زواج ابو برغش اضحك حتى تتعب

05 / 11 / 2009, 18 : 10 PM

ههههههههههههههههههههه

انتبه لاينطلق فيك عرق
انا ابو برغش
جامعي ووسيم…. و الناس يدلعوني ويقولون لي محيميد… وانا اسمي الحقيقي عبدالرحمن… ماعلينا توضفت كيتب وقررت الوالده الله يخليها ويعافيها ويشفيها ان تدمر حياتي وتزوجني… و تم التعميم على الطلب وتم الاستنفار الين لقو ذيك البنت الي تقول للقمر قم جعلك القامه عن محلي … و شوقتني اميمتي من كثر الحتسي عنها … وتمت الخطبه وكلفني الزواج 200الف ريال…. تهون لعيون القمر… وفي ليلة العرس كنت مشتاق للقمر… يوم دخلوني عليها وفتشتها لقيت ذاك المهرج الي صابغ خشته (براطمه) باحمر.. وذاك الوجه الي كل بقعه منه لها لون … وانا اكرها ضحكه وقلت لهم حلوه هالحركه …طيب وين امرتي .. ردت علي هي بكل رومانسيه وحب اطعنه ماشفتني…. ووقفت امي وقالت هذي هي امرتك ..و اصفريت ذاك اليوم من الفرحة (ايه هين)؟

…وكل الي في بالي ال200 الف الي طارت في الهوا…..يوم صحيت ناديت امي …وقلت لها هذي هي امرتي… قالت ايه ياوليدي هذي ازين وحده شفتها …ومن يومها وانا عارف ليش احنا اكثر رجال العالم اصابه بالسكر والضغط

…
ماعلينا المهم قالو لي لبسا الذهب وهي الي تمد ذيك اليد الشهبا اللهبا اللي ذابحها المشق وانا البسها المغاوش… لا وزيدكم من الشعر بيت صبت يديها دم يمكن من المشق… وجت الطامه يوم قالو لبسها الرشرش المهم وقفت بمعجزه يوم جيت عند رقبتها … قلت هوني ماازنطها وافتك واعيش في السجن اريح وبعد تفكير لبستها الرشرش … وفرح القمل به وحولوا يلعبون عليه ….و صقيت الطمه وقلت لها تراي قدامتس في السياره … ومن زينها متطوره يوم وصلت السياره وقفت تبيني اهج لها الباب … وانا الي انزل القزازه واقول لها ترا اما ركبتي سريت … وركبت وهي مستحيه وانا افكر هوني ما اصدم بالسياره من الجهه اللي لمها وافتك منها…. او اوقف جنب فتحة بياره واقول لها حولي …او افتح الباب واذبها وانا مسرع … وانا افكر مادريت الا وانا عند بابنا … وحولت وقلت لها الحقيني … وماامداني افتح باب البيت الا وهي واقفة قبالي … قلت لها ادخلي …. وهي داخله رقعت بالباب على يدها يعنني مادريت وقالت آي يعني اني حرمه وصب دم منها … وانا اللي اركض واجيب قطن وامسح الدم اللي على الباب …. واشوى انه ماانعفط ….ورقينا للغرفة وانا اللي انسدح فوق السرير وانوم ذيك النومه …. ويوم قمت الين قضاي قدامي …. لا وتقول لي وراك نمت فبلش تراي لابسةً هالخشاشه علشانك …تعال شف دراريعي اللي انا مخيطه …. ورتني ذيك الخلاقين (مع المعذره لأحلام) الي تقول كلفت 25الف ريال ….وانا افكر انشاالله اني من اهل الجنه لان البلاوي ماتنزل الا بالصالحين…. والحرمه مهيب تستحي وقفت قدامي وهي فاتحة ثمها…. قلت لها غطي هالبياره والا طلعت …. قالت وشفيك ماتبي تشوفني ماعجبتك شف براطمي وخدودي ووعيوني ….. وبيني وبينكم الحرمه ماعليه تصلح لكل شي الا انها تكون حرمه …. وقعدت تسولف تقول وين بتوديني …. قلت لها لبيت اهلك … وحمقت وتغيير وجهها وقالت ليش …. ورحمتها وقلت علشان نسلم على اهلك … قبل نطس نسافر …..قالت بتعطي امي الفتاشه اليوم…. قلت وشي فتاشته مايكفي المصيبة اللي انا فيها …. رحت ودخلنا بيتهم وجت امها وعطيتها الفتاشه وفتشت وصارت من نفس الفصيله … و سالتها وين ابوتس قالت مرتفع عليه السكر ونايم قلت ماالومه ….

