الماء والخضرة والعبري .. في أراضي الصمان 28/11/1429

بسم الله الرحمن الرحيم
السلام عليكم ورحمة الله وبركاته
كنا في يوم الاربعاء قد انطلقنا مساءً إلى الأراضي الصمانية ... وبالأخص روضة أم دغيم ... والتي تبعد عن الطريق المسفلت قرابة الثلاثين كيلو ..
وصلنا وقد سبقنا أحد الربع إليها وحجز لنا موقع مناسب ... ولكن بعد فترة قصيرة ... تحولت هذه الروضة إلى حديقة من كثرة العالم وتجمعهم حول بعض ...

لن أطيل عليكم ... ولكن سأترككم مع الصور مع بداية صبيحة الخميس ...

** المعاميل جاهزة ... والموية حارة وكل البرقات تنتظر وش نعطيها ..



** بداية اليوم وحمسة القهوة ... بعدما فقدناها لمدة عام كامل ... هاهي تعود الآن :



** الله يوفقه أخوي أبو حمد ... ينقل الحمسة إلى النجر ... الله يعين اللي نايم في الفيضة ..على دقة النجر..



**ومن النجر إلى أحد البرقات ...



** وبعد الفوحة ... تم نقله إلى الدلة العجوز والتي مضى عليها من العمر سنين عتيا ..



** واجتماع جميل ... وتحلق رائع للتكيف مع قهوة الكيف ...



** يالله كل واحد يأخذ له رشفة قهوة وحبة خلاص..



** نأخذ بكم جولة في اللي حولنا ... إلى أن ينتهي الشباب من القهوة والحليبة ..



** السكك ... مشكلتها مشكلة مع الريضان ... بعض المرات تقول ليتهم مايفتحون الشبك ...



** ماشاء الله ... معنقد عبري هالصمان ... توكم ماشفتو شيء ..



** نلتفت إلى غرف النوم اللي معنا ..صندوق الجمس ..



** هنا الخيام ... أحسن ما فيها تفكك من الطلولة ..وسريعة الفك والتركيب ..



** وهنا اجتمعت خيمة ومفرش الدريويش ... يعني فرن ... ماشاء الله ..



** نسيت أقول لكم كان معنا أحد الذين أزعجوا الكشاته البارح وأزعجنا قبلهم بالبعبعة ... فحكم عليه بالنوم داخل الثلاجة ... ولم يستمتع بما رآه في الليل من خضرة وربيع ..



** يالله نرجع ثاني مرة للشباب ... ونشوف وش عندهم ...



** الله يعطيهم العافية ... تقطيع الكبده وشيئاً من الرجل ..



** وهنا حمسة البصل ... استعداد لقدوم الكبده ..



** ويالله ... بانتظار الإفطار ..وماشاء الله .. تاوه استلنس استيل .. مالها في المقلقل مثيل..



** أفضل شيء أنك تحط الخبز على الفطور ... لايبرد ... سمو.. سمو يالربع ..



** عنقود من العنب ... قصدي من العبري ... بعدما انتقلنا إلى فيضة الحاج ..



** هذي فيضة الحاج تبعد عن أم دغيم ستة كيلو لكنها مافيها إلا جلستين تقريباً .. يعني الناس تدور الونس ..



** الوقوف بروضة صغيرة ... بالقرب من روضة نورة ... وجمع المزيد من العبري .. وتوني أعرف قيمة المداس ... مع شوك السدر المتعوج ..



** يتم ضرب السدرة المليئة بالعبري بعصا ... ويوضع تحتها فرشة بلاستيكية ثم يلقط العبري بأكثر راحة ..



** ثم ينقى من الشوائب اللي فيه من شوك ونحوه ... ويقدم جاهزاً ..



** مدري وشلون غفلت عن الغداء وتصويره ... لكن ماعليه نبي نعوضكم بكرة...
شوية العصر لبعض الطيور .. مع بريق شاي مخدر ..

** ثم انتقلنا إلى حسناء السبق ... وطله ربيعية لهذه الروضة ..

** من داخل الروضة الجميلة ..

** هذا المساء .... وعدنا أخونا أبو حمد بقرص جمر .. يعني فريك بالتمر ... وفي الجانب الآخر أبوعبدالله يأخذ نصيبه من الطحين لإعداد بعضاً من أقراص الصبيب ..

** والآن نبقى وإياكم مع البطه .. تذكرون بطة العام ... هذي مثلها لكن الفرق أن ذيك الفجر وهذي في الليل ..يعني التصوير الله بالخير .. بسم الله ..

