رحلتي إلى: تبوك حقل الصمان

السلام عليكم ورحمة الله ...

حيا الله الربع والشباب واللي هم ..

وحياكم في موضوعي المتواضع ...

بداية الفكرة ...
كنا قد اجتمعنا بالصدفة ليلة الاثنين الماضي.. أبوفارس وعمجو ومسخادوف

سوالف وضحك .. شوي وتطري على عمجو قال والله ما تصملون ندز حقل

قلنا قدام والله انت الرخمة لو تهون .. كيف ما كيف قلت يلله روحوا لبيتكم

ابأمركم بعد ربع ساعة ... لقطت العزب القريبة وبعض القشان وخلقين وفروة..

ونحرك من الرياض الساعة 3:30 قبل فجر يوم الأثنين توقفنا في بريدة وصلينا الفجر

وبعد قطع 400 كم توقفنا لتغير القيادة كي اريح لطول الخط ..



خذت لي نومة ساعة لين وصلنا حائل وتوقفنا للافطار فيها ..

ثم مررنا منطقة تسمى ( عقدة ) ووجدنا فيها هالجلسة العجية ..

الموضوعة بالمقلوب ومثبته على حصاة صفاة بجانب الطريق ..

ووضعت السيارة بجانبها وشبة الضو والقدوع والقهوة اللي تحمس

وفشق الشوزن والرشاش والقدر بجانبهم والشجرة فوقهم ..



وهذا الموتر مطربل بشد وتوانك وشنطة ... وخوينا راكب ...



وهذاي الجلسة على جنب توضيحا لكم صورت الهدد جانبا ...



بعدها اتجهنا الى العلا .. حيث مدائن صالح ...



وسكة حديد الحجاز ...




بعدها اتجهنا الى تبوك دعسة وحدة .. خذنا مقاضينا ولحمتنا من الديرة ..

وتوجهنا الى حصاة الأمير .. طبخنا عشانا ثم رقدنا ....




حصاة الامير وتبدو كبيرة ضحى يوم الثلاثاء ..



وبجانبها ما يسمى بـالشقيق ويبعدان عن تبوك مسافة الـ30 او 40 كم



وبعدها توجهنا الى ظباء كي نركب البحر ونصتاد السمك ولكن الجو لم يساعد ..

انطلقنا الى حقل استغلالا للوقت ... ووصلناها قرابة الساعة الـ9 مساء ..

رقدنا وافطرنا على احد شواطيها وكان خاليا ..



بعدها توجهنا الى السفينة الغارقة وتبعد 30 كم عن حقل ..



وكان شاطئ جميل جدا ... ونظيف ..



بعدها توجهنا إلى جبل اللوز لانه ذكر لنا انه نزل فيه الثلج يوم الأحد القريب ..

وللاسف لم نجد شي .. وبعد البحث وجدناه في ظلال الاشجار وبين الاحجار..








بعدها صلينا العصر وتوجهنا الى المدينة المنورة وتبعد قرابة الـ850 كم

دعسة وحدة وصلناها الساعة الواحدة ليلا .. تعشينا من البيك ..

وخرجنا منه الساعة 2 ليلا .. دعسة وحدة حتى رياض الخبراء..

صلينا الفجر فيها ودعسة وحدة حتى مخرج جلاجل

الى بوضاء>مبايض>ابراج الشعب حتى قطعناها الى عرق الكناسية ..

طريق الصمان فيضة ام قرين وما وقفنا الى عند ربعنا الساعة 10 الضحى



تغدينا معهم يوم الخميس .. وامرحنا في فيضة خبزة ...



وفالغد افطرنا ثم اخذنا نتمشى على الفياض حتى توقفنا في هذه الفيضة..







الساعة 10 ضحى يوم الجمعة الموافق 6 ربيع الأول









تقهوينا وريحنا في هالفيضة وكانت رااائعـة خصوصا من وجود الغيم ..

حتى انزال الغيم قرابة الساعة 2 ظهرا طقينا مضلتنا وشلخنا جحيحتنا



ومن بعدها تغدينا ... ثم مشينا متجهين الى القار ....





خرجنا الى الدهنا توقفنا فيب عرق الكناسية قبل المغرب وشربنا لنا بالتين ..

واتجهنا الى بلادنا ...... انتهت الرحلة بسلام ...

تحياتي لكم أبوفارس ..

وعليكم السلام ورحمة الله وبركاته
مشاءالله والله صور في قمة الروعة مثل ماتفضلت المكان عجيب مشاءالله

الله يعطيك العافيه ماقصرت

وحمدالله على السلامة

شاكر لك مرورك يا ذيب ...