المهم يوم عطيت امها الفتاشه اللي مالها داعي …. والمفروض انها هي الي تعطيني اياها… و رحنا للبيت ويوم وصلنا رقينا لغرفتنا وكنا في البرد وانا عرقان مدري ليش؟؟؟… يمكن خايف منها بتستفرد بي…. و بعد مارقينا رقعت هي بالباب وهي تناضرني على بالها نضره رومنسيه والله نظرة عزرائيل رومانسيه اكثر منها…. و لبست خشاشتها الدعمى على بالها اني خلاص رحت وطي…. وطلعت ذاك الساق الي مايوضح لونه من كثر الشعر…. وجت وقعدت جمبي ….وقعدت تدق الديرمه على ذيك البراطم وما تذكرة الا اهل العرظه وطبولهم… وكان فوق خشمي ذباب يوم رفعت يدها طلعت روايح مدري وينها منه يمكن من ابطها… المهم ان الذباب اللي على خشمي مات ….وانا دخت وطحت على السرير مادريت الا وهي تصحيني الصبح قم فمصع (تمزح)…. لاتفوتنا الطياره وانا اللي اقمز بسرعة والبس هدومي …. واصرخ عليها بسرعه ماباقي الا ساعه على الطياره … وبصراحه انا حالم في اليل ان الطياره طاحت بنا… وحلمي دايم يتحقق … علشان كذا خفت تفوتني الطياره … وانا اللي اكفخ بالسياره امشي الطبلون ….وادعي يارب نصدم يارب نصدم ….وهي تغني( ماكو مكا ماكو فكه) فرحانه بتركب الطياره … وصلنا المطار …. وحولنا و سبقتني على بالها دالة المطار … و يوم جينا ندخل دخلت هي مع باب الخروج … والغريبه انه انفتح لها ؟… قلت خل اجرب يوم رحت لمه ما انفتح ؟ … يمكن الباب خايف تلمسه بيدها الممشقه …لا ونسيت اذكركم لابسه نقاب ابو خفسين …. والبزران ورانا بو بو ماادري وش قصدهم ؟… و ركبنا الطياره وصارت مهيب جنبي …والمظيف يقول لا تخاف بنجيبها جنبك بعد مايكتمل العدد… وانا اقول عادي عادي مهيب مشكله …. ويقعدوني جنب ذيك الشقحا المقحا(مدري وش معناها)…. لا وسوريه ( شفايف وخدود ونعومه وجمال )…. مهوب مثل الرجال اللي معي …. و مادريت الا المظيف جاي ويقول تفضل جنب المدام بتعتك … وانا اللي تطقني ام الركب ومعاد قويت اقوم …قام المظيف ونادى مظيف ثاني وسندوني وحطوني جنب قدري ….و تو الطياره طايره الا وها القرويه تطرش علينا … انا لله وانا اليه راجعون وش السوات …. هوني ما ازنطها وافتك منها … لكن الحمدلله انها طرشت في الكيس ….و يوم التفت ادور المظيف اليين ذاك المصري الملقوف… يقولي مبروك ؟… قلت له بس انطم هذي قرويه اول مره تركب طياره …و ما قعدنا شوي الا هم جايبين العشا وهي اللي تقول بعشاها وعشاي وعشى واحد جنبنا كان نايم …ثم شالت الملعقه وخذت كاس موية صحه صغير جايبينه مع العشا… وقعدت تشرب المويه بالملعقه والناس يضحكون …. قلت لها خلاص فشلتينا …. قالت مير مهوب منزين جلاهم مافيه انسه

