديلـه
طالبـك تقبـل توبتـي عن خمالـي=وطالبـك عنـي كل كـربٍ تزيلـه
مـولاي لا ملجـأ ولا ملتجـا لـي=إلا انـت ياللـي مـا يذيـر نزيلـه
افرج لمن بالحبـس دونـه ارجالـي=ابواب واقفـال وحصـونٍ طويلـه
في وسـط دبـابٍ وحيـدٍ الحالـي=أظلـم ولا أدري وش نهـاره وليلـه
متـروك مالـي من يـرد المقالـي=لا أحد يبي قولـي ولا أحـدٍ يشيلـه
ولا أحـد غيـرك عليـه اتكـالـي=إلا أنـت يامنجـي دريـك الدبيلـه
ما دمت تنظرنـي وتسمـع مقالـي=ما ضاق عبـدٍ يـدري انك وكيلـه
يا فزعة المضيوم منشـي الخيالـي=يا فـارج الشّـدة ولو هـي ثقيلـه
يـا سامـعٍ بالليـل حـسّ النمالـي=وصوتٍ يونس في البحـور الهويلـه
دعاه وضرب الموج مثـل الجبالـي=فـوقـه وجـاب لدعوتـه وتهليلـه
يا مصـرف الأيـام هـي والليالـي=في قول كن يجـري القلـم بتعديلـه
أدعوك بأسمـاك العظـام الجزالـي=وبحـق ما خصيـت لك من فضيلـه
وبحـق قـدرة عظمتـك والجلالـي=وبحق نـورك والخصـال الجميلـه
وتـزيـل كربـاتٍ علينـا ثـقالـي=تقطعـت مالـي سـوى الله دليلــه
آمـن على قلـبٍ يجـول اجتوالـي=يا مسكـن الروعـات سكـن جفيلـه
اسـرع علينـا يـا قريـب النوالـي=لا تجعـل الشّـده علينـا طـويلـه
يا فارج الكربـه بضيـق الحوالـي=أومـر لعبـدك بالفـرج واتعجيلـه
واجل الأمور المعضلـه والجلالـي=عن كـل عبـدٍ مسلـمٍ يندعـي لـه
صـلاة ربـي عد نبـت الرمالـي=علـى نبـيٍ وضــح الله دليلــه
صفـوة قريش اللي مشى بالعدالـي=نبينـا المعصـوم عـن كـل ميلـه
وآله مع الأصحاب العظام الجزالـي=وما ونّ من شكـواه راعـي عليلـه

اللهم صلي على محمد

والله قصيده جميله ومعبره

ومن يتمعن في معانيها يجد فيها الكثير من عظمة الله سبحااانه

مشكوووووووووووووووور



سلام

لاهنت يالغالي

اختيار موفق جداً

كل الشكر لك