[glow=00FF00][align=center]الشعر ...وعيون البنات
يقول من عدى على روس النايفات
من ضيقة فـ الصدر كانيها وحزتها عصير
يالله يا أعظم من الاسماء واجل الصفات
يالله يالله يا رحيم ويا سميع ويا بصير
يا رب اجرني من عذاب القبر ما بعد الممات
واغفر لابي و أبيه واخوانه واجرهم يا مجير
يا رب انا عبد خلقته من تراب وطيب ذات
و نفخت فيه الروح و انت اللي على ذلك قدير
يا رب انا ما اخترت اكون الشاعر اللي قاسيات
الطرق يطرقها وتصبح له أرق من الحرير
انت الذي خلقت كائن حي غير الكائنات
الحمد لك و الشكر و المنه وخير الله كثير
يا رب انا عبدك و اشيل من الذنوب الكايدات
مالا تشيل الأرض و الدنيا رحاها مستدير
يا رب انا شاعر واهيم بكل وادي من شتات
و اقول مالا افعل و انا مومن ولي قلب وضمير
شاعر و يتبعني من الغاوين كثر الغاويات
اذنب بهم و ان غرروا بي صرت اقل من الغرير
و الشعر مثل السيف ابو حيدين ، وعيون البنات
ياليتها كانت مدى الشاعر ومرساه الأخير
ما كان جبت العيد ..و العذر البنات المترفات
إلين ما صرت الحكم بين المقدي والضرير
البارحه هبت علي الريح من كل الجهات
حتى عرفت ان الليالي غير..والوقفات غير
وقمت اتلفت للسنين اللي غدت مني فوات
و آمنت بان العمر مهما طال في الدنيا قصير
كل يموت وينتهي ..والوقت يمضي هات..هات
ولا عاد يبقى الا الذكر ..و ان كان شر أو كان خير
و الشاعر ابقى بعد موته بالعلوم الطيبات
أو عكسها ..و الموت ياخذ والقصايد تستخير
أقرب مثال اللي لهم في البيت سبع معلقات
راحوا ولا زالت قصايدهم كما البدر المنير
الاعشى و عمرو وطرفه بن العبد والعبسي ثبات
و النابغة وابن ربيعه وابن ابي سلمى زهير
و الشعر فضل شاعره على سواه وله سمات
فضل ابو الطيب وهو شقا ابو فراس أمير
و الشعر مهما فضل الشاعر مقام و درجات
ما فضله بالفعل في اليوم العبوس القمطرير
أقولها و انا اعرف أنها ما تلحفني العباة
اللي طرفها في يدي و اكمامها فـ ايد الوزير
لكن على الله يا متم الصوم ومقيم الصلاة
تدفى الكفوف الباردات ويجبر العظم الكسير
يا صاحبي يا حظي المكتوب يا أغلى الامنيات
يا اجمل الصدفات لو ما جات يا السهل العسير
من صيف عاما ما خذاني عنك بعد ولا سبات
وانت اتجاهلني وانا وضعي من اسبابك خطير
و الحب ذنب ما يكفره التجاهل والسكات
واجه..في بيتك واحسم الموقف يصير اللي يصير
ولا تعلقني على أمل نجوم ساريات
و ابقى على قول العرب : لولا الأمل مات الفقير
يا سيدي يا أغلى السنين الماضيه و المقبلات
يا أعز و اغلى من على الدنيا برجلينه يسير
لا تحسب اني جاله بعض الامور الخافيات
اللي تحدك و انت مالك من مخاليبي مطير
ادري و اقدر و اتحمل و اتحاشى الانفلات
والا تراني في بعض الاحيان ما اطيع الشوير
و الصبر مفتاح الفرج ..والقل جراح اللهات
و سهيل يبدي في السما ..ويهيج في الارض البعير
و انا من اللي مجدهم على ظهور المسرجات
قوم مهي بتشد لا جاها من القوم النذير
وش عادني حي على شانه ووش لي في الحياه
ان كانني لا سرجتها ما فرق الجمع الغفير
لعيون من حبه رسى مرسى الجبال الراسيات
واليا اصطفق ما كنه الا الموج فب البحر الغزير
(منقول) من القصايد اتي اعجبتني لهذا الشاعر الرائع0ابن قضعان000[/align][/glow]
18 / 04 / 2004, 05 : 11 PM
الشعر ...وعيون البنات ........