المهم نرجع لمأساة اخوكم الحزين مع امكم الغوله... وبعد مالطت الما بالملعقه تحزبه جلى اعلن الطيار ان الطياره بتهبط ... وانا الي انهبل وقعدت اصايح من غير شعور وحلمي وحلمي .... انا تراي ماسافرت الى علشان الطياره بتطيح(وكل ذا طبعا بيني وبين نفسي)؟ .... وقعدت اناضرها وانا اقول وش انا مسوي في حياتي من يومني صغير والبزران يطقوني ... ومازيد تكلمت على احد واصلي في المسجد... ليش كذا يصير لي ليش ليش ... وفي الاخير عرفت وتاكدت ان المصائب لاتصيب الا المؤمنين ... وقعدت اصبر نفسي بقراءة المعوذات والاحاديث ... و كل ماناضرتها خنقتني العبره ... وزينت لي نفسي في مكروه ...واتعوذ من الشيطان واقول لنفسي يااخي اعتبرها تكفير ذنوب طيب والبزران يومني صغير؟...
و التفتت لي وفتحت البياره وقالت وقعت الطياره (وين قلم ولا حمامه) ... قلت وقعت جعلها توقع عليس بقعا (الدعا عندنا عادي في الحوطه) ...المهم نزلنا في المطار وطلعت هي مع باب الدخول كالعاده الي عيا ينفتح لي... و استا جرت سياره ( طبعا وجهتنا لجده) ... واخوكم ابو برغش مقطوع سره في جده (مازيد رحت لها)... و توجهت لجده كافخ الي يشوفني يقول وش ذا الدليله وطبعا قضاي جمبي نايمه فاتحة... البياره وتشخر .... وازيدكم من الشعر بيت الدرايش مفتحه ..... انا كنت امشي ميه وستين ومدري ليش السيارات الي ورانا يسقطون علينا وهم داقين اللطمه ؟...و صرت انا آخر السيارات على اني امشي ميه وستين حتى التريلات سقطت علينا ....
وانا كافخ ورا هالسيارات لقيت لوحة مكتوب عليها الطائف 2كم .... و يوم وصلنا الطايف قامت حرمنا المصون من النوم... والتفتت لي وقالت جوان اثر جدة بارده... قلت لها قلت انا جيت منا علشان نحرم ونعتمر (يالدليله)مادرت اني مضيع .... وفي الاخير قلت فرصه نروح لمكه وادعي ربي ان ينقذني ويفكني من هالمصيبه... و احرمنا ورحنا لمكه وكالعاده قضاي نايم والدرايش مفتحه والسيارات يسقطون علينا... وانا كافخ يوم وصلنا مكه درناها عشرين مره ...والحرمه نايمه ... والدريشه مفتوحه الين لقيت الحرم... اعلنو ثاني يوم في الصحف ان نسبة وجود البعوض في مكه تكاد تكون معدومه ...وانا اقرا الخبر قلت الحمدلله يجي منها نفع ...
نرجع للأول يوم وصلنا الحرم... فايتتنا صلاة الظهر قعدنا قبال الكعبه بنصلي... يوم التفت اليين هالحوطيه تناضر في السما... قلت وشفيتس ...قالت اناظر وين الشمس.... علشان اعرف القبله.... وانا اناظر المنابر.... واقول لنفسي هوني مارقى فوق واحد منهم واطب ... و صلينا يوم جينا نعتمر سالتني وشلون تعتمر... قلت زين ماتعرف .... وقلت لها الرجال يسعون ويطوفون سبع مرات والحريم سبعين مره ... طفت وسعيت والحرمه توها تطوف ... وانا قاعد اناضرها مبسوط ومستانس عساه يغمى عليها ونفتك منها.... نمت وقمت وجى المغرب وهي تطوف يوم خلصت طواف راحت تسعى ..... لا وها الحوطيه مابكنها طافت وبدت تسعى وكل ذا وهي تدعي .... يوم ناظرت اليين المره تدعي ان الله يوفقنا ويرزقنا العيال ويسخرني لها..... قلت لها خلاص يكفي كذا المهم قالت توني باقي 42 لفه ... المشكله ماتعبت وانا تعبت من الانتظار ....
ماعرفتكم على ابوها ابوها من المشهوربالبخل وحب المال وعنده مطعمين في الحوطه المهم اقنعوه اهل الخير ببناء مسجد يوم بناه وشاف الناس الي يجونه واجد قلبه مطعم . هذي نكته قديمه لكنها حاصله فعلا مع ابوها .....
المهم بعد العمره رحنا لم جده.... وحصل ماحصل في الطريق.... يوم وصلنا جده سبحان الله ماطيحني ربي الا في الشيرتون ... وطبعن اخوكم راعي قلينزي وسالت الرجال الي في الاستقبال... (ALGA ANDKM GORFH FADHIH)..... صار حجازي وقال لي اشبك ياهوه وانا الي احمق واردها له منيب شابك وش عندك ... قال عندنا غرفة في الدور الاول وغرفة في العاشر ... قلت ابي لي في العاشر لانها ملقوفه وزيمن يدوخ بها راسها وتطيح ... يوم دفعت له الفلوس وخذ البطاقه قال للعامل شل الشنط ووصلهم... يوم ركبنا الاصانصير وهو يطلع العامل منه كنه مقروص ...اثر المره تثاوبت ... يوم رقينا لغرفتنا دخلت الحمام... يوم طلعت مالقيتها واثرها في السيب تتمشى تحسب الدعوى كلهالنا... وانا الي اصرخ عليها تعالي جعلتس العيطي والبلش الي يحتس ... تبغين تورطينا مع اهل الفندق بكره يقولون تروع الزباين... والا يطلع عليهم آشعه ان في الفندق جنيه... و دخلت وجلسنا على السرير وعرفت انني اصبحت امام الامر الواقع

