بابا بابا // اشتر لي قطوه " مشارك لمجرد المشاركه"

أخي الفاضل التمساح موضوع قيم سأتكلم عن هذا الموضوع من واقع تجربه شخصيه نحن في مجتمع يتطور بصوره سريعه ومتطلبات الحياه الاساسيه تكاد لا تنتهي
لذالك علينا تربيه ابناءنا على القناعه والاكتفاء بما هو مقدور عليه وضروري وماهم في حاجه اليه للآسف نرى من هم حولنا اجتهدو في المنافسه
من الافضل ياليت بالدين او الدارسه او السباق الي عمل الخير للآسف لمن يمتلك جهاز لاب توب او بلاك بيري
اصبحت مفخره ياليت عند الصغار كان ماعليهم شرهه بل اصبحت عند الكبار اسأل الله لنا صلاح النيه والذريه
ومن تجربه انا ام لولدين ولدي قاعده ثابته دائما أقول لازم تتعبون علشان تحصلون علي الشئ الى تبونه مافيه شئ يجي بالساهل
(سويت مسابقه وحطيت مقياس اللي يحافظ على الصلاه ويحافظ على الوجبات المدرسيه تكون الجائزه من نصيبه شريت لكل واحد حصاله وقلت كل يوم اعطيك مصروف واخر الشهر اعطي المستحق جائزته وأنت بكيفك اشتر الشئ اللي يعجبك )
حسيت بهالطريقه ان الاشياء اللي يشترونها من مصروفهم لها طعم خاص وانا ماعندي اي ماانع يشترون اللي يبونه من مصروفهم الشخصي
ولله الحمد ما اجمل ان تجني الثمار وانا لست مع اللذي يقول دائم الله مقدرنا بشتري لهم اللي يبونه لازم يحسون بالمسؤليه وان الفلوس ماتجي بالساهل لازم يتربون على تقدير ظروف والديهم تلاقي بعض الابوان يتسلف علشان يشتري لاب توب او قيم بوي لولده؟؟؟
والله لا يهينك مع فائق احترامي وتقديري وفالك التوفيق

يشين التقليد
ماذبحنا الا هو
كلش نبي نقلده احيانا تلاقي الطفل معجب بابو الجيران ويقول لمه خلي نبدل ابوي ونجيب مثل ابوالجيران
وش رايك في التقليد نطيع الطفل ولا لا

اقتباس: المشاركة الأصلية كتبت بواسطة الموادع    طرح مهم جداً والله هاذي مشكله انا شخصياً اعاني منها يالتمساح عندي ملوكي ولدي اذا رآح عند عيال اخوي او عيال اختي او اي قريب له وشاف شي مو عنده بالبيت انجن جنونه يبي مثلهم يجلس صييييياح ونييييياح هبل فيني جابلي الصمرقع من حنته وش حيث فلان وفلان ابي مثلهم البيت مليان العاب واذا طولت عنده يكسرها عشان اجيب له جديده مستحيل اللعبه تجلس عنده 3 الى 5 ايام جبت له سيكل وخربه جبت له سياره كبيره على بطاريه وخربها جبت له دباب على بطاريه وخربه سيكل ثاني وخربه مايبي الشي يطول عنده يبي كل فتره وفتره شي جديد جت عنده لعبه عجز يكسرها قال هاذي اصليه ورمها بالشارع حتى اليومين يلمح لي يبي له همر 2011 سياره كبيره وهو توه مابعد درس هع مو صاحي . وذبحني عند مدري وشي كل يوم جايب لي بلعبه اسمها نبر قوني مدري قبوي والله مدري وش اسمها بالضبط بس المراد انها تلعب بالعيون وتخربه على قولة كثير من الناس الله يهدينا وياهم شيبوا فينا ذا الجيل وحنا شباب مدري وش الحل معه ولدي عصبي مرررره واذا ماجبت له شي قام يحضرم انتم ماتحبوني انا مااحبكم انا بموت اناماابيكم ويطق اخته ويذبحنا بونته .. قال ابي تلفزيون بغرفتي وجبت له ومع ذالك لايزال حتى هاذه اللحظه يحن علي وش الحل معه ؟؟؟ا افتوني ماجورين هع

بالنسبه لك اخي الكريم يمكن ابنك من النوع الي يصيح ويعصب علشان يحصل على الي يبي
يعني اذا قام يصارخ تعطونه طلبه عشان ماينفعل ولا عشان ترتاحون منه هو في هالحاله
تأكد ان هذي هي الوسيله لتنفيذ طلباته وايقتن انه اذا صارخ ماراح يعاقب بل بالعكس سيقال له سمعاً وطاعه
اسمح لي ان اقول لك اعمل العكس اذا شفته عصب قل له كنت ناوي اجيب لك الي تبي لكن يوم شفتك رفعت صوتك
راح احرمك من هالشيء ..
او مثلآطلع اخوانه وخله بالبيت وناقشه وفهمه السبب انه كثير الحنه مره مرتين وبعدها بيقتنع
ويدري انه لو بيصيح من هناا لبكره ماراح تشتري له شيء الا ضروري او انت مقتنع فيه ..
وهذاا من واقع تجربتي بس يبي لهاا بال طويل وسعت صدر
والله الله بالدعاء ثم الدعاء ثم الدعاء لهم بالصلآح
والله يصلح لنا النيه والذريه ..
واسمح لي على المداخله ..

