يَ مسآء الشعر

هذا القلم/آلة حزن تعزف حروف ..
وهذا الحبر/خمر الورق والمعاني
حبيبتي وان شفتي أقلامي وقوف ..
لا تحسبين إن أعذب الشعر جاني
حتى الشعر تعترضه أحيانا ظروف ..
ويمر في قلبي وينسى لساني
جيت أوصفك ماتت تحت رجلك وصوف ..
جيت أنطقك راح الكلام وعصاني
حبيبتي والليل/شماعة طيوف ..
عليه علّقت الأمل والأماني
أتذكرك والبرد ووشاحك الصوف ..
كم كنت محتاجك وكم كنت أعاني
وأتذكرك والحيرة تحايل الخوف ..
كم كنت خايف لا يقصّر حناني
كنتي/وأنا/والعشق/والجو محفوف ..
ما زاد عنا غير صمت المباني
كان السهر طربان والليل مكسوف ..
وكان الحكي من شفتينك أغاني
في الليلة اللي بدرها صابه اخسوف ..
كنتي هديه للسما والمواني
طرتي مكانه/وأقبل الغيم ملهوف ..
يبي يضمك بس نورك أناني
وأنا مثل هالغيم من حولك آطوف ..
بغيت أضمك بس عيا زماني
نضحك حزن/ونشوف/ونصد/ونشوف ..
ونضيق/والضيقه سجينة محاني
ما فيه داعي نسمع أعذار وحلوف ..
ما دام ما نقدر نعيد الثواني
أنتي رحلتي دون تلويحة كفوف ..
وأنا رحلت بدون قلب/وأماني !







جيتك وانا رويان .. وأقفيت ضميان
كنّي شربت من البحر من شربتك
هذا انت دايم تطري الوصل شفقان
وهذا انت ما واصلتني من عرفتك
فان شفتني ولهان .. لا تقول : ولهان ؟؟
قول اني حبيتك لكن .. ما وصلتك
اسمع ولا اميّز ترانيم الألحان
وتخيل إني من سمعتك .. عزفتك
ما كان لي نية على دمع الأعيان
ايلين ما ضاقت علي وذرفتك
وما كنت مؤمن في (معاناة الأجفان)
وآمنت فيها من بكيت .. وسهرتك
تتركني آسافر .. وانا منك زعلان !!؟
وانا اللي يمكن "أنتحر" لو جرحتك !!
عمرك سمعت ان فيه عدوان .. خلان
شفني خذيت (أقسى الطعون) و (شكرتك)
لا هنت يالغالي .. وقلبك .. ولا هان
لو ما ملكتك يكفي اني عشقتك
يمكن خذلتك لكن الحب سلطان
سترتني وانا بشوقي فضحتك
تبقى بقلبي (شيخ) والعوج (رعيان)
شف كيف يا قلبي .. بقلبي ذخرتك !!
وشلون تنساني على درب الأحزان
وشلون ؟؟؟ وانا اللي سنين .. انتظرتك !!
مدري .. انا غلطان .. ولا انت .. غلطان ؟؟
بس اللي أدري فيه .. إني خسرتك !!







توك اللحين تدري فالهوى والهيام؟!
يوم جفف ظلام الغدر.. عشق الجفون
جاي تشكي لي الضيقة.. وقل المنام
تحسب إنك إلين اللحين.. خل وتمون!!
جاي بأصدق بداية وأنته أكذب ختام
تحسب إن الخيانة من تعدي.. تهون
من سهر/ يا سهيري.. لا يخاف الظلام
ومن طعن/ يا غريمي.. لا يهاب الطعون
من متى والجريح يطيب عقب «الكلام»؟!
من متى والعيون تحب «دمع العيون»؟!
كف دمعك! ترا توي بديت الملام
ياخي بدري على الدمعات.. توهم يجون؟!
لا تسولف.. تراه الفرقى تهد العظام
لا تسولف.. تراني صدق.. صدق إمغيون
خل دمعك يسولف.. واذكر الله.. ونام
وحط راسك على «صدر الفراق الحنون»
ان صدفت الهوى قله: (عليك السلام)..
وإن صدفت الحزن قله: (عساها تهون)..
إنت ضيعتني عقب الجفا.. والخصام
وإنت علمتني كيف الخيانة.. تكون
منت قد المسامح/ والوفا/ والغرام
«أنت واجد عليك تحب يوم.. وتخون»





