ديوان الشاعر :فهد المفرج التميمي حفظه الله

[align=right]تعريف بالشاعر : [/align]
فهد بن ابراهيم بن عبدالله المانع المفرج التميمي
من مواليد مدينة تمير
[align=center]الشاعر فرض نفسه على جمهور كبير من الشباب وذاع صيته عند الكبار والصغار لسهولة شعره ولجمال صوته أيضا
ويتميز شعره بالرقة وصدق العاطفة لمن تأمل مراثيه وقصائده في ابنتيه
له حضور في الوسط الإعلامي وتمت اسضافته في بعض القنوات وعلى رأسها قناة المجد وفي إذاعة الرياض في برنامج الخيمة الشعبية وله حضور كبير في الشبكة العنكبوتية أيضا..وصدر له شريط بصوته باسم وضح النقا يباع في التسجيلات ..
علما بأنني في هذا الديوان سأقتصر على بعض القصائد ومازالت قريحة الشاعر خصبة ثرة
::
وإلى أولى قصائده انتشارا
::
[/align]

[align=center]
::
ياريوف
كتبها الشاعر في ابنته ريوف بعد غيبتها عنه
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
يا ريوف ياعلـّك بحالي تروفين =لاقلّ شوفي وانحنت بي عصـــايه
يميـــن من نـزّل تبارك وياسين =انك قمر عمري وكوكب فضايه
أدراك بالخاطر واعاملك باللين=وارجي عسى الله مايخيّب رجايه
احب من حبك واعادي المعادين=وادعي لك الله بالســـتر والهدايه
فقدتك البارح وجريت صوتين =هذي وهي ليله وعـــند انسبايه
كله غلا ياويلي اثر الغلا شين=الله واســــاله لايبيــّن غــــــلايـه
من حبها حبيت كل الصغيرين =صـــارت محبتهم بقلبي هوايــــه
عودتك الممشى على شان تمشين=اشد بالثنتين واقصـــــــر خطايه
وليا بكيتي قمت اهلل وتصغين =واحيان اغني لك واردد غنــــايه
يضيق صدري لاسمعتك تونين=واجـــر صوتي من خـلاي بـخلايه
وان جيت ابقفي عنك لدّيت بالعين=الــدرب قدامي واطــالع ورايــه
رد الوفا ياريوف ماابيه ذالحين=ابيــه لي دارت عليــه رحــــايه
ابيه لا منه غدا الليل ليلين=لا اشتدّت الايام واظلم سمـايه
وابيه لامن صارت العشر ثنتين=اليا اتركوني عزوتي واقربايه
وابيه لا عزّوك فيّ المعزين=تدعيــن رب البيت يغـفر خطــايه
اليا كتب ربي افراق المحبين=ثم ادفنوني لابتــي واصدقايه
توك صغيرة سنّ مانتيب تدرين=والعــالم الله وش تكــون النهايه
اما التفتي لي وزين على زين=والا رميتينــي بــدار الرعـــــايه
[/poem]
[align=center]::[/align]

