دمعة فراق

ياغايبة مادامك اخترتي البين
واقفلتي ابواب الغرام ورحلتي
مااقول لك عودي ورحتي على وين
لكن تعالي اهمسك لو سمحتي
كيف استحليتي دموع المسيكين
وعلى غلاف مفارقك وش كتبتي
وين العهد واحلامنا والدواوين
وين الغلا ودموعك اللي نثرتي
والله لوك تسألين الشرايين
او تدخلين بخافقي لاعتبرتي
والا افهمي كلمة قبل لاتروحين
هذا اذا عندك شعور وفهمتي
انا بعد ضيعت كل العناوين
وصبرت مادامك ببعدي صبرتي
لكن قسم بالله ياشيخةالزين
مايسكن بقلبي احد غيرك انتِ
لك صورة مرسومة داخل العين
لو ينمسح نور البصر ماانمسحتي

جممممميل ماخطته المشاعر هنا 🌹

سلمت يمناك اخوي عالقصيدة الحزينه 💔💔

صح لسآنك ،
وسلمتّ على هـ الأبيآت .. !
لآهنت ،

آبيات جميله ..
صح لسآنك وسسلمت يمنآك ...