الدمعة اللي تستبيح المعاليق
لها حوالي عام تشكيك.. منك
والضيقة اللي فتحت سيرة الضيق
ما بين همّ الإنس.. وجنون جنك
يا بنت انا ماعادني قادر آطيق
تعبت ارد القلب.. واصون ظنّك
كن من على قلبي جبالي شواهيق
القلب ميت شوق.. والصدر تنّك
والموت كل الموت يااغلا المخاليق
إني أحبك.. واكتم الحب عنّك
اخاف لا من قلت «أنا أحبك».. تضيق
وتغيب عني.. وانت غيبتك.. فنّك
كنّي.. فقير المال.. يرجي التوافق
عند اغنياء المال.. والمال.. كنّك
مدري متى مدري؟ من العشق بآفيق
مدري متى بانساك.. وأنسى بأنّك..
اول غلا يفتح قفول المغاليق
ويسكن بوسط الروح.. من صغر سنّك
يا أرقى قصيدة.. يا بديع الطواريق
يا أطهر جريمة.. يا الجمّال المحنّك
يااعنف من الصدمة.. علىپفكة الريق
ويا ارق.. من منظر تبّسام سنّك
اسمع كلامي.. يازعيم الغرانيق
بيتي كتبته بعد ما الصدر.. تنّك
تدري وش اصعب شي يا أغلا المخاليق
إني أحبك.. وأكتم الحب عنّك





الضحك صحرا.. والمدامع غابه
والعشق صادق... لو غرورك كذب
جتني جيوش العشق لابه.. ولابه
والمشكلة قلبي مهو متزهب!!
منهم يجيب العلم.. يا طلابه؟!
ومنهو يرد الدار.. للمتغرب؟!
هذا حزن قلبي.. عسى يشقابه
دام العرب.. ما تزهم المتعرب
يالطاهره/بالعفه/الجذابه
يام الجمال النادر المتشعب
البارحة.. كنتي هنا.. مرتابه
يا كثر ما قلتي لي: «ليه معصب»؟!
وانا مسوي اني ماني آبه!!
يعني تغلي.. ولا انا متعذب
واليوم.. مات الوصل في محرابه
شرقت.. والحظ السعيد مغرب
قلبي يا اغلا ويا اعز احبابه
من يوم فارقتك.. وهو متغلب
على شفاة الشوق عض بنابه
وعن درب حزنه ما استطاع يجنب
كنه اليتيم اللي جفوه اقرابه
او كنه السكران لامن غيب
ما دامنا في كل شي نتشابه
صعب نتلاقي.. وانشدي المجرب
بس اسمعي شعري وهاك عتابه
تذكريني فيه يوم اشيب
واذا سألتيني الهوى وش جابه..
بقول يا حزن المحبه.. قرب
(لا تنشدين العشق/ويش اسبابه
الا انشديني العشق/وسهو مسبب)!







يَ مسآء الشعر
كم قصيده لِشآعر .. صلآح العرجآني
واتمنى ترتقي لذائقتكم

اختيارات رهيبة ورائعة من المبدعة عزوف
مادامت القصيدة الاولى على قافية اوف ولم ترد فيها عزوف اقول
احلى قصيد اللي يجي منك ياعزوف
"""""""""""حتى ولو كان الغزل برمضاني
اهنيك على ذوقك
الله يوفقك

آختيآرآتَ جميلههَ عزوفَ ووليَ ععودهَ لههآ

تسسلمَ يديكَ يَ الغغلآ

لاهنتِ

آختيآرآت جميله بجمآل ذآئقتك
صح لسآن شآعرهآ وسلمتِ على آلآختيآر

ذآآئقه رووعه يآآقلبو
تسسلمين على القصيده الرووعه
ماننحرم منك يآآغلآهم ...ْ