اهداء لشعراء الغزل

جوهرة نجد

اسهر ومسهرني هوى لين العـود =طفلٍ حرم عيني لذيذ المنامـــا
شكيت منه الحمر والبيض والسود=وشقرٍ على الخصر المعزل تواما
وعكشٍ تشرع بالحجاجين وورود=محاجرا تفضح رهيف اللثامــا
وعنقٍ مرق عن لبة الترف ونهود= وخصرٍ هضيمٍ كن فيه الهيامــا
وردايفٍ منها فضا الثوب مشدود=ليا مشى تطوي السلب للحزامـا
لا واه أنـــا مذبوح عمدٍ وجحود= يـاذاه ما بيني وبينك مدامــــا
وحياة من في رادتـــه هبت النود= انك جرحت اللي حنينه اريــامـا
ما حق يالطف الحشـا حب وصدود =وعلام تسكت مـــا ترد السلامـا
كانك تبي تبرير للحب وشهـــود =انظـــر بعينك في دموع تهامــا
وحـــالٍ نحل من حبكم كنه ، العود =ونفسٍ تصوم بغيــر نية اصيامــا
لا يا حبيبي ويش حدك على الكــود=ما انت بعمى وشلون عنى تعامـــا
ان كان منك العطف واللطف مفقـود =ذبح المحب بغير ذنبٍ حرامــــا
يا هاجري ما في اشرف الوصل منقود=عدني كما عود الولي لليتامـــــا
بزيـــارة تطلق من الحزن ممهود=في قلبي اللي لك بوسطه مقامـــا
عليه تشهر سيف الألحــاظ مجرود =وإليا تعطف لك علامك تسامــــا
وش ذنبه إلا انه بالأتعاس موعـود= في حبك اللي مـــا قضاله مراما
وبيت القصيد اللي من القلب مشيود= حرام ما يزهاه غيرك وسامــــا
وشعر الغزل تزهـاه يا باشة الخود=يــــا فاضحٍ بالنور بدر التماما
لك الغلا يــا جوهرة نجد يا نجود=حوريةٍ من حبهــا ما يلامــــا

الشاعر /عبدالرحمن العطاوي

اشكرك اخوي اسير تمير وقصيدة عبدالرحمن العطاوي رائعة وكيف لاتكون كذلك وهي لشاعر فحل ومعروف بالقصائد الرائعة شكرا لك ونرجو تواصلك المستمر.

أسير تمير تغيب لكن تجي بالطيّب والجديد صح لسان الشاعر عبدالرحمن العطاوي قصيده رائعه تربع فيها الغزل

يسلم ذوقك يالاسير ولا تقطع فينا ،،، نحن في أنتظارك


تحياااااااااتي

أسير تمير /أشكرك على هذه القصيدة التي تنم عن إحساس مرهف وذوق رفيع { متعوب عليه } والله يحفظك مع تحيات ،،،،،، العالمي ،،،،،،،