** أب ببب ... ما عليه جاء فيها عفطة ...

** وتم التعديل والسمكرة ...ثم الدفن .. بالجمر..

**ومن ثم إخراجه بعد قلبه ... وضربه حتى يسقط كل ماعليه من شوائب..

** وإضافة بعضاً من الزيت ... بعد إضافة التمر ..

** وهنا يتم تحريك الفريك...

** في الجانب الآخر نروح لأبو عبدالله ... ونشوف وش يزين بالطحين اللي خذ ..

** أقراص من الصبيب كادت أن تبعدنا عن فريك أبو حمد ..

** وهنا يقدم الفريك حاراً ..

** وما بقي من الأقراص ...

** أصبحنا وأصبح الملك لله .... صباح جميل في حسناء الصمان ...

** نروح ونشوف وش عند الشباب هالصبحية ...
ماشاء الله ... حمسه ودله ... وحليبه .. اللهم لك الحمد

** ما شاء الله ... اليوم فيها قرصان ... الله يعطيكم العافية ياشباب .. ميزة القرصان أنه يجلس كم يوم ما يتعفن ...

** اللهم لك الحمد ... قبل ما نمشي من الروضة أخذنا كماً وافراً من العبري ...
يالله كل واحد يأخذ له كيس ...

** رديفة حسناء ... واخضرار مطامن الروضة ...

** ريضان البخر ... أجبرتنا على شرب شاي الضحى فيها ..

** والمعذرة ... ما غديناكم أمس ... يالله هذا غداكم ..وترى القصديرة محجوزة لي ..

** تم نقل مرقة اللحمه إلى قدر الرز ... وإضافة الحمسة البصلية ...

** يالله سمو ... يالربع ..

** وهنا روضة أم قرين تودعكم بالماء ...

ختاماً الشباب ما قصروا في التقارير ماشاء الله عن أراضي الصمان وربيعه ... الله يعطيهم العافية .. لكن حبيت أن أشارك فقط ..
أخوكم
المهند
تمير
الرحلة السابقة لنفس المجموعة

الممتع والمتميز الأول في التقارير أبو مهند

لله درك لهذا السرد والوصف اللذي لا يجيده إلا انت فقد عشت وكأنني

بصحبتكم المباركة .. حتى في أسم التقرير انت جذاب .

..
..



من أجمل اللقطات فقد جمعت الخضرة والعبري وأبو مهند
( تصدق أبو مهند ذكرتني بصديق من الامارات على هذه الشخصية )

..
..



لي نصيب أبو مهند من العبري تراني أول واحد رد على تقريرك الذهبي

ماشاء الله عليكم يأهل ديرتي ......... تقرير رااااائع من جد لكن الله يهديكم خلصتوا العبري!!!!!!!!..

اقتباس: المشاركة الأصلية كتبت بواسطة مخاوي تمير    الممتع والمتميز الأول في التقارير أبو مهند لله درك لهذا السرد والوصف اللذي لا يجيده إلا انت فقد عشت وكأنني بصحبتكم المباركة .. حتى في أسم التقرير انت جذاب . .. .. من أجمل اللقطات فقد جمعت الخضرة والعبري وأبو مهند ( تصدق أبو مهند ذكرتني بصديق من الامارات على هذه الشخصية ) .. .. لي نصيب أبو مهند من العبري تراني أول واحد رد على تقريرك الذهبي

أبشر بعزك أخوي أبو عبدالعزيز ... وحضورك وتعليقك زاد هذا الموضوع إشراقاً وتشريفا ..
انتبه تكفى ... ترى فيه بعض الريضان.. العبري فيها مليان من الدود ..ولو أنهم يقولون أنها تنظف البطن ..
حياك الله أخوي مخاوي تمير ... والله لا يهينك على الحضور والمرور ...

اقتباس: المشاركة الأصلية كتبت بواسطة ديرتي    ماشاء الله عليكم يأهل ديرتي ......... تقرير رااااائع من جد لكن الله يهديكم خلصتوا العبري!!!!!!!!..

على فكرة ... العبري يمكن آخر أسبوع له الاسبوع الجاي ... إن كان أنه ما طاح بعد ... البلابل حسبي الله عليها تجرعه جرع .. واحد من البلابل اللي صدت في بطنه ثلاث عبسات ...
حيااك الله أخوي ديرتي ...

ما شاء الله .. رحلة جدا جميلة وبالذات اذا تواجد فيها ابوحمد .. تشدك من أولها لآخرها ..



يا زين البراءه يابوحمد
تقرير جميل و صور ومواقع تفتح النفس وتعدل المزاج .
وهذي صوره الروضه الي قلت لك

اقتباس: المشاركة الأصلية كتبت بواسطة ابوحمد2011    ما شاء الله .. رحلة جدا جميلة وبالذات اذا تواجد فيها ابوحمد .. تشدك من أولها لآخرها .. يا زين البراءه يابوحمد تقرير جميل و صور ومواقع تفتح النفس وتعدل المزاج . وهذي صوره الروضه الي قلت لك

ما يحتاج ... أبو حمد إن لم يكن معك في الرحلة ... فبلاش من الروحة والكشتة ..

ماشاء الله عز الله ربيعها حلو ...ذا الروضة اللي جيتها .. سبحان الله اللي صرفنا عنها ... وصلنا قبلها بخمسة كيلو تقريباً ولكن الأرض تغيرت علينا وآثار الربيع قلت .. ففضلنا الرجوع إلى جو حسناء ...
مشكور أخوي أبوحمد على التواجد والإضافة ..
على طاري اللي قلت لي ... وش رأيك في المطبق :

ما شاء الله عليكم

رحله ولا في الاحلام هذي مع رجال كلهم نعم الرجال

وتقرير راااائع يا المهند

الله يعطيكم العافيه وجزاكم الله خير

يعطيـــــــك العـــــــــــافية يالمهنـــــــــــــد