الــــو مرحبــا ... ممكن مساعده ؟

اذكر يوم اني صغير اني كنت فلتة زماني في مادتي

الإملاء والتعبير ، يعني ما فيه كلمة ما اعرف

اكتبها .. ومرت الايام... وراحت ايام وجت ايام

ودخلت الجامعة ، وفي هذه الاثناء بديت اتعرف على

شي يقال له " كيبورد " وانا من اول ما شفته يعلم الله

اني ما حبيته ... لكن على راي المثل اش حادك

يالمسمار قال المطرقة !

وبديت احس ان هالكيبورد جالس يخرب شي بس

مدري وشهو هالشي مدري .... ومرت الايام(مره
ثانيه ) وقدر الله عليّ وصرت راعي منتديات ( وهي

بالمناسبة توازي من حيث الدلالة على الدشرة كلمة

راعي قهاوي )... وبدت علاقتي في المدعو كيبورد

تزيد وهو يخربني ويدشرني كل يوم اكثر من اللي

قبله ... وفي يوم من الايام ......

اكتشفت الحقيقة المرّة .. ولا عاد دريت وين اودي

وجهي من الناس ... هذه الحقيقة يا محفوظين البقا

والسلامه تكمن في اني ضيعت كل قواعد " وقوائم"

الإملاء !!!!

وخاصة هذين الحرفين التعيسين ( ظ ) و ( ض ) ولا

تهون الهمزات

وصرت مع مرور الايام ما اكتب كلمة فيها حرف من

هالحرفين الا لازم اتصل على اي واحد من اللي يحبون

الستر واسأله ( هي بعصا والابدون ؟؟)

ولكن الموضوع زاد عن حده وصار كل من قابلني

يواسيني ويقترح علي الحلول اشكال والوان ومن

(ضمن) <== الله اعلم بحالها هذه الحلول :

- واحد يقول لي اذا جيت تكتب تخيل انك حجازي

وانطقها بلهجة اهل الحجاز .. واذا نطقتها اقرب

لحرف الدال (د) فهي الله لايعوق بشّر بدون عصا ..

. اما ان كانك نطقتها اقرب لحرف الزاي (ز) فلا فيها

شك انها بعصا !!

ورغم وجاهة هذا الحل الا اني اصلاً ما اعرف اتكلم

بلهجة اهل الحجاز .. وصار الحل اني كلما صرت

اكتب اتصل على زميل لي من اهل مكه واقول له

(اتحداك تقول " ظلام " عشر مرات ) وصرت اغير

الكلمة في كل مرّه حسب الورطه!!!... لين الرجال بدا

يشك في تصرفاتي ولا عاد يرد على مكالماتي

- وواحد يقول لي ما عليك منها اصلاً هذي اللي بدون

عصا ما لها اي لزمه واسفلها اذا جيت تكتب ولا

تعبرها ... لانها حرف زايد ... ويضيف ان العرب ما

استفادوا شي من وجود هذا الحرف في لغتهم الا

التضييق على خلق الله !

- والثاني يقول ابشرك بيخترعون " كيبورد " توصله

باسلاك في جبهتك ( زي حقة تخطيط القلب ) وتصير

تقعد قدام الجهاز وما عليك الا تفكر في الكلام اللي

تبغى تكتبه وهو يكتبه بنفسه وكفى الله المؤمنين شر

القتال !

وصراحة اعجبني الحل الأخير لوجود الامكانيات فان

ا عندي جبهه من الممكن ان اركب فيها برج جوال .

. يعني ما عندي مشكله من هالناحية ،، بس فيه

مشكلتين في هالحل الاولى "انهم" مابعد اخترعوا

هالجهاز .. والثانيه اني فكرت في بعض الناس من

زود الانسانية اللي ماراح يشتغل معهم الجهاز ..

. لأنه يشترط انك تفكر قبل ما تكتب .. يعني تخيلت

واحدن من العيال الله يذكره بالخير موصل الاسلاك في

جبهته ومرتز قدام الجهاز اربع ساعات يبغى يكتب

والجهاز يقول بينه وبين نفسه .. اللهم لك الحمد ..
هذه هي مشكلتي با ختصار ... واللي عنده حل لا يبخل

علينا .. ترى الحال ما يسر

على الهامش .. ( اهداء لتلك الطاوله في تلك الزاويه في ذلك المقهى ) ...

