*** مولتن كيك **** بودنج الكاراميل بالشكولاته *** وغيرهها

*** Chocolate Lava Cake ***
*** مولتن كيك ***

المكونات :

نصف أصبع زبده غير مملحة + حوالي ملعقة لدهن القوالب .

ملعقتين صغار طحين أبيض

ملعقتين طعام كاكاو

رشة ملح

سكر ناعم للتزين

٦٠ جم شكولاته غامقة

بيضه كامله

صفار بيضتين

٣/٤ كوب سكر أبيض يفضل يكون ناعم بس موب مطحوووون .


أول شي تدهنين صحون سيراميك ( صحون سوفليه بزبدة دافيه ) بعدين حطيها في الثلاجة أنا أستخدمت صحون حجمها ٣/٤ كوب تقريبا .

الحين شغلي الفرن على ٣٥٠ فهرنهايت .

أنخلي الكاكاو مع الملح و السكر في صحن .

بعدين في حمام مائي ذوبي الشكولاته مع الزبدة مع التحريك طبعا إلين تسير ناعمه .

زي كذا :




الحين شيليها من الحمام و أخلطي معاها السكر و الملح و الكاكاو .

بعدين أخلطي عليها صفار البيضتين وحركي زين وبعدين البيضة الكاملة و الطحين . بعد هذي المرحلة حاولي ما تركين كثير إلين ينخلط بس .




الحين وزعيها على القوالب اللي سويتيها وبعدين على الفرن على طول .

الحلو في الوصفة هذي إنه يمديك تسوين الخلطة قبلها بيوم ، يعني للعزايم تنفعكم .


خليها في الفرن حوالي ٢٠ دقيقة يمكن أكثر ويمكن أقل ، المفروض تكون الأطراف بدت تستوي بس الوسط يلمع شوي ولو دخلتي عود يطلع وعليه خلطة .



طلعيها من الفرن خليها بس شوي تبرد بعدين بسكين فكي الأطراف و أقليها على صحن وزينيها عاد حسب رغبتك .










سايلة و لذيذة وبعد سهلة .... و أتركوا عنكم شغل الهنود خرابيط صدى التحلية .

*** Chocolate Bottom Caramel Pudding ***
*** بودنج الكاراميل بالشكولاته ***

المقادير :

٣/٤ كوب + ملعقتين طعام سكر عادي

١/٤ كوب مويه

كوب قشطة خفق

٣ أكواب حليب كامل الدسم وقصير الأجل

١/٤ كوب نشا ذرة

بيضتين

ملعقتين كبار فانيلا سايلة

ملعقة كبيرة ملح

حوالي ٦٠ جم شكولاته غامقة

الطريقة :

أول شي راح نسوي كاراميل ، هذي الطريقة هي الكاراميل بالطريقة الرطبة تقدرين تسويين كاراميل ناشف بس أفضل هنا هذي أسهل بكثير للي ما يعرف .

حطي السكر و المويه في قدر ثقيل على نار أعلى وسط ، غطي القدر وخليها تطبخ إلين ما تغلي ، بعد ما تغلي خلي القدر مغطى شوي بعدين شيلي الغطا .


الحين خلي السكر يطبخ إلين ما تلاقين لونه بدأ يتغير ، الحين يفضل تهزين المقلة شوي شوي عشان تلونين الكارميل بالتساوي .

الحين لازم تعرفين شي : كل ما طبخ الكاراميل كل ما صار طعمه معقد أكثر بس أقل حلاوة ، لهذا الحلى بالذات أنا أبغى طعم كاراميل قوي عشان كذا خليه يطبخ إلين ما يسير ذهبي إلى بني غامق تقريبا أو إلين ما تلاقين بدأ يدخن . علطول قفلي النار و صبي القشطة شوي شوي و مع التحريك المستمر . طبعا غطي يدك هنا عشان بيفور بسررررررررررررررررعة . إستمري إخلطي إلين ما تلاقينه صار ناعم بعدين أخلطي الملح و أخلطي شوي .

** طبعا الفوران طبيعي عندك كاراميل حرارته ٣٥٠ فهرنهايت و الموية تغلي على ٢١٢ فهرنهايت وش تتوقعين يسير إذا خلطتيهم ؟.

أخلطي البيض و الفانيلا في صحن ، و أخلطي ١/٢ كوب من الحليب و النشا في صحن ثاني .

