وش عاد أسوي يومـك أقفيـت عنـي

يكبـر قسـى جـرح السنيـن ويعنـي
رجل الحزين اللي علـى حـد الإدراك



هذا أنـا يـوم أخلـف الوقـت ظنـي
الحـزن حزنـي والسوايـا سوايـاك



بكيـت وأبكيـت العـيـون وبكـنـي
تعال شفنـي كـل مـا حـان ذكـراك



كـم واحـدٍ جانـي بعـدك وسألنـي
شخبار من حبيـت وأقفـى وخـلاك؟



وأصـد والحـزن الخفـي ممتحـنـي
وأن قلت منهو قيـل ماهـوب يخفـاك



قيل العوض قلت العوض مـا شحنـي
والله لا هــــــذا ولا ذا ولا ذاك



يـا مـا بعضهـم مرنـي مـا فتنـي
يا جعل ماهم بالعـوض فـي محيـاك



الله لا يجبـر عـزا مــن عذلـنـي
ما جاه ما جاني ولا جـاه مـا جـاك



واللي عذل ويقول (لـو و لـو أنـي)
جعل يعشـق لـه واحـدٍ كنـه إيـاك



مـا فيـه شـيٍ فـي حياتـي غبنـي
الا نهار أقفيـت وأنـا أسمـع إبكـاك



الله مــن جــرحٍ قـديـمٍ مكـنـي
أمداك نزفـه لكـن ادواه مـا أمـداك



علـيّ كـم جـار الزمـان وطعـنـي
أسمع صدى صوت المعاليـق تنخـاك



وين أنت ياللي كـل مـا غبـت كنـي
واقف علـى بـاب الأمـل وأتحـراك



ليتك تعـرف تخـون وأقـول خنـي
علـى الأقـل القـى سبـب وأتنسـاك



وليـت الزمـن فمحبتـك مـا خذلنـي
وليت الهجر من طيب خاطرك ورضاك



لـو أن قربـك والوصـل بالتمـنـي
ما غبت عن عيني كثـر مـا اتمنـاك



خايـف يطـول البعـد وتسـج منـي
وياخذ مكانك شخص ماهوب يسـواك



وش عاد أسوي يومـك أقفيـت عنـي
لا أنا أتبع المقفـي ولا أحـب فرقـاك

فتحتي جروح مبريه

الله الله ..

أبيات راااااااائعة ..

أحسنتي الأختيار ياتوليب ..

الف الف شكر لك ..

لاهنتي يالنشمية ..

وبارك الله فيك ..

.....................

الله الله على الآبيآت الآكثر من روعه
آنتقآء وآختيآر رآئع ومميز
سلمتِ يالغلآ وسلم لنآ آختيآرك ..

ابيات رائعه وجميله
شكراً تواليب2

اشكركم على هذا المرور الرائع
تقبــلو مني اعذب التحية واجملها ..
دام وصالكم ........
لاعدمناكم

سلمتى على نقل الابيات المميزة..