[align=center]
::
وجودي على الطيب وجودي على الأجواد
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
وجودي على الطيِّب .. وجودي على الأجواد = وجودي على اللي ضيفهم مايملونه
وجودي على شوف السواني وهن رداد = وجودي على شوف البعل يوم يطوونه
وجودي على الشيلات ومشاهد الحصاد = وجودي على طرق الهجيني يشيلونه
وجودي على شوف الحيا والمطر منقاد = وجودي على شوف البدو يوم يتلونه
وجودي على شوف المروبع رفيع عماد = وجودي على شوف المغاتير من دونه
وجود السجين اللي تقيد عليه قياد = فقير ولا له لابةٍ تقضي ديونه
وانا وأحمد الله ماعليَه من الحساد = ولاهمني هرج الردي عميت عيونه
وانا لي مع أهل الطيب مصدر ولي ميراد = وأحب النشاما وأبخص الطيب وشلونه
وأحب الرفيق اللي يسير بلاميعاد = وأحب الشجاع اللي خصومه يهابونه
وأحب الأصيل اللي تقيد بسلم أجداد = يهب الهواء ويزل ماحرك غصونه
ولي منهج ماغيره دام لي مقعاد = يشيب الغراب وطيب الساس ماخونه
ولا أخاوي الا طيبٍ يفتخر بأمجاد = اليا ضاقت الدنيا بالأجواد ينصونه
ولانيب للمقفين تابع ولاطراد = ترى طارد المقفين تسري به جنونه
ولانيب للي صد عني ترى نشاد = ولاأخيل برق لاح في عالي مزونه
ومن زعل مني قلت له منت ابن شداد = ولا انته ذياب اللي بشلفاه يطرونه
وأنا ماأرجي محمد ولاخفت من حماد = ولا قلت وين حمود ياللي تعرفونه
ولاأخلي الدلة على ذمة البراد = وأنا أنقد على اللي طبع الأجداد
وأنا ماأذكر اني كنت شاعر ولاقصاد = لكن الزمن خلاني أقصد مع لحونه
تصبرت لي مدة وأشوف الصبر مافاد = وعزي لمن بيح شقى الوقت مكنونه
ياليت الزمان اللي مضى مرة ينعاد = ياليت الليالي تحفظ العهد وتصونه
أهل العباير لاطرى مامضى وش عاد = زمان السعد لافارق الناس يبكونه
عسى الوقت يصفي والليالي تعود أعياد = يطيب الصويب ويسعف القلب مضنونه
[/poem]
[align=center]::[/align]

[align=center]
::
في رثاء والده الشيخ ابراهيم بن عبد الله
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
ياقبـــر سلم لي على اللي نــزل فيــــك = مـــع النبي الهاشــــمي والصــــــــــحابه
ياابوي ياللي طيـــــــبات ممـاشــــــيك = اسمع ولدك اليوم يكتب جوابـــــــــــــــــه
بجيـــرة الرحمـــــن ياابوي اهــــنــيك = الواحـــــد اللــــــي مايخـــيب الرجــا بـه
ياابوي جعل الغيث يمطــر ويســقـيـك = يرش قبــرك ليـــن يربــــــع جنـــــــــابه
ماعنك خافي كل ما حـــــل طــاريــك = يهــــــل دمعـــي مــثــل وبـل الســـــحابه
وتبكي الحنون وتنتخي بك وترجـــيـك = من لامــــها جعــــــله يضيــــع صــــوابه
وذي بندقك تبــــكي وبشــتك ينـــاديـك = وعلـــيك راعي الطيـــب شــــقـــق ثـيابه
ويبكي عليك العود الازرق ويرثــــيـك = المجـــــلـــس اللي مابـــعـد صـــــــك بــــابــه
وتبكي عصاك اللي وزانك تبـــــاريـك = والدلـــه الصــــفرا وباقــــي زهــــــابـــه
ياابوي ليتك تســــمع اللي يشــــــاكيـك= وتشـــــوف عقبك ماجــرى له وصـــــابه
على النــــعش سجت عيــوني تراعيـك = واشـــــوف قبـــــرك يــــوم هلــــوا ترابه
وشفت النصــــايب فوق قبرك تحجيـك = ياشين هـــــاك اليوم واللـــــي جـــرى به
اقـــفــــوا وانا قلبي من الشوق قافــيـك = اقنــب مـــن الفـــــرقا قــــنيب الذيــــــابه
ياابوي انا لك برفع الصوت وابكيــــك = وقت مضـــى وايــــــــاك لاواسفــــــــابه
لوطالت الايـــــــــــام مانــيب ناســيـك = وشــــــلون ابنسى مـن عــــــطاني شبابه
وياتمير انا عقب احمر العيـــن ماابيـك = تميـــــر عقب العـــــــــود وش ينبــــغابه
لولا رجـــال فيك ماجيت ناصـــــــيـك = اللي لهم عــــــــز وجــــــــلال ومهــــابه
كل يغيـــــــــب ورجـــــعته لك تسليـك = الا طـــــــــريح المــــــــوت يبطي غيـابه
مرحــــــوم يااللي كل الاجـــواد تغليـك = فيك الكـــــــــــرم والجـــــود كل درى به
سبــــــــع سنوات مالقيــــيـــنا مداويـك = عســــــــى لك الجـــــــنه من الـله وهابه
في جنــــــــــة منـــــــزالها عند واليـك = مع النبـــــــــــي الهاشــــــمي والصحابه
[/poem]
[align=center]::[/align]