أخلطي باقي الحليب ( ٢ ونص كوب مع الكراميل ) و خليه يرجع يغلي مع التحريك . بعدين صبي عليهم النشا و الحليب وخليهم يغلون غليه خفيفة وطبع إستمري في التحريك هنا جدا مهم . الحين خليه يطبخ زود دقيقتين عشان يروح طعن النشا بس .

الحين أخلطي شوي من خلطة الكاراميل على البيض و أخلطي زيييييين بعدين صبي خليط البيض على باقي الكاراميل . طبعا الخطوة هذي عشان ما يتكتل عليك البيض . أخلطيهم زيييييييين .

الحين صبي حوالي ١/٢ كوب من الخليط هذا على شكولاته مقطعة و حركيها زيين عشان تذوبين الشكولاته .

الحين حطي شوي من خليط الشكولاته في صحون قزاز ، وبعدين زيدي عليها من الكاراميل . خليها تبرد حوالي ساعتين على الأقل قبل التقديم . قدميها مع قشطة مخفوقة و أوريو مكسر أو لو تبين شكولاته مطحونه .

وبس ......

*** Chocolate Souffle ***
*** سوفليه الشكولاته ***

١٠٠ جم شكولاته غامقة من أحسن نوعية تلاقينها مقطعة .

١/٣ كوب سكر

صفار بيضتين + صفار بيضتين + ٦ بياضات بيض ، فهمتوا وش أقصد !!

كوب حليب كامل الدسم قصير الأجل


١/٤ كوب طحين


رشة ملح



الطريقة :

أول شي في قدر صغير أغلي الحليب مع الشكولاته و نص السكر و الملح .

وهو يغلي جيبي صفار بيضتين مع باقي السكر و أخلطيهم إلين يسير باهت لونه شوي . بعدين حطي عليهم الطحين و أخلطي زييين .

الحين صبي الشكولاته أول ما تغلي على البيض شوي شوي و حركيها زييييييييييين بعدين رجعيها على القدر على حرارة أقل من النص بشوي إلين ما تبدأ تغلي مع التحريك المستمر . بعد ما تغلي شيليها من النار وحطيها في صحن حديد وخليها تبرد شوي .




اللي سويناه قبل شوي أكيد قد شفتوه قبل إسمه كريم باتسييه أو كريمة الحلويات وهذا عبارة عن كسترد مثقل بنشا وراح نستخدمه هنا كأساس للسوفليه .


بعد ما يبرد زيدي عليه صفار بيضتين . الحين صار الأساس حقنا جاهز . ويمديك تحفظينه يومين لو تبغين .

جهزي صحون السوفليه الوصفة هذي تكفي يمكن ٤-٥ صحون أبو ٣/٤ كوب تقريبا . أدهني الصحون بزبدة دافية ( موب سايحة وموب زيت ) وبعدين غطيها يسكر خشن وشيلي الزايد . السكر هنا راح يتسلق عليه السوفليه وهو يطلع .




سخني الفرن على حرارة ٤٢٥ فهرنهايت . وحطي الشبك في الوسط .

الحين بخلاط كهرب على أعلى سرعة أخلطي بياض البيض زيييييييييييين في صحن معدني إلين يوصل مرحلة منقار الطير .

راجعي موضوع الماكرون للي ما تعرف وشو منقار الطير .


الحين هذي الخطوة جدا مهمة !! كيف تخلطين الأثنين ؟، هدفنا هنا إننا نخلطهم كلهم بدون ما ننفش البياض كثير طبعا في هذي المرحلة الأساس جدا ثقيل ولو حاولتي تخلطين البياض معاه بيتعبك شوي ، عشان كذا خوذي بس شوي من البياض و أخلطيه مع الأساس بقوة عادي هذا بس عشان يلين الأساس شوي لباقي البياض . الحين حطي نص البياض وبملعقة مطاط أخلطيهم شوي شوي و إنتهي تنفشينه الحين شوي شوي بس إلين ينخلط صح بعدين حطي الباقي .

بيسير شكله زي كذا تقريبا .




الحين صبيه في صحون السوفليه للحافة !!! طبعا نسوي كذا عشان ما يسير له قبة .



