نسائم نسيم

اقتباس: المشاركة الأصلية كتبت بواسطة سمو الأمير    ياهلا والله بهالطلة طبت وطاب ممشاك يانسيم ، والله لك وحشة يالذيب مشتاقين لسواليف وعلومك وخصوصا وقت الشتاء ووقت النشرات ..

هلابك سمو الامير وانا والله مشتاق لكن ظروفي الايام هذي حكمتني وربطتني ومثلكم تعرفون وتقدرون.
ابشر بالخير ان شاء الله وتبي تملون من الامطار بحول اللي ماتنام عينه.

اقتباس: المشاركة الأصلية كتبت بواسطة شر التماسيح    على فكره تراني فاقدك من زمان بس مالقيت فرصه افقدك فيها والعذر والسموحه توني افقدك خخخخخخخخخ

لاتحلف مصدقك .

اقتباس: المشاركة الأصلية كتبت بواسطة لميس    مبروك الزواج ومنك المال ومنها العيال متاآبعه لمدونتك اليوم وكل يوم من جد آستمتعت ونا آتصفحها ودي لك يالطيب :)

الله يبارك فيك ويخليك ان شاء الله ويجزاك خير وعقبال الجميع ان شاء الله مثنا وثلاث ورباع

مساء الخير جميعا وان شاء الله ان الجميع بخير.
اليوم راح نتكلم عن الزواج سابقا والحركات اللي تكون فيه كا بداية خطبة ومحاولة الاقتراب لاهل الفتاة اللي يبيها ويريد ان يرتبط بها وهي حركات مكشوفه اي مناورة واضحه للجميع، بعكس اليوم ما ندري الا فلان معرس بفلانه لا حس ولا برق ولا رعد.
وايضا فيه نقطة مهمة اللي هي الظفر بالفتاة الجميلة وهذي حظوظ من الله ووهايب تلقى اللي يبي حرمة مزيونه وهو رجال فيه خير ما ياخذ الا حرمة مبروكة حال يعني مثل الحريم اللي انتم خابرين مافيها زود،واللي يجيك فيه صح والا هبال تلقاه ماخذ ازين الحريم .شي من الله فيه حكمه وانتم شهود الله في ارضه تفكروا في اللي حولكم وتعرفون مصداقية كلامي.
على العموم هذي رؤس اقلام ونبي نفصلها لكم بحول الله تعالى.

يبيعون ما باعوا ويشرون ما شروا=ولا غبـن الاّ بالنضـا والحلايـل

يقول راشد الخلاوي في ابيات له ان الغبن لايكون الا في ثنتين
الابل اللي هي النضا والحريم الزينه اللي هي الحلايل.
يعني تشتري جيب فكسار والا تبيع لكزس والا ددسن هذي كلها ماتهم ولا تحس الرجال ابد لكن الحريم هي اللي تغبن الرجال.لكن يجي واحد راكب جمس والا يوكن والا شاص والا شاري عمارة كل هذي خرطي مافيه مثل الحريم ابد .

انا استغرب من الواحد اللي ميسر عليه ولا يتزوج!!!!!!!!!
يجي مرة راكب جيب ومرة موتر مدري وشو!!!!!!!!!!بالله السيارة مثل الحرمة؟
ياخوي مقابل الحرمة الزينه اللي ريح نفسها كنه عود كمبودي والله انه ابرك من ملايين الدنيا ،لكن راكب موتر جديد !!!!!!الحمدلله رب العالمين.

نبي نرجع للموضوع الاساس لكن ماذكر شي نفسي وتفاعلات من تصرفات ناس كثير حول عدم التفكير في الزواج وتكراره .

منول اذا بغينا نخطب من ال فلان من الناس نقعد نمهد للخطبة وشلون؟
نمر العود ونسلم عليه وبعض الفروض نصلي في مسجدهم واذا شفنا العود قمزنا وحبينا راسه واذا قال اقلط لين حنا وراه ونقعد نتقرب منهم ونصاحب العيال ونخدمهم واذا بغوا يشيلون شي جينا كن حنا عمال ونودي الغاز حتى اذا اردنا نفاتحهم في الموضوع بعد فترة ستة اشهر كرف وشيل وحط مايقولون نبي ننشد عنك اعتبر عندهم مثل وليدهم (ولدهم) وعاد الجيران والجماعة يعرفون وش نيتي ناوي اخطب مكشوفه الحركة .بس الموت الى من قالوا لا والله يلاجودي الله يستر عليك!!!!
لكن اليوم مافيه تخطيط ولا فيه عملية احماء على طول هجوم !!!تلقى الامور تعسر ويطردون ناس فيهم خير واجواد بسبب السؤال يروحون ينشدون عنه واول ماينشدون هو يصلي في المسجد؟
هو يصلي الفجر؟يعني يعسرونها بالحيل شاب وطيب لكن هو يصلي !!!طبيعي يصلي بس يجي الواحد قصور شوي ومع الوقت يتقدم للافضل.
صراحة بعض الاسئلة مالها داعي واذا نشدت عنه لا تكثر بالحيل ماتخلي ولا واحد ماتنشده في حارتهم لان هذا يعتبر تشهر وليتك الي منك نشدت عنه تزوجه !!تطرده وتفشله لان الناس تبي تتابع موضوع فلان لان جايهم شايب محني لحيته ومسواكه شبر ويحقق في موضوع هالشاب اللي وده يعرس ونشبك وشهرت به وطردته ليتك زوجته .واهل الحارة عاد فلان خطب من فلان وطرده وصار عنده عقده ويقول ليتني مافكرت في العرس .

يسلمك ربي على هالسوالف
بس عساك منتب من إللي كرفو وقالو لهم توكل على الله يالأجودي ماعندنا لك شيئ؟

بسم الله عليك يا نسيم ... شفيك عسى ما شر !!

الوكاد أنك مصاب بعين

إنسان مزواج و مستانس وغيرك ما يقدر !!

وتدعو وبقوه للتعدد وما تدري أنك تفتح على نفسك أبواب لا تقفل

تخسر المعجبات وتثير الحساد

و لا سمح الله تكرهك حريم المنتدى ويغار منك رجاله ..

وتفتح العيون عليك

فخلك مبسوط مع حريمك <<<< الا على فكره كم وصل العدد !!

وداري على شمعتك يا ولد العم ...