[align=center]
::
الله على الدنيا
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
البارحه لين اذّن الفجر ياذيب=وانا سهير العين متكدّر البال
في مرقدي واودّي افكار واجيب=ماغير انا والهم رجلي وخيال
اونس بقلبي مثل شلفا تريحيب=اللي مع الشجعان يضرب به امثال
اسري مع الهوجاس وارسل مناديب=والدمع من عيني على الخد همال
ذكرت ابوي اللي غزى عارضه شيب=وجريت في صدري من الضيق موال
وذكرت ربعي كاسبين المواجيب=اهل الوفا والطيب ذربين الافعال
وذكرت سجات القدم والتعاجيب= وسوالف ٍ معهم عريضات وطوال
وطرى علي علوم رد ّ ومكاتيب=وماكل مايطري على البال ينقال
الله على الدنيا تكدّر مشاريب=يوم ٍ على حال ٍ ويوم ٍ على حال
ياليت لي جنحان واطير واغيب= اغيب عن عين المعادي والانذال
نظم ٍ على بالي وقلته بترتيب=والا فانا مالي على الناس مدخال
وياعل قلب ٍ مايقدّر هل الطيب=تومي معاليقه من الجال للجال
ياعل يحتارون فيه الاطابيب=وراعيه يصبح داخل القبر نزال[/poem]
[align=center]::[/align]

[align=center]
::
ربعي تميم أهل الكرم والحمية
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
يابنت كان انك عن الحب تدرين=الحب شر وعلة ٍ باطنيه
وانا بحبك مت ياقرّة العين=مير الله اقوى مالنا قابليه
اصبر على جور الهوى والصبر زين=والحمد للوالي عزومي قويه
عزيز نفس ومن رجال ٍ مسمين=ربعي تميم اهل الكرم والحميه
غيرك بنات ٍ يذبحن المهاوين=يبن وصلي ماتغلن عليه
لكن على الله ياعذاب المحبين=ياعل رب البيت يبلاك فيه
اموت ماقد قلت يابنت تكفين=وعندي على ظلم الغلا مقدريه
وترى الهواويه ضعوف ومساكين=علاجهم ماهوب فـ الصيدليه
علاجهم عند البني المزايين=كم واحد ٍ منهن وطته المنيه[/poem]
[align=center]::[/align]

[align=center]
::
عباس يبكي على شارون
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
عباس يبكي على شارون=وشارون مجرم ومحتالي
ملعون يبكي على ملعون=الاول العن من التالي
قولوا له ان العرب يدرون=والناس ماهم بجهالي
وش ذا البكا جعلك الطاعون=يامال قصاف الاجالي
تبكي على شرذمة صهيون=ياعنك ماانتاب رجالي
اهل فلسطين مايرضون=تبكي على شين الافعالي
اهل فلسطين ينتظرون=تطهير من رجس الانذالي
واهل فلسطين عز وعون=شجعان ورجال وابطالي
والا انت اظنك مثل فرعون=ياالله فزعتك ياالوالي
وياالله عسى من بكا شارون=يموت حسره وغربالي
[/poem]
[align=center]::[/align]