الحين عاد نجي للتاج وشلون تسوينه ؟ يمكن موب باين في الصورة للأسف بس الفكرة هي إنك تمررين طرف أصبعك أو حتى طرق ملعقة شاهي على أطراف الكوب كأنك تمسحينه بالعربي بتسويين حفرة بسيطة في الخليط . طبعا هذي طريقة فيه ناس تتفنن زود وتسوي التاج في الوسط وكذا يعني ترسمين زي الحلقة بعيد عن الطرف شوي بطرف أصبعك أو طرف الملعقة لو تبين طبعا ، بس موب في الوسط يعني بعد الطرف بحوالي ١ سم و إذا نفش السوفليه بيجيك شكله غريب وحلو أنا شخصيا مقتنع بتاجي في الطرف أشوفه أحلى كذا .

الحين على طول لازم تحطي السوفليه في الفرن على صينية يفضل تكون أصلا في الفرن . بعد ما تدخلينه في الفرن نزلي حرارة الفرن ل ٣٧٥ فهرنهايت هذي حرارة الطبخ الأصلية . طبعا الفكرة هنا هي إننا نسخن الفرن أكثر من اللازم كونه أول ما تحطين السوفليه بيبرد شوي عشان كذا نحطة على حرارة أعلى من اللي نبي .


بعد حوالي ٢٠ دقيقة طلعيه من الفرن وقدميه على طول !! ولا ينسم ويروح الهوا .


قدميه طبعا ما يحتاج أقولك مع إسكريم .





لاحظي التاج هنا شوي منسم بس شوفي الصور اللي بعدها هو كان كذا .

*** Vanilla and Orange Souffle ***
*** سوفليه الفانيلا بالبرتقال ***

اللي عاد يمل من الشكولاته جربوا هذا .....


كوب وثلث حليب كامل الدسم

عود فانيلا مقسوم

ثلث كوب + ملعقة طعام ونص سكر

١/٣ كوب طحين

١ ونص ملعقة كبيرة زبدة دافيه

٤ بيضات مفصولة

قشر برتقالة

جهزي صحون السوفليه زي الطريقة اللي فوق


الحين سخني كوب من الحليب إلين يبدأ يغلي مع الفانيلا و البرتقال بعد ما يغلي طفي النار وغطية ١٠ دقايق عشان يطعم .

الحين أخلط ١/٣ كوب الحليب الباقي مع الطحين + السكر في صحن ، بعدين أضيفيها للحليب الحار وخليها تغلي مع التحريك المتواااااصل . بعد ما تغلي طفي النار وحطي الزبدة و حركيها زين معاهم بعدين غطيها وخليها ١٠ دقايق .
بعد ١٠ دقايق شيلي الفانيلا و حطي صفار البيض .

الحين سويي المرانج . و أخلطيه زي فوق بالضبط و سوي كل شي زي فوق بالضبط . الفرق إنك قبل ما تدخلينها الفرن رشيها بسكر مطحون ، هذا بيسوي طبقة ذهبية فوق السوفليه .


أستمتعي بأحلى سوفليه ، مع إسكريم أو صوص شكولاته بس طبعا موب هيرشي .











لاحظي وشلون جوا موب سايل ولاهوب ناشف شي بالوسط ...

*** Coffee Souffle ***
*** سوفليه القهوة ***

هذي الوصفة بالضبط زي الأولى بس بوريكم كيف تعدلون عليها .

ذوبي ملعقتين كبار نسكافيه إسبريسو مع ملعقة من الحليب اللي في الوصفة الأولى على حرارة وسط إلين ما يذوب ويغلي بعدين حطي باقي الحليب وكملي الوصفة عااااااااااادي زي الأولى .

الفرق هنا إن مافيه شكولاته و السكر هنا بس ثلاث ملاعق كبيرة . بدال ثلث كوب



النتيجة :











طبعا قدمتها مع إسكريم موكا صناعة منزلية ولا أحلى .......



يالله عاد هذا السوفليه الله الله بالتطبيقات .....

رووعه خصوصا الاولى تجنن
تسسلم ايدينك ي الغلا

اشكال حلوه ولذييذه
عوافي اخووي

اشكال جميله وحلوه

شكرا لك ومااقصرتي..

ماشاءالله رووووووووووعه
سلمتي يالغاليه

رووووعه مآشآء الله
أحب الأنواع اللي كذآ

سويت السوفلية بس شيء ضبط وشيء لآ

:D