المهم انا صرت امام الامر الواقع جلست على السرير وجت هي وريحتها... وعمايلها واقفه وصاير سنها صاروا والا واحد يرمي آوت
كانت تناضرني بالخفوس الي في وجهابس لو تكتب عليها عيون علشان الناس يعرفون وشي.... وجلست جنبي وقلت فيها هالبيتين(تراي ما اعرف اكتب شعر الا بالفصحى

جاءت بابط مشعور ومنتن**كالبيارة تبدو لصرصارها
فاكتمت به جميع الخلائق**وقامت الحرب على ابطهـا

وانا الي امسكها من شعرها وانا الي افتح باب الحمام وامحط بها في البانيو واملاه مويه وقلت لها لاتطلعين الين اجي خلها تخمر شوي
و رحت وانسدحت على السرير وما دريت عن نفسي الا الصبح واناالتفت مالقيتها وين راحت هالمره وانا الي اقمز
تسني مقروص يوم فتحت الحمام اليين البانيو مليان تربات وحشرات ؟ وانا الي امسك المره من شعرها واطلعها يوم طلعتها اليين عليها مريول مدرسه ؟

ويمالكم من الاشياء الي بتطلع بعد كل خمره.
وقلت لها ترا بنروح للبحر جعلس تغرقين فيه اصطغفر الله وش ذنب السمك

وشوي الا باب الغرفه يطق يوم هجيته لقيت واحد من اهل الفندق يسالني عندكم شي ميت؟

و رحنا للبحر وكانوا الناس واجد يوم حولنا وجلسنا تفرقعو كلهم الا ناس اكيد انهم بايعينها ولا حواطى؟
و فرشنا حصيرنا وجلسنا وقلت وراني ما اسولف معها اقطع وقتي
وياليتني ماسولفت ( ذبحتني مافي راسها الا بقرتهم )

في البدايه قلت لها سولفي اسأليني عن اي شي قالت لي ليش البقره اسمها بقره والحرمه حرمه قلت لما ماادري قالت يمكن البقر هم الي اختاروا اول واقنعتني.

بعد كذا قلت خل اسئلها انا وقلت لها من يطبخ غداكم قالت انا وتاليه نجمعه ونحطه عطوف للبقره

تراس ذبحتيني كل شي البقره البقره قلت خل اسالها سؤال بعيد ماللبقره دخل فيه قلت لها من يغسل هدومكم قالت انا وفي مرة من المراير غسلت غترة ابوي ونشرتها وجت البقره وكلتها وما درينا الا يوم حلبناها طلع الحليب احمر.