يااهي ظهاآآرة منتشرة التقليد وما ادرك ماالتقليد

وش حيثهم والحن ماتحبونا هم اهلهم يعطونهم واحنا لا

مع اننا لم نقصر عليهم لكن التقليد الاعمى ذبحنا

والغلطان الي يشتري لعيالة كل ما قالو نبي

اكبر غلط

صحيح الاطفال لازم يكأفون اذا اشتهدو في عمل ماء
بس ما توصل نشتري لة قطو يالله نربي عيالنا وناكلهم

نربي قطو ونصرف علية

طرح ممتع""

اقتباس: المشاركة الأصلية كتبت بواسطة جار القمر    انا اشوف ان الموضوع مهم ويستحق النقاش بجد هذه الظاهرة يعاني منها اكثر الاباء ويعاني منها اكثر الابُ الفقير وله اخ غني فاولاد الغني يملكون مالا يملكه اولاد الفقير من سيارات فارهة وممتلكات شخصية ومن هنا تأتي معاناة الفقير فأولاده (ذكور واناث) يريدون ان يكونوا مثل ابناء عمهم لا يتميزون عنهم بشي وهذا ما يجعل الاب الفقير يحتمل الديون ويعيش الكفاف من اجل ان يسعد اولاده ولا يحسسهم بالنقص مثل هذه الظاهرة يجب ان تحد بحد فليس كل ما يطلب الولد يعطى وليس كل ما يرى مع ابناء عمه او زملائه او اقرانه يوهب وفي الوقت نفسه لا يُبخل عليه بما يستحقه او بما لا يضره يجب ان يكون الوالد حصيف يقدر الامور ويعرف كيف يتصرف مع اولاده شكرا شر التماسيح على طرح الموضوع

انت حطيت يدك على الجرح وهذا اللي كنت ابوصل له وهي الفروقات الاجتماعيه من الناحيه الماديه
ويمكن تكون سبب في القطيعه وقلة الزياره بين الاقارب لتفادي الطلبات ووجع الراس
لك مني احلى ورده

موضوع جميل يالتمساح واعجبني بس بصراحة
يعني بجد هذي مشكله مثل يطلع بالشارع او عند اقاربه
وكلن معه جوال او لاب توب ويعايرونه انت مامعك وانت مامعك
فلهذا الاب يرحمه ويقوم يجيب له جوال هذا المشكله
وغير كذا اذا كان الولد فقير واقرباة تجار فالولد يشوف معهم اشياء
ماهي معه ويقول لابوة ابي مثلهم وابوة حالته الماديه ماتسعد
تبي الجد مهنا حل واشتر له ووسع صدرة ياخوك الدنيا فانيه هههههه
هذا ريي ومشكور على الموضوع,,,

اول شي اشكرك على هالموضوع الرائع

بصراحه من ناحية هالظاهره فهي منتشره

لدرجة انك ماتستنكر لو شفت بزر توه مابعد فتح ماشي والجوال بيده

وصارو بعض الاهل يتفيخرون عند بعضهم بهالامور

اللي بتودي بزارينهم ورى الشمس

والدنيا صار خوفها اشد من اول

طلعت بلاوي ومصايب الله يحفظنا وياكم

بس عاد وش تقول غير الشكوى لله

وعلى طاري القطوه مابزينا بزارينا

نبزى هاالحيوانات

ماغير خساير وقذاره وقلة حياء

وان قال ولدي ابيها بعطيه ذيك النزره

واسكته بشين ثاني ماتعوق
وبعدين ياخوك ان قلنا قلان وعلان
عز الله ماعشنا ..

موضوع يستحق التقييم فعلا هذا اللي صاير في مجتمعنا كل واحد منا اذ شاف شي اعجبه ابلش اهله الين يعطونه لا والمصيبه الكبرى موب لاب توب والا جوال الحين يبون سياره لا وسياره جديده فك وكاله مايبون مستعمل 'اجل ولدعمي يشتري سياره كشخه وانا لا ومثل ماقلت تدخل الحرم المصون وتقول ولدعمنا موب احسن من ولدي اشترله سياره 'لا وتلقى الولد مابعد تعدى العشرين هذي مداخله' ليش احنا من علمهم على القناعه فان القناعة كنز لايفنى مافيه احسن من القناعه ليش من علمهم على ان الواحد منا مايحصل على شي الا بتعبه ولله انه يحس بقيمة الشي وصراحة حرام بعض الناس مايقدر يشتري الجوال لولده موب هذا يسمى كسر لعيون الفقراء شكرا اخوي على هذا الطرح الرااااااااااااااااااااااائع تحياتي

السلام عليكم ورحمة الله وبركآته

المشكلة الكبرى بزمننا هذا أصبح للآطفال طموح أكبر
فـ لم ُيعد يختصر على لعبة او غيرهآ بل آصبح طموحهمُ جوآل ولآ بتوب ولاتستغرب يوماً أن جاء آبن العشر سنواتِ
وقال لي بابا اشتر لي سيارة .!!
هنا تكمنْ المشكلة الحقيقة في الأهل لانهمُ آصبحوا لآ يردونْ اي طلب لآبنائهمُ مهما كانت عديمة الفائدة
ولسان حالهُم خلوهم يتمتعونْ بحياتهُم
هل نحنْ وانت َلمُ نتمتع بحياتنا ولُم تكن لدينا متوفره كل هـ الآشياء وكانت حياتنا أجمل وآطعم ؛





كل الشكرْ وبـ التوفيق لك