ودنا بالطيب بس الدهر جحـاد طيـب
كل ما تخلص مع الناس كنـك تغشهـا
يدك لامدت وفاء لاتحرى وش تجيـب
كان جاتك سالمه حب يـدك وخشهـا
كل ماشبيت نار المحبـه مـع حبيـب
قام يسحـل فـي مشاهيبهـا ويرشهـا

(مــ ـســ )



وشكرررررررررررررررررررررررررا

انا بعد ماعرف بس لازم قبل اي شي اجيب كلمة ضفدع ......عشان الضاد ..........

والثانيه كلمة ظرف ههههههههههههه غباء شوي هههههههههههههه...........

توضيح اكثر >>>>الضاد اللسان من داخل والظا يطلع ........... هههههههههههههههههههههههههههه

الأخت miss

فكره اللسان منطقيه ولكن لاحظي ان فيه عوامل متداخله بالسالفه مثل حجم اتساع الفم والبراطم .. وعوامل ثانيه مثل ايهم اصلا تنطق ض وايهم تنطق ظ ..

وكلمه ضفدع على سبيل المثال لو تلاحظين اغلبنا ينطقها وكانها تبتدي ب ( ظ ) وليس ال ( ض ) .. يعني اللسان ماعاد يوصل للخشم من مدته

اقتباس: فكره اللسان منطقيه ولكن لاحظي ان فيه عوامل متداخله بالسالفه مثل حجم اتساع الفم والبراطم .. وعوامل ثانيه مثل ايهم اصلا تنطق ض وايهم تنطق ظ .. وكلمه ضفدع على سبيل المثال لو تلاحظين اغلبنا ينطقها وكانها تبتدي ب ( ظ ) وليس ال ( ض ) .. يعني اللسان ماعاد يوصل للخشم من مدته

هههههههههههههههههههههههههههههههههههههههههه........ ......

يقطع بيسك .........

نطق الضاء ضي .........ظا ........

جميل ما طرحت :)

انصحك بالكتابة اولاً في برنامج الورد ، ومن ثم نقل ما كتبت الي المنتديات
سوف تقول ، هناك اخطاء ولكن على الاقل شي احسن من شي .

ثانياً خلك ذكي يـ ذيب ، واذا احد ((( صادكـ ))) في الاملاء قل انا اكتب بسرعة ....

انا استعين بـ اخي الصغير الذي هو الان في الصف الثاني متوسط لمساعدتي في اخطاء الاملاء .

لا تركز يـ رجال اهم شي تكون وصلت الفكره للمتلقي (( تصريفها حلوه )) :)

سلام يـ رئيس

عندنا وعندك خير يا شواق

وكلنا في الهواء سواء هذي الحروف ما نعرف لها لمن نبي نعرف معنى

الكلمه وتوصل المعلومه سواء بعصى او بدون عصى

والله يعين على الاملاء

اخوي بدوي فاهم

هلا بك اخوي السالفه ماهيب سالفه منتديات وبس .. يعني حتى في خطاب ، شي ، صياغه ، خاصه لاصار فيه ناس مخدوعين فيك وعلى بالهم انك ابو العلاء المعري .. ويعدونك مرجع في اللغه وانت بوادي وقواعد اللغه بوادي ..

اخوي المتحد :

هذي مشكلتنا ننظر للدعوى تقزيره ولانبحث عن الدقه وتحريها الا لاصار فيه بحث او خلافه .. يعني انها تضبط معنا من اول شي مستحيل .. لو تلاحظ اخوي المتحد في سوره الفاتحه في اخر الايات قوله تعالي ( وَلاَ الضَّالِّينَ ) ولكن من ينطقها وفق هذا الحرف هم قله حيث اغلب الناس يقرأها ب ( ظــ ) ..

اقتباس: عندنا وعندك خير يا شواق وكلنا في الهواء سواء هذي الحروف ما نعرف لها لمن نبي نعرف معنى الكلمه وتوصل المعلومه سواء بعصى او بدون عصى والله يعين على الاملاء

أنا أحرص على الإملاء ولا أزعم أني ملم بجميع قواعدها لكني مجتهد أصيب وأخطئ

اقتباس: المشاركة الأصلية كتبت بواسطة النجدي    أنا أحرص على الإملاء ولا أزعم أني ملم بجميع قواعدها لكني مجتهد أصيب وأخطئ

فعلاً اخوي النجدي ماشاء الله عليك .. وملاحظ دقتك في الهمزات في الكتابه .. كثير منا يتهاون في الكتابه في المنتديات .. وكان الدقه فقط في المخاطبات الرسميه فقط .. استغرب من كثير من الاصدقاء يسأل عن امور في الاملاء وهو خريج جامعي ويطلب منك تعدل له بعض الكلمات .. والاحظ اغلب الاخطاء في ( الالف الممدوه والمقصوره ) ..