[align=center]
::
أنا مولع من صغر سني بنجم سهيل
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
أنا مولع ٍ من صغر سني بنجـم سهيـل=احبه واحـب اللـي كذلـك يحبونـه
الى اقفى لهيب القيظ واقبل نسيـم الليـل=وراع القنص والطير جـوّد دركسونـه
علـى واردٍ ماحـل عقبـه ولا موديـل=جديد الجيوب اللي من الشرق مضمونـه
الى ريّح الفكس آر وانحى سـواة السيـل=وبسم الله الرحمـن لا عـدّ طبلونـه
مجهّز ومعهم صنعة الروس والدربيـل=وفردٍ الى جـا لازمـه مـا يخلونـه
ومعهم دلال ٍ صفـر فيهـنّ بـنّ وهيـل=وكيفـ ٍ مهيّـل للنشـامـا يصبـونـه
سواليف وعلوم ونشامـا ودبكة خيـل=ونجر ٍ الى جا الضيف قامـوا يدنونـه
شبابٍ على يمنـاه طيـر ٍ يهدّ الحيـل=الى شالوا البرقـع وبالصـوت يدعونـه
ياويل الحبارى منه ويل ٍ رديفه ويـل=الى ذيّرت ثـم شافهـا الطيـر بعيونـه
الا يا معصبة الغتـر ياشبـاب الجيـل=هو اللي يبـي الخـّوه معاكـم تردونـه
ويالايمي مالك على اهل الولـع توكيـل=ومالك ومال اللي شكا الوقـت وطعونـه
عسى لايمي يشكي المرض ويتمنى الشيل=يعجـزون اطبّا المملكـه مـا يداوونـه
على شان يدري ليه انااحب نجـم سهيـل=الاواعـذاب اللـي سـواتـي يحبـونـه[/poem]
[align=center]
[rams]http://www.5ymah.net/rm/ngmshyl.ra[/rams]
للحفظ يمين الماوس حفظ الهدف باسم
::
[/align]

[align=center]
::
أخيل برق ينوض وشاقني نوضه
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
اخيل برق ٍ ينوض وشاقني نوضه=شمال عن ديرة ٍ مانيب راعيها
جعله على تمير ومبايض واهل بوضه=والشعب وام الرجوم يسيل واديها
وسد الشحمه يمتلي وتفيّض فيوضه=لين الزبيدي يذكّر في مفاليها
حتى الارطاوي يسيل وتمتلي الروضه=ويزين مرباعنا ياابوفهد فيها
أمر ٍ من اللي علينا فارض فروضه=احب ذيك الحزوم الشهب واغليها
ياعلّ من لامني يشيل معروضه=يستعطي الناس قاصيها ودانيها
ياعلّ تبلاه يااهل الخير بعوضه=تحتار فيها الاطبا ماتداويها[/poem]
[align=center]::[/align]

[align=center]
::
تكفى يا ابو متعب نبيها طلابة ..انتصاراً لرسول الله صلى الله عليه وسلم
::[/align]
[poem=font="Traditional Arabic,7,sienna,bold,normal" bkcolor="transparent" bkimage="http://r5g.org/up/uploads/050d226961.gif" border="outset,4,sienna" type=2 line=0 align=center use=ex num="0,black"]
ياعل من سب النبي والصحابه= يشوف ماشافوه تبّاعة الفيل
باكر يصب الله عليهم عذابه= ويظلّهم طيرِ مثل طير ابابيل
وتصبح منازلهم هدام وخرابه=ويشفي صدور اهل الصدور المغاليل
اهبوا مربية البقر والكلابه=اهبوا هبيتوا كان ماانتم رجاجيل
شرّابة الوسكي ذبحهم شرابه= حنا دواهم والليالي مقابيل
نبينا دونه اسود الحرابه= مير الخلا يااهل القلوب المهابيل
خان الدنمركي وقرّب ذهابه=ياويله من اهل السيوف المصاقيل
امه تبي تبكي وتنعي شبابه=وعليه عين اخته تبي تسهر الليل
وحياة من نزل علينا كتابه= انّا لها ياقاطعين المواصيل
بقيادة اللي كل مجرم يهابه= العاهل الحلحيل من راس حلحيل
شيخ الشيوخ اللي عزيز جنابه= ابن سعود الوايلي مسرج الخيل
تكفى ياابومتعب نبيها طلابه= نردّها في نحورهم ياملا السيل
نبي نخليهم عشاًَ للذيابه= وحنا هل العادات ذبّاحة الحيل
شعبك يبيها منك ياشيخ ثابه= نقمع بها روس الفتن والاباطيل
الليل والله يحمده من سرى به=وترى الندامه في السهر والتعاليل
وهذا الوطن نبينا في ترابه= وهذا فخرنا ياالقروم المشاكيل
اطهر جسد فـ اطهر ثرى لاغرابه= اليا فزعنا نرهب الجدي وسهيل
فـ قلوبنا محمد وشرعٍ مشى به= حبّه توارثناه جيل بعد جيل
من دونه السيف المذّهب نصابه= ومن دونه ارقاب الرجال المفاتيل
[/poem]
[align=center]::[/align]