(بيني وبينك انا اكره هالحرمه لكن من كثر حسيها عن البقره بديت اغار من البقره)قلت طيب وش ذا الطقة اللي في جبهتس( للمعلوميه لها جبهه مثل الحريم بس نابت فيها شعر) قالت هذي زد تصادمت انا وقلابي قلت لها تسوقين قالت لا انا على رجلي المهم فرحت انها ماجابت سيرة البقره وقلت لها وشلون صار الحادث قالت كنت الحق البقره لا وطلع الغلط مني وصلحنا القلابي.

قلت مازد صار لتس موقف يخوف قالت بلى مره رايحه بعطوف البقره وكنت لابسه دراعه خضرى المهم يوم دخلت عليها وهي الي تجي تركض لمي وتحجرني في ذيك الربعه تحسبني زرع ويوم رفعت يدي اصايح طاحت البقره مغمي عليها( ماتلام هالريحه خلت التريلات يمشون 160 ) والحمدلله الله يحبني انقذني منها قلت والله ان الله يحبها هي لانها ماكلتس .

الحرمه قررت انها تخوض في البحر ورفعت صروال خط البلدة من على الساقين وصارت لابسه سترتش اسود تحته او انه لون الساق مدري المهم اني قلت فيها هالبيتين اتغزل في جسمها (من حر مااونس)بالفصحى طبعا

لها جسم صارورن وساق بعوضة *** وو جه ٍكوجه القرد بل هو اقبح
اذا شاهد الشيطان صورة وجهها***تعوذ منها حين يمسي ويصـــبح

و خاضت في البحر وشوي يوم قامت تصايح دحيم دحيم تعال يوم جيت قالت ذق المويه يوم ذقتها الينها مالحه مره وانا الي ارتاع واقوم انتفض والتفت ليا حولنا احد وقلت لها انت ذايقته قبل ماتخوضين قالت لا قلت عز الله الي بلشنا ببحرهم وانا اللي اصرخ عليها اركبي في السياره بسرعه ونحن الي نركب ونكفخ وتركنا عفشنا وقطعنا 4 اشارات ويوم شفت ان مااحد يلاحقنا ارتحت وقلت كوه للفندق بس يكفي الي صار لبحرهم المهم وحنا راجعين مافكرت الا في هاتربلات والاوساخ والحشرات الي في البانيو والي مخوفني اهل الفندق عسى مايدخلون ينضفون غرفتنا المهم يوم وضلنا الفندق لقينا شناطنا عند راعي البقاله الي جنب الفندق ..... وخذنا شناطنا وقلت مايفع الي شقه و استاجرنا شقه يوم دخلناها وقفت المره في وجهي وقالت وين بتروح مني هالحين واستفردت بي ونضراتها تقول انها ناويتني وانا يالمسيكين مغير اناظرها واناظر الدريشه هو بيمديني اطب معها

المهم اني قلت حرمه (مع اعتذاري لجميع الحريم) مافيه شي يلهيهم الا الاسواق!.. وقررت اني ابيع الدعوى واروح بها للسوق .. وركبنا السياره يوم وصلنا السوق وهي الي تفرشط على ذاك البلاط ويقعدون الناس يضحكون... بيني وبينكم انا اكثر واحد ضحك علشان مايدرون انها معي وعلشان ابرد تسبدي.. و دخلنا السوق وشرطت عليها انها ماتمشي ..معي بيني وبينكم يوم مشت قدامي وناضرتها رحمت نفسي وخنقتني العبره وقعدت افكر في مصايب الناس علشان تهون علي هالمصيبه . شكلها غلط تصلح تكون اي شي (جيك ، دالوب) لكن ماتصلح تكون حرمه و حمدت ربي الي مايحمد على مكروه سواه ومعاد قمت افكر الا بالجنه

بيني وبينكم قعدت اناظر في هالحريم الي في السوق ...حريم صدقيين مهوب مثل صديقي الي معي . كل هاذا وام برغش تمشي قدامي بزبيرياتها و يوم التفتت وشافتني اناظر الحريم قالت لى كوه للشقه ملييت... لا من زينها يعنني حرمه تغار !! و ركبنا مويترنا ورحنا للشقه وشرينا على طريقناحب يوم وصلنا البيت قعدت انا وياها نتقهوى ونتقشم حب و المره ماتعرف تقشم تهرش الحب هرش وسالتها وش تغدون وش تعشون؟؟ قالت نتغدى رز ونتعشى مكرونه قلت لها دايم كذا؟؟ قالت لا نغيير على العشى يوم مكرونه طوال يوم مكرونه صغار قلت الشرهه على الي يركز معس وانتي وهاالتغيير

