بابا بابا // اشتر لي قطوه " مشارك لمجرد المشاركه"

اشتري لك قطوه وش المناسبه وبعدين شريت لك قطوه من اللي بيكد عليها حنا لاقين شئ ناكله حنا يالله نكد عليك تبينا نكد عليها "
وبعدين تعال وش ذا المسكه ؟
ج جواب/ عيال عمي عندهم قطوه وش حليلها منتفشه ماودك الا تتوسدها "
تنط حرمنا المصون من الجهة الاخرى لتقول ولدي مافيه زود عنهم وهذا ولدنا لاتكسر خاطره والا مافيه روحه لعيال عمه مغير يزربونه ويضيقون صديره "
ان قلنا ايه نشبنا وان قلنا لا بلشنا "
هذي خواطر من راسي لمواقف نشوفها دايم "
يجيك الطفل وعمره ماتعدى سبع سنوات يبي جوال كاميره والا يبي لاب توب واذا سألت ابوه قال : وش تبيني اسوي اذا راح لعيال عمه او اخواله كل واحد منهم يامعه جوال او محمول فملزوم اشتري له اللي يبي مافيه زود عنهم "

حبيت بهذه المقدمه آخذ رأيكم حول هذه الظاهره
هل تتوقعون انها ظاهره صحيه و أي شئ مع الغير لازم يكون معي والا بنزعل ونقطع علاقاتنا عشان كماليات ؟؟
وهل الطفل وصل لمرحلة أن يصير معه جوال وهو قدامك 24 ساعه ؟؟
وهل تشوف ان الزيارات بين الاقارب لها تاثير على سلوك طفلك ومتطلباته ؟؟
يعني لو حطك طفلك او احد من اخوانك الصغار في هالموقف وشلون بتكون ردة فعلك ؟؟

ولو قال لك بابا بابا اشتري لي قطوه ؟؟؟
تشتري له والا تمعط لك واحد من الشارع مايندري وش هو من لحيه :)
عاد انت و شطارتك "

بصراحه هذا اللي صاير كل مانشوف شي نبي مثله <<< موب حاله طفرنا

المشكله مو هنا المشكله اذ اعطيته وجه وشريت له وبعد فتره يقولك ابي جوال مثل فلان معه جوال جديد
<<< هذا صدق تغبن

بس عالعموم الدنيا فانيه ونبي نوسع صدورنا ولانقصر ع نفسنا بشي ومحد مدفون معه رياله <<< مسخت السالفه

نسيت ماعلقت ع" القطوه " كل شي الا الحيوانات مااحبها تدخل البيت لان جربت القطوه تحوس وتطمر ع كل شي هذي وهي مو قطوه شوارع <<< ادري طولت السالفه وهي قصيره بس مسكه اليوم معي اتفلفس هع هع

طيب اشتر له جوال بدون شريحة وخله يترزز على كيفه خخخخخخخخخخخخ
أو اشتر له قطو بدون ذنب خخخخخخخخخخخخخخخ

أنا عندي بنتي كل ما شافت صورة التمساح في توقيعك قالت // بابا بابا اشتري لي تمساح . خخخخخخخخخخ

انا اشوف ان الموضوع مهم ويستحق النقاش بجد
هذه الظاهرة يعاني منها اكثر الاباء
ويعاني منها اكثر الابُ الفقير وله اخ غني
فاولاد الغني يملكون مالا يملكه اولاد الفقير من سيارات فارهة وممتلكات شخصية
ومن هنا تأتي معاناة الفقير فأولاده (ذكور واناث) يريدون ان يكونوا مثل ابناء عمهم لا يتميزون عنهم بشي
وهذا ما يجعل الاب الفقير يحتمل الديون ويعيش الكفاف من اجل ان يسعد اولاده ولا يحسسهم بالنقص

مثل هذه الظاهرة يجب ان تحد بحد
فليس كل ما يطلب الولد يعطى وليس كل ما يرى مع ابناء عمه او زملائه او اقرانه يوهب
وفي الوقت نفسه لا يُبخل عليه بما يستحقه او بما لا يضره
يجب ان يكون الوالد حصيف يقدر الامور ويعرف كيف يتصرف مع اولاده

شكرا شر التماسيح على طرح الموضوع

مشكلتنا ومشكلة ربعنا طاحوا في الغاريه والتقليد .. طبعاً الكبار قبل الصغار .. والصغار ما ينلامون إذا صار الكبار أدون منهم ..

يعني تلقى الطفل عنده سيكل .. ثم يجي ولدك ويشغلك يبي سيكل ..

هاليومين طايحين في تجميع الصوص الملون اللي يباع في سوق الحمام بريال ..
بيتي وبيت أخوي وبيت أهلي كلها صوص وريحة هالجريش اللي يأكلن تقطع الكبد ..
والحمدلله جت على صوص ماجت على قطاو بذيك العدة ..
نسيت أقول انتهت موضة الصوص وبلشت به .. لا هو اللي مات وأفتك منه ولا هو اللي قعدت بنتي تلعب بهن .. مالي شغل إلا أتردد عليهن بالماء والأكل ..

