من ينصفني من الإتصالات السعودية S T C

السلام عليكم ، كيفكم إنشاء الله تمااااام
هذي مشكلة حصلة لي مع الإتصالات السعودية وحبيت اطرحها هنا في هذا المنتدى ليصل صوتي للمسؤول إنشااااء الله ..

الهاتف الثابت حق بيتنا باقة 30 والـ ( D S L ) سرعة128 والامور مااااشية زي الفل وحصلت المشكلة في يوم الجمعة 1 / 12 / 1432هـ الموافق 28 / 10 /2011م طبعاً أنا من سكان محافظات الرياض ، المهم كنت مسافر للرياض يوم الأربعاء ورجعت يوم الجمعة في الليل وكالعادة أول ما أدخل البيت اجلس اتصفح في النت

فتحت قوقل طلعت لي رسالة خلفيتها شعار الإتصالات السعودية S T C وفي الزاوية فوق على اليسار رقم 4 بالإنجليزي ومكتوب فيها لايمكن تصفح الإنترنت الرجاء الإتصال على خدمة العملاء 906 واتباع نظام الرد الآلي دقيت على خدمة العملاء 906 وقلته المشكلة قال دق على 907 ودقيت عليهم وقلت له المشكلة قالي دق على 906 قلت توني مسكر منهم الآن قال خلك معي على الخط شوي، المهم قال افصل المودم من الكهرب ربع ساعة وتضبط معك أول ما سكرت منه جتني رسالة على جوالي (( لقد تم تفعيل اشتراككم في خدمة باند جود L بسرعة تصل إلى 4096 لهاتفكم رقم ******* )) الكلام هذا يوم الجمعة 1 / 12 /1432هـ

واتصلت عليهم اليوم الثاني 2 / 12 / 1423هـ الموافق 29 / 10 /2011م الساعة 5:17 مساءًوقال لي هذا عرض انت مشترك فيه قلت ما اشتركت في شي قال متأكد انه ما جاك اتصال قلت له ما ادري عن شي وما اتصل علي أحد قال (( كل هذا دون علمي )) قال هذا عرض عندنا بـ 169 ريال مدة سنة ويمسكني مشوار يشرح لي مميزاتها قلت ما ابيها ابي باقتي الأولى ،

المهم سويت عتراض وقال بيتصلون عليك خلال 48 ساعة ما اتصل علي أحد ودقيت على خدمة العملاء 907 وقلت له قلتو بتتصلون علي بخصوص مشكلتي واليوم انتهت الـ 48 ساعة ما اتصل أحد قال لا انتظر 73 ساعة وانتظرت خمسة أيام ما اتصل علي أحد ودقيت ويقول توهـ ماصار شي وإذا دقيت مرة ثانية قالو اتصل بعد ساعة ومرة بعد 72 ساعة ومرة ومرة كل واحد يطلعني مخرج

إلى يوم السبت 29 / 1 / 1433هـ رحت لـمكتب الإشتراكات بين الساعة 1:00 إلى 1:30 وألغيت كل الخدمات اللي على الهاتف المذكور وعطوني رقم الإلغاء وقالي الموظف خلاص من الآن كل الخدمات اللي على التلفون هذا لغيت ، واروح للبيت قلت خل اتأكد ، واتصل على جوالي يدق !! وادق على 907 واسئله وش الباقة اللي عندي ؟ يقول N باند جود قلت توني ملغيها من مكتب الإشتراكات ويقول لي تو ما تقفل الأمر دق بعد عشر دقايق وادق بعد 10 دقايق ويقول تو ما صار شي دق بعد ربع ساعة وادق بعد ربع ساعة ويقول دق ( بعد اربع وعشرين ساعة ثم يقول الساعة 6:00 في نفس المكالمة ) آخر شي دقيت الساعة9:40 في الليل وقال لي تو ما تقفل الأمر وإلى الآن ما صار شي ،، مهزله مابعدها مهزله ومسخرة مابعدها مسخرة.. المهم إلى متى إلى متى إلى متى هذا التلاعب والمماطلة ؟



علماً أن الهواتف الثابتة وضعت من أجل خدمة المواطن والتيسير عليه ورفاهيته ،، وليست بالتلاعب عليه وسلب ما في جيبه ..


الجدير بالذكر أن الأتصالات السعودية S T C بأيسر وبأبسط طريقة تستطيع أن تشترك في خدماتها !! لكن في حال الإلغاء !


لا وألف لا . لازم تتبهذل معهم لين يأخذون منك كمٍ ألف ويفكرون يعتقونك ........




من هذا المنبر المبارك أناشد المسؤولين في الجهات المختصة النظر في هذا التلاعب بالمواطن وإيجاد الحل المناسب والعقاب الرادع للإتصالات السعودية S T C لتكون عبرة لغيرها من الشركات الأخرى "."

ومن ينصفني من الإتصالات السعودية يا هيئة محاربة الفساد ....