السلام عليكم ورحمة الله وبركاته
صباااح/مساااء الخير على الجميع
ثمّن كلامـك فاتحـن فمـك مسـرور
واحشم مكانك منت قاعد بـسكـره
ماينجبر كـسرك ولـو كنـت مجبـور
كـسر الجبر أهون من اصلاح كـسره
وجبر الكـسير احيان بيديـن دكتـور
وكـسر الجبير احيان باسباب جبره
ياصاحبي والشعر جائـز ومحظـور
حتى المجاز احيان يجبرك حظـره
ولاجت قصيدتها تتالو على الـدور
شخص ٍ يهني وشخص بالغ بشكـره
مثل القماش اللي تطارح به الثـور
والثور هايج وانت ثور ٍ من أسره
بعض البشر يرفع مقامه عن البـور
والبعض الآخر هو من ايحط قدره
وشخص ٍ يجرك من غلا حرف مجرور
وشخص ٍ على الويلات يكـسرك جره
وشخص ٍ تعادل غيبته حشمة احضور
وشخص ٍ حضوره ماوزن ربع ذرّه
أكبر قهر لامن تبسّمت مقهـور
إكظم قَهَرْك وخل ضحكك لـ قهره
واللي يبي الطولات لا شـك ماجـور
والا الحقير ادري بنفسه تحقـره
وادري العيون الحور تفرق عن .. العور
مثل الغنـي يومـه يقـارن بـ فقـره
ماقول يا شعري وانـا صـرت مشهـور
هذي الفرايـد جتـك يالشيـخ زفـره
شاورتهـا قالـت: خفايـف ولا تثـور
وهذي غلاها مثـل خيط ٍ بمكـره
مسرح رجولة شخصـك اليـوم بالـدور
إخراجها فاشل وانا ابصم بعشـره
مشكور إي والله من القلب مشكور
ماطاح رجال ٍ مـن العيـن حسـره
والا الخبل مايستره لبـس مستـور
الشـق واضـح لـو تغطـى بستـره
والتربيـه ماهـي قلـم خـط وسطـور
واللي ربا باقـذار طينتـه قـذره
شخص ٍ توده قبل ينطق على الفـور
وشخص ٍ من اول كلمتين ٍ اتخسـره
بعض البشر قدره كما وزن عصفور
والبعض بحر ٍ والكرم مـوج بحـره
يلزم تكون ف بعض الاحيان مغـرور
لأن الغرور بحضرة اللآش حقـره
ماهمنـي طـرد الغوانـي مـع الحـور
أنا اهتمامي صعب توصـل لحصـره
والا انت ياجاهل مسامـح ومعـذور
من كلمت ٍ والدافـع اشـره وأشـره
هذي القوافي جتك ياالشيـخ بالـدور
واعرف بداية كل بركـان جمـره
صحيح انا مانـي علـى الـرد مجبـور
حبيت اوضح كل شخص ٍ وقـدره
28 / 09 / 2009, 02 : 07 AM
أكبر قهر لامن تبسّمت مقهـور