المهم المره بدت تاخذ علي وقامت تسولف وقالت لي وش احرج موقف مر عليك ؟؟قلت لها يومني صغير كان عندي عزة نفس كان عمي الي يتفخ سياكل عياله بثمه عندنا المهم كنت قاعد معه انا واخوي حمد عيارته (الصعوه) و يوم جى يروح عطاني 10 وحمد 10 وعييت آخذها و صدق وحطها في مخباته وراح و يوم راح وانا الي التفت لحمد وقلت له جب العشره الي معك يالصعوه احسن لك ... وعيا وانا الي اشيله وامحط به واخذ العشره يوم التفت اليين عمي وراي ناسي مفاتيحه والتفت لحمد وقلت له يله تراي وخرت عشرتك لاتنشق ...تغالب ثانيه؟؟

وقالت وش احسن موقف طريف؟؟ قلت لها كنا طالعيين للبر وكان معنا ماطور فيه نفاضه قديم جايبه واحد من العيال الظاهر انه لاقيه مدفون ونتركه في الليل شغال واليين قمنا الصبح لقيناه اما قاطع الشارع والا عند احد الخيام الي جنبنا وكل صبح كذا الناس تدور غنمهم ..دجاجتهم ..وانحن نطق على هالخيام ما جاكم ماطورنا

و كل هالسوالف والبربره ابغى يجيها النوم وافتك منها المهم جاني النوم وهالكربه شكل في راسها شي واخيرا قررت اني ابيعها وادخل معها الغرفه و يوم وصلنا السرير ومادري وش لون وصلناه مادريت الا المره تلوى من بطنها... سبحان الله يمهل ولايهمل

المهم اني يوم شفتها كذا قررت اروح بها للمستشفى وركبنا السياره وقعدت اكركر واضحك مستانس ومبسوط
وهي تلوى تصدقون انه احسن موقف كومدي مر علي وكل ماوصلت المستشفى رجعت ...في الاخير قررت اروح بها للمستشفى يوم دخلت المستشفى قال الدكتور فيها زايده لازم نجري العمليه هالحيين المهم دخلوها غرفة العمليات وانا قاعد عند باب الغرفه اطقق مصابعي يارب تموت يارب تموت ...وفي الاخير طلع الدكتور وقال مانفع فيها البنج وش هي تاكل قلت مدري عنها يوم جابو ملفها بيشوف تحاليلها وقرى الملف وعرف انها حوطيه والتفت وقال لي ليش ماقلت انها حوطيه من الاول؟ قلت ليش؟!؟ قال اهل الحوطه جاينا تعميم ان ماينفع معهم في البنج الا طريقه وحده قلت وش هي؟؟ قال نطق راسها على طرف ماصه ... وبنجوها وطلع الدكتور بعد ساعه وقلت له بشر قال الجراح كل هالساعه وهو يشتغل ماوصل للبطن .. ومع الاسف نجحت العمليه وبعد يومين طلعت معي للشقه وكانت نايمه على السرير وانا جنبها افكر واحاول ان انهي حياتي وكنت اناضرها واناضر الشباك وماادري وش اختار وقررت ادق قرعه بينهم وانا عارف ان حضي شين بتطلع القرعه لهاودقيت القرعه وانا ادعي يارب تطلع للدريشه واطب منها وارتاح لكن ماقلت لكم اني بدخل الجنه انشاءالله طلعت القرعه لها ويوم شافتني كذا قاطعتني وقالت انا عارفه وش فيك مرتبك اكيد علشاني مااقدر اعطيك الي تبي قلت لها لاوالله هذا هو السبب الوحيد الي مخليني مرتاح شوي. وقربت لمها وقلت ليش ما امسح على راسها اواسيها وهي مريضه وزيادة اجر وياليتني مامسحت تدرون يوم قلت لكم ان عمايلها دايم واقفه طلع فيها عظم

هذا اخر جزء وقررت اعيش مع صديقي