شف صورهن يالتمساح ... توني مصورهن على شان هالموضوع الجميل ..

هذا كله زيادة دلع يالتمساح
بعدين وش هالحسي الزين وش هالكلام المنمق وفوق هذا كله اهتمام بالقضايا الاجتماعية.....
بالنسبة للقطوة أو غيرها من الكماليات مثل ماأسلفت زيادة دلع
لكن الجوال ضروري يكون معه جوال
اقصد يكون معه اذا راح لزميله او لمركز صيفي أو للسوق يجيب حاجة أو أي مكان بعيد فيه عن أهله
وبعدها يؤخذ منه الجوال يعني للضرورة فقط فقط... وإن حصل تعطيه الوالده جوالها .
لماذا لا احمي طفلي بهذه التقنية العجيبة فهو طفل معرض لكل شي.
اولاد العم والأقارب عندما يمتلكون شي ليس بحوزت طفلك له أثره نفسياً لكن أجد له البديل النافع
مثلاً شروا له جوال اشتر له دباب لوقت الطلعات أو ساعة ثمينة أو غيرها
المهم في ذلك هو سماع صرير قلمك ياصاحبي

طرح مهم جداً
والله هاذي مشكله انا شخصياً اعاني منها يالتمساح
عندي ملوكي ولدي اذا رآح عند عيال اخوي او عيال اختي او اي قريب له
وشاف شي مو عنده بالبيت انجن جنونه يبي مثلهم يجلس صييييياح ونييييياح
هبل فيني جابلي الصمرقع من حنته وش حيث فلان وفلان ابي مثلهم
البيت مليان العاب واذا طولت عنده يكسرها عشان اجيب له جديده
مستحيل اللعبه تجلس عنده 3 الى 5 ايام جبت له سيكل وخربه
جبت له سياره كبيره على بطاريه وخربها جبت له دباب على بطاريه وخربه
سيكل ثاني وخربه مايبي الشي يطول عنده يبي كل فتره وفتره شي جديد
جت عنده لعبه عجز يكسرها قال هاذي اصليه ورمها بالشارع
حتى اليومين يلمح لي يبي له همر 2011 سياره كبيره وهو توه مابعد درس هع مو صاحي .
وذبحني عند مدري وشي كل يوم جايب لي بلعبه اسمها نبر قوني مدري قبوي
والله مدري وش اسمها بالضبط بس المراد انها تلعب بالعيون وتخربه على قولة كثير من الناس
الله يهدينا وياهم شيبوا فينا ذا الجيل وحنا شباب مدري وش الحل معه ولدي عصبي مرررره
واذا ماجبت له شي قام يحضرم انتم ماتحبوني انا مااحبكم انا بموت اناماابيكم ويطق اخته ويذبحنا بونته ..
قال ابي تلفزيون بغرفتي وجبت له ومع ذالك لايزال حتى هاذه اللحظه يحن علي وش الحل معه ؟؟؟ا
افتوني ماجورين هع

تصدق داخل الموضوع أحسبنك تمزح
مادريت إلا أنك تتكلم على شي واقعي
ويشاهد في كل بيت
إللى على طاري توقيعك وكلام المهند عنه
بنتي أذا شافته تبلشني وتنادي كل إللي حولها
تعالو شوفو هالتمساح يغمض؟

بس بجد مانعيشه الحين هي غيرة الأطفال
وهذا شيئ طبيعي عند كل طفل يتمنا أن يكون
أفضل الناس وأن يملك كل شيئ
..........
وعلى طاري القطوه مره واحدً من علانا جابله قطوتن وش زينها
ولا تاكل إللا تونه وغث أهله كل يوم قوطيين تونه ولا هيب أي تونه
مايعطيها إللا جيتا عرفتها ذيك الغاليه
قلت دواه عندي وأحط لهالقطو فخذ دجاجه في خيشه
ويدخل في وسط هالخيشه وأربط عليه
وأنطلق به لمزارع أبا خسيفه قلت معاد هوب جاي الفكه
يوم خذت أسبوع إللى جابهله وأحدً من هالملاقيف
قلت وش الحل معه ماي إللا أقلعه ور السريع ذا
عاد الملعون عرف أني أبنطله يالله صده
وأوصي الخدامه وتلاحقه حول أسبوع كامل
يو صادته جت بابا أنا يمسك قطو
وسيده للعتش وعقبها الحمد لله معاد شفناه
.........
والله يسالفة القطو ذا سالفه

عزيزي شر التماسيح
كلامك صحيح مو ع الاطفال وبس
مشكلة الغاريه وتقليد الغير في كل شي
احيانا مانلومهم ان صار شي معقول
ولكن اللوم ان صار شي فوق طاقة الرجل
او ان الوضع لايسمح للطفل بذلك الشي
لاننا نرا بعض الاطفال وليس الكبار يستخدم ذلك الشي في امور غير حسنه

لك ودي