يا معذربين أهل القنص

السلام عليكم

أول مشاركة بساحتكم وأتمنى تحوز على إعجابكم

معروف إن راعي المقناص بالصيف تقل روحاته للقنص وما يكون عنده غير الدواوين " المجالس "
والشاعر حمد السعيد كان في أحد المجالس وكان النقاش عن المقناص وأنه تعب وبهذله ويلومونه ويقولون وش لك فيه فجاوبهم بهالقصيدة :

يا معذربين أهل القنص بالبهاذيل = أخذو هروج اللي لغاكم يعله
إن سهل الله بالليالي المقابيل = ديوانكم ما عاد رجلي تدله
باكر ليامن بدل الجو تبديل = وجه الشمال وبث بالكوس غله
لا قام من عقب البطا يزحف الليل = عن النهار بساعتين ويسله
عقب التويبع .. والكليبين .. وسهيل = لا صرت بظلال الضحى ما تمله
لا فارقن خضر الجريد المحاصيل = لا شفت مقعاد العصر طال ظله
هذاك والله دورنا يالعواذيل = ياللي طربكم صورةٍ بالمجله
أنا طرب قلبي هذيك المداهيل = لا صارت الحره علينا مطله
غربي مهير بين ذيك الشخاليل = وقت العبور وصيدها حل حله
لا جت من جليغم علوم ومراسيل = وجابوا علوم الصيد دقه وجله
ثم أنتوينا مع رجالٍ حلاحيل = النفس معهم دايمٍ مسفهله
كلن يجهز موتره بــ التدابيل = يبي ليا راحت عليهم يتله
ربعٍ نشاما بالمواقف رجاجيل = وإلا الردي معنا شحيحٍ محله
وقت المغدا كل ابوهم شواغيل = محدٍ حسب خدمة خويه مذله
كبيرهم لا دار ببيض الفناجيل = من خف روحه بينهم زان دله
منزالنا قاعٍ عسى فاله السيل = عقب الحرور وكل روضٍ يبله
قاعٍ توسع خاطري بالتعاليل = الشيح فيها ماكل الخد كله
هي طب من نكل به القيظ تنكيل = اللي يحسب ظاهرات الأهله
يا عاذلين القلب والله ما شيل = عديت كل نجومنا المستجله
راعي الولع من كثر ما يرقب سهيل = كنه خليلٍ فاقدٍ شوف خله

والشاعر حمد السعيد من المولعين بالقنص بالطيور
واللي يضيع طيره من حبه له وحرصه وقلة حيلته حتى الحصى يسأله كان شاف طيره ولا شي
والشاعر حمد ضاع منه طيره فكتب قصيدة يسند على الطلح والطلح شجر معروف أقرب ماله السدر تقريباً والطلح كأنه يرد عليه فابتدى القصيدة يقول :

يالطلح ما مرك مع الصبح صافي = طيرٍ غدا لي أمس والشمس حيه
أتلى العهد به راح يطرد مقافي = خبري به أومى في جناحه هنّيه
لا والله إلا مرني العصر وافي = كنّه غلامٍ مستغيرٍ بهيه
أقبل علينا ثم أخذ با نحرافي = يوم الحباري وقعن له سويه
يالطلح قلّّّّّي عل مابه خلافي = البارحة برد وشمالٍ قويه
كانه تعشى قلت عله عوافي = والحي يجمعه الولي مع خويه
لا والله إلا صاد خرب متعافي = وأخذ عليه من الثنادي شويه
لا مفلسٍ مره ولا قال كافي = يوم أخلفنه عن عشاه حقبيه
خابره والله قاطعٍ ما يخافي = دايم على الصيده تجي له حميه
أنشدك باللي منبتك بالسوافي = عساه في خير ولا فيه سيه
خبري به أقرش في سبوقه خلافي = مابه بلا وأمرح على هالحصّيه
والفجر شخص بالنواظر وشافي = طلعه بعيد ويمته ساحليه
يالطلح ذا حبه ولا هوب خافي = متعادلٍ حبه بحب البنيه
بعض الطيور إن راح قلنا عوافي = لا شك هذا وين أبلقى حليه
أتعب عليه وعادة الحر يافي = أضرب سهلها والوعروالشغيه
يجيبه اللي رازقٍ هالعجافي = بهايمٍ تمشي على غير نيه
يالطلح لك مني يابو غصن ضافي = لا جابه الله وكل نيه مطيه
لا جيك أنا في موتر القش حافي = وأسقيك ياللي باقي بتانكيه
وآطى على رملة سوافيك حافي = وكلن على ما قال يذكر خويه

ولما سمع صاحب السمو الملكي الأمير عبد العزيز بن سعود ( السامر ) القصة والقصيدة وعرف أن طيره ما رجع عوضه عنه بطير ثاني وقنص به الشاعر وأعجبه فعله الطيب وأثناء الصيد شاقه فعل الطير فقال قصيدة يسندها على اصدقاء الأمير وهو البازعي يقول فيها :

يالبازعي طيري طلع مثل راعيه = زولٍ .. وفعلٍ.. والمواري تشابه
بالطلع موقف ما لقى من يباريه = عساه يسلم سيدي يوم جابه
له ماكرٍ في بر فارس محاريه = كني أشوفه يوم خاطوا قطابه
صفات وجهه مع شدوده توديه = ضمن الحرار ولا وراها طلابه
النادر اللي يوم عزمت أسميه = سميته السامر وأشوفه زهابه
إليا قفيته شفت دقٍ محليه = وإليا نطحته من عيونه تهابه
كن الثريا في غواطي مواميه = أبيض نحر كنه يشع الضوى به
هجرن قصير الساق جبره ثناديه = وله عاