( حكاوي رمضانية ) ذكريات الزمن الجميل مع [ أم عبدالله ]

[ALIGN=CENTER][TABLE1="width:89%;background-image:url('http://img02.arabsh.com/uploads/image/2013/07/03/0c35434960f605.png');"][CELL="filter:;"][ALIGN=center]

السلآم عليكم ورحمة الله وبركآته
مبآرك عليكم الشهر الكريم واعاده الله علينآ وعليكم بالخير والبركآت
وكل عآم والجميع بخير .
أبائنا وأجدادنا تاج على رؤوسنا . يحلو الحديث معهم ونأنس بهم .
لأجدادنا وأبائنا الكثير من الحكايات والمواقف في رمضان
فسوالفهم لها طعمها الخاص . والجلوس معهم يذكرك بماضي جميل
قلوب بيضاء . ونفس طيبة . وضحكـة لاتفارق المحيا
فهم الخير والبركة ..

أحببنا هنا في حكاوي رمضانيه أن نلتقي بمجموعة من كبآر السن من آبآء وآمهآت
نحاورهم ونتذكر معهم رمضان مابين الماضي والحاضر وحكاويهم معه ..
ومعنآ اليوم أم عاشت وكافحت أمام مصاعب الحياه من اجل العيش وتربية اولادها
تعشق البر والصحراء وتربية الاغنام
اليووم معنا ام عبدالله رمزت لنفسها بهذا الرمز ..

البطاقه الشخصيه والوظيفه
ام عبدالله
ماتوظفت ولا درست ،بدو في البر لين خرب البر وسكنّا في الديار!

كيف كنتوا تستقبلون إعلان دخول شهر رمضان المبارك . وش كانت مشاعركم بالحاره إذا وصلكم الخبر ؟
ـ منول رمضان مافيه رادو ولا فيه تلفزيون في البر نتحرى هلال رمضان واذا شفناه صمنا ،
واذا هل هلا شوال افطرنا،

كم كان عمرك أول مره صمت وكم يوم صمت في أول رمضان تصومه ؟
•- وشلون تعرفون بدخول شهر رمضان ؟

قبل يدخل رمضان نقرب من العدود والحساوة (الابار)والا نقرب من القرى اللي تصير قريبة منّا وننزل حنا
والبدو اللي معنا نتقاصر يجمعنا الماء،
هل فيه فرق بين رمضان على أيامكم ورمضان الحين ؟
والله ماننوس هالحر اللي مثل هالوقت ،منول مافيه حر ولا فيه عج عايشين في ريف طول السنة
في الشتاء والصيف ،
ساكنين في بيوت الشعر وباردة والماء في القرب حلو وبارد والله العظيم انه ابرد من هالمكيفات
اللي فوق روسنا ذا الحين !اللي جابت لنا السخاين ووجع الراس!

ـ طيب يا أم عبدالله ،وش تسوون بحلالكم في رمضان حر وشمس والاجواء ماتساعد على الرعي والمشي مع الغنم والابل ؟
مافيه حر ورمضان مثله مثل اي شهر منتشحط منه ،نسرح بحلالنا من تطلع الشمس الى يجي وقت الظهر ثم نروح
للبيوت وحلالنا شبعان ومفلي !ترى وقتنا حتى في القيض الارض عشب وشجر والله انك ماتشوف التراب من العشب
والشجر مثل النصي والشفلّح والثمام والعرفج والسدر في البر كنه غابة مبروك الغنم تشرب من الغدران !
منول وحنا نسرح نشوف فراخة الطيور في الارض وبيضة والضبا في العرمة كنه غنم !
!لين جت هالدهور وفنا ،

ـ طيب سحوركم وشو منول على وقتكم ؟
لبن والا حليب وقرص على جمر بس ،

ـ طيب الفطور وش تفطرون منول او مثل فطورنا سمبوسه وتوت !؟
ضحكت ،وقالت نفطر قهوة وتمر والا تمر معبوط مع اقط وسمن على رز والا دخن والا جريش على ودك
وان كان فيه لحمة حطيناها !غير الحين !

صوره من فطور رمضان الحاضر

ـ على طاري اللحم كيف تسوون باللحم في الحر ؟
نقفره وننشره على حبل .
منول الذبيحة والله ماننطل منها شي حتى ذنبت الطلي توكل اول ماناكل هي ،

ـ طيب عيدكم منول وش تسوون فيه ؟ و كيف كنتم تستعدون له وتقضونه ؟.
اذا هل هلال العيد كل بيت يسوي عيده ويجتمعون الرجاجيل وكل حرمة تقول عسى عيدي ازين من عيد فلانه والحريم
يجتمعن ومبسوطين واذا جاء من يوم ثالث العيد شدينا وكل راعي بيت طوى بيته وهذا حالنا ننزل ونشد!

ـ وش المحلات اللي تنزلونها منول ؟
العتش وابوركبة والحقاقة والبلدي وتمرية والشوكي ورويغب هذي محلاتنا طول سنيننا
.
ـ وش رايك في وقتنا هالحين والا حياتك منول ؟
والله ان حياتنا منول ابرك وازين من حياتكم هالحين ،البر زين منول لين تغيرمن الدهور
وتركوه العرب ونزلوا في الديار والمدن تقولها بحسرة شديدة !

ــ طيب منول وين تصلون التراويح فيه؟
والله ماعرفنا ان فيه تراويح الا امس القريب يوم سكنا في الديرة ،نصلي الاخير(العشاء)ونرقد،وقبل
الفجر شابين ضونا ونتسحر سحور مبروك وهذا اللي نعرفه .

ـ طيب مقاضيكم وحاجاتكم وين تشترونها منه؟
نشريه من الديار اللي نصير منها قريبين اما التمر القلال يحدر ابوي للحسا ويشتريه ،والرطب اكثر مانشتريه
من تمير،نجلب السمن والاقط ونبيعه ونشتري الرطب والعيش ولارزاق منه ،

ـ بيوت الشعر اللي كنتوا تسكنون فيها وين تشترونها منه؟
من طلعت على الدنيا وبيوت الشعر عندنا،وعندنا سدو ونسوي الذريات واذا تقطع منه شي نصلحه ،
واذا خربت والا تقطعت نزينها ،

ـ طيب ابسألك متى تركتي البر؟
اعرست وشدينا للرياض وهلي في البر ،

ـ كيف كان وضعك بعد البداوة وروحتك للرياض؟
والله ماستانست ابد وانا بعيدة عن البر ،ضاق صدري ابي اهلي وابي البر،ويوم مرت سنة رحت لهلي
وابطيت عندهم مابي الرياض وعيالي معي وابوعيالي يجينا في البر وجلست معي عيالي الله يصلحهم لين
جت المدارس الله لايعيدها وغصب درستهم ،والعيال هم اللي دخلوني للديرة والا مابي الا البر ،
ودرسوا ووفقهم الله .

ـ طيب ماعندك غنم تركتيها ؟
والله ان شدينا للرياض ومعزاي معي في براحة جنبنا يوم الجيران ماهمب واجد وحلب منها وازين السمن لين
جت البلديات وشالت حوشتنا،ودخل بمعزاي في البيت وتبطي عندي وقاموا الناس تشكي من ريح الغنم وشالها
ابونا وباعها وهي في نفسي .وهالحين عندي غنم .

ـ طيب الناس تركوها وتحضروا ؟
احبها واحب ريحها الغنم مبروكة .

ـ طيب نبي نسألك عن القصيد وش تحفظين منه؟
منول العرب يقصدون في وقته ،ونحفظه على طول قصيد واجد واهلي شعار .
من القصيد اللي نحفظه
البحر ما الله قسم لي فيه عيشه
،،،،،،،،،،،،،جعل حظي فوق مومياتي الحبالي
فر قلبي فر طيرن صف ريشه
،،،،،،،،،،،،واقت امه لا مكان العش خالي

وهذي تطري علي يوم راحوا عيالي للدراسة كلهم وتطري علي ما ودي يبعدون عني .
فر قلبي فر طير صف ريشه
،،،،،،،،،واقت امه لا مكان العش .

ومن القصيد اللي يرددونه اهلي يوم حنا صغار
الصبر مفتـاح الفـرج عنـد الاذكـار
ومـن لا صبـر تصبـح حوالـه كسيـفـه
خطوى الولد مثل البليهي الـى ثـار
زودٍ علـى حملـه نقـل حـمـل اليـفـه
وخطوى الولد يا مال قصاف الاعمـار
لا نـافـع نفـسـه ولا مـنـه خيـفـه
وخطوى الولد مثل النداوي الي طـار
صيـده سمـانٍ مـا يصـيـد الضعيـفـه
حنـا نرافـي زلـة الجـار لـو بــار
نضحـك حجاجـه بالعلـوم اللطيـفـه
نرفـي خمالـه رفيـة العـش بالـغـار
ونودع لـه النفـس القويـة ضعيفـه
ولا نبدي الخافـي الـي صـار مـا صـار
يفلج قصيـر البيـت لـو بـان حيفـه
أحـدٍ عـلـى جــاره بخـتـري ونــوار
واحـدٍ علـى جــاره صـفـاة محيـفـه
الجـار لابــده مقـفـي عــن الـجـار
كــلٍ بجـيـرانـه يـعــد الوصـيـفـه
نكـرم سبـال الضيـف حـقٍ وتعـبـار
لا مـن ولـد العفـن شــح برغيـفـه

[/ALIGN][/CELL][/TABLE1][/ALIGN]

آشكر كل من سآعد في آعداد هذآ اللقآء
جزآهم الله خير وحفظ الله لهم والدتهم واطال الله بعمرها ..
أسأل الله عز وجل أن يتم علينآ رمضان ويعيننا على صيامه وقيامه
ويطيل بأعمار آبآئنا وامهاتنا وشيابنآ ويعطيهم الصحة والعافية ..

الله الله

ربي يطول بعمرهآ على طآعته ..
استمتعنآ باللقآء مع أم عبدالله

وعسآكم عالقوة

:)

لقاء رائع مع أم عبدالله

شكرا إلى إم عبدالله على قبول اللقاء وكذلك شكرا لمن أجرى اللقاء

وشكرا على الحكاوي الجميلة

والله ان حكاوي ام عبدالله توسع الصدر و زينه ؛؛ على البساطه و الصراحه ؛ حتى تحس ان حياتهم منول زينه ( تقول مهنا حر و لا غبار ) !! صدقتي ما جاب الحر الا الاسفلت و تكوم هالعماير ؛؛

اختي الراقيه ؛؛ الله يجزاك خير و لا نزال بالانتظار دائما لم تقدمين ؛؛

تحياتي

لقاء ممتع وجميل مع ام عبد الله اطال الله بعمرها

ودي انه كان طووويل شوي سوالفها ماتمل ,,

شكرا لها وشكرا لك اختي الراقيه استضااافه جدا جميله...

لقاء ممتع مع ام عبدالله الله يطول بعمرها

شكرا من القلب لكل من امتعنا بهذة اللقاء

اقتباس: المشاركة الأصلية كتبت بواسطة بوح المشـاعر    الله الله ربي يطول بعمرهآ على طآعته .. استمتعنآ باللقآء مع أم عبدالله وعسآكم عالقوة :)

اللهم آميين
ياهلا فيك وبحضورك .. شكرآ لكِ

اقتباس: المشاركة الأصلية كتبت بواسطة كلاش تمير    لقاء رائع مع أم عبدالله شكرا إلى إم عبدالله على قبول اللقاء وكذلك شكرا لمن أجرى اللقاء وشكرا على الحكاوي الجميلة

حياك اخوي كلاش منور بحضورك وتواصلك
شكرآ لك ..

اقتباس: المشاركة الأصلية كتبت بواسطة توأم الجود    والله ان حكاوي ام عبدالله توسع الصدر و زينه ؛؛ على البساطه و الصراحه ؛ حتى تحس ان حياتهم منول زينه ( تقول مهنا حر و لا غبار ) !! صدقتي ما جاب الحر الا الاسفلت و تكوم هالعماير ؛؛ اختي الراقيه ؛؛ الله يجزاك خير و لا نزال بالانتظار دائما لم تقدمين ؛؛ تحياتي

ماشاء الله عليهم على ان حياة زمان تعب وحالتهم حاله الا انهم مبسوطين بحياتهم ويتمنون ان حياتهم قبل ترجع
ياليت من يجرب عيشتهم ولو يوم شوقونا والله لها بس مااتوقع اني بنسجم معها لان احنا تعودنا على حياتنا حياة الراحه ( اطلب تجد ) !
حياك الله اخوي توام الجود شاكره حضورك وتواصلك للمواضيع لآحرمنا الله من هـ التواصل ..