وهذا آخر صورة فالدهناء سقطت سهوا ...

أنا أشهد أنك فارس على اسمك ....

ما شاء الله تبارك الله من الرياض إلى أعالي جبل اللوز ...

بصراحة عجزت أعرف طريقكم وتوجهكم ... يعني من الرياض إلى حائل ومن حائل إلى العلا .... ثم رجعتم إلى تبوك ومنها نزلتم إلى ضباء ومامريتوا الديسة غريبة !!!
ومن ضباء إلى حقل ثم رجعتوا إلى جبل اللوز وبعدين إلى المدينة .ثم إلى مفرق جلاجل ووصلتوا لربعكم في أم قرين .... بصراحة عجزت استوعب طريقكم ...

الله يستر عليكم ... الله يستر عليكم ... والحمدلله كنت يوم الاثنين في ينبع ونويت أطق مشوار إلى جبل اللوز يجي له 800 كم ...

الله يعطيك العافية ... والحمدلله على السلامة ...

ماشاء الله تباركـ الله

صور في قمه الروعه يابو فارس
دائما مبدع في تقاريرك يالذيب
لاهنت يالبناخي وبيض الله وجهكـ
والله يوسع صدوركم بالعافيه بس على قولت اخوي المهند عجزت أعرف طريقكم وتوجهكم ...

الله يستر عليكمـ ويستر عليك وعلى مسخادوف و عمجو
ورحلتكم باسميها انا رحله عصر السرعه ماشاء الله تبارك الله

والحمد الله على السلامه.

اخوكـ / ســعـود - ابو علي

شـكــ وبارك الله فيك ـــرا لك ... لك مني أجمل تحية .

رحله رووووعه

ما شاء الله عليك يا ابو فارس من الشمال للغرب والشرق الله لا يضركم

والله رحله قلبه قلبه بس شكلها ما نظمت لكنها جميله وحلوه وما احسن الصدفه اذا جت

مع رجال شرواكم..

تقرير جميل ابو فارس ويعطيك العافيه على هالصور الجميله

الجيب هذا قد شفته بس ما ادري وين!!

تحياتي لك..

المهند ...

شاكر لك مرورك يا ذيب .. ونرت الرحلة بردك الجميل..

وزي ما قلت في بداية الموضوع الرحلة جت صملة وعزيمة أكثر من ما هي متعة وسياحة..

وبالعربي انا اسميها رحلة التقضــــيـــم ...

والديسة وأنا اخوك ملينا منها ولا فيها جديد ..

آمين الله يجزاك خير ...

خلال الثلاث أيام الأولى مشى موتري 4500 كم

وخلال الخمسة ايام كلها مشى 5000 كم

وشاكر لك مرورك يا المهند ...

اقتباس: المشاركة الأصلية كتبت بواسطة طير شلوى    ماشاء الله تباركـ الله صور في قمه الروعه يابو فارس دائما مبدع في تقاريرك يالذيب لاهنت يالبناخي وبيض الله وجهكـ والله يوسع صدوركم بالعافيه بس على قولت اخوي المهند عجزت أعرف طريقكم وتوجهكم ... الله يستر عليكمـ ويستر عليك وعلى مسخادوف و عمجو ورحلتكم باسميها انا رحله عصر السرعه ماشاء الله تبارك الله والحمد الله على السلامه. اخوكـ / ســعـود - ابو علي

الله يسلمك ...

وزي ما قلت انا الدعوة كلن يبي يصير اصمل من الثاني للسفر إلى حقل..

آمين والله يجازك خير ...

وتحياتي لك أبوعلي .. شرفت ///

شكرا ع المرور يا ولد العثمان

ولاهنت :////

اقتباس: المشاركة الأصلية كتبت بواسطة ابوحمد2011    ما شاء الله عليك يا ابو فارس من الشمال للغرب والشرق الله لا يضركم والله رحله قلبه قلبه بس شكلها ما نظمت لكنها جميله وحلوه وما احسن الصدفه اذا جت مع رجال شرواكم.. تقرير جميل ابو فارس ويعطيك العافيه على هالصور الجميله الجيب هذا قد شفته بس ما ادري وين!! تحياتي لك..

آمين الله يجزاك خير

ابد لا نظمت ولاش ..

اي جيب بس .. موتري ولا تقصد الـ جكسار الـ2000

تحياتي لك يا أبو حمد .. ولاهنت يا ذيب ///