رُكْن النهاية

خطو الرخوم مصاحبين الخيابه
تجار هرج.. وباللوازم كراسيع

الرجل مثل الذيب رزقه نهابه
يأخذ مع الدوّ الخلاوي قراطيع

والطيب ضلعن زامياتن هضابه
للريح في شامخ ركونه ذعاذيع

عسر المراقي يتعب اللي رقابه
ما يا كره كود الحرار القواطيع

والاّ الردى.. جرفٍ هيالٍ ترابه
حوله لزهران المقافي مرابيع

يرقد به الحصني ويلقا الذرابه
والبوم بين غصون قشعه مواقيع

رجلٍ على الناموس بيضٍ ثيابه
ورجلٍ يرقعها على المتن ترقيع

ورجلٍ يزايم علّته من عذابه
عيدان ناره للقريّب مواليع

على الجماعة كل يومٍ طلابه
خماش وجه ولا لقي به منافيع

ورجلٍ مع الأيام ما ينصخا به
عز الرفيق إليا صفعته صوافيع

غيثٍ على من جاه يمطر سحابه
عشبه على روس النوابي مفاقيع

ورجلٍ سوات الليث عطبٍ صوابه
من دون حقّه سنّع الخصم تسنيع

طيّب وعصمان الشوارب تهابه
يرجا وتخشاه الرجال الصعاصيع

ومن لا درى بالناس محدن درابه
ما له على سجل النشاما تواقيع

ومن لا يحوش النعم.. بأوّل شبابه
في شيبته يحسب حساب الرواضيع

وختامها ذكر النبي والصحابه
واستغفر اللي ما يضيّع ولا يضيع

قمة الابداع
:
انا مجموعة ايام ٍ قليله في حساب الكون
مضى منها الكثير ولا بقى الاّ بعض الايامي

احسبها براسي في الخفا والناس مايدرون
واقول الصبح كل اللي وراي القاه قدامي

يدخلني خيال الذاكره في كهوف نابليون
واعوّد مامعي غير الصور من زيف الاحلامي

لو انه صدق للحيطان آذان .. وللشباك عيون
تحطمت المراكب في مواني بحر الاوهامي

عدم فهمك .. يجيب لك الطفش ويثوّر القولون
وفهمك للحياه يوصلك للسلم السامي

ادرجها كذا بالعافيه .. مع عالم ٍ يمشون
تدامى في المضيق متونهم وكعوب الاقدامي

عساني في النهايه لاوقفت الموقف المضمون
على ماطى قدم صفوة قريش .. ودين الإسلامي
امين

لوجمعت الاذكياء كلهم .. والاغبياء
وانت ميزان العداله يدينك كفّتين

ماقدرت تحقق العدل بين الاشقياء
لليسار اصحاب تقصر.. عن اصحاب اليمين

تنطفي شمس الحقيقه بسجن الابرياء
عند من ينظر بعين ٍ فقط .. ويصرّ .. عين

تحت خط الفقر ناس ٍ يعيشون اغنياء
ينعمون بعزة النفس بين العالمين

في تعففهم .. تجلى شموخ الاقوياء
وفي مهابتهم .. رموز التغطرس.. صاغرين

الثريّ اللي تحيط بثراه الكبرياء
ممتل ٍ مخباه ويقدّ من سير ٍ متين

مايساوي عندهم حرف شين .. وحرف ياء
يعتبر في حكمهم صنف.. قبل ( الضآ لّين )

طلبة الله طلبة ٍ مادخل فيها رياء
في محبّة خاتم الانبياء والمرسلين

حط الكـلام اللـي يهمـك بصنـدوق
اقفـل عليـه وباقـي الهـرج لابــاس

سرك اليا ابديتـه علـى اعـز مخلـوق
بكره يسولف به عليـك امحـق النـاس

وأحذر تصاحب لك من الناس مطفـوق
هماز فـي اعـراض الاجاويـد هـلاس

ارفع مقامك عـن مقـام الدنـي فـوق
وتلقـا مـع الربـع المطاليـق مجـلاس

وأحرص على قرب ارجح(ن) طيّب عموق
ان جمـلـك وإلا مـخـاواه نـومـاس

واليـا بنيـت فسيـس البنـي بوثـوق
احفظ مواثيقك تـرى العـرق دسـاس


الحر يبـدي فـي حجـا كـل شاهـوق
والبوم تلقـى لـه بألانقـاض مدعـاس

واليا هرجت فخـل هرجتـك برفـوق
اقصر عن اللي لاهـرج يمـرس امـراس


وأصفح بحلمـك عـن مداريـق داروق
وأيـاك تطـرد كلمـةٍ مالهـا ســاس

ترى سكاريـب السلـع مالهـا سـوق
ولايستـوي قـدر الكراعيـن والـراس

وإليا جفاك الدار مالك وما به
رزقك على اللي طوّع الكون تطويع

ممشاك في حزمٍ تطارد سرابه
أخير من شوف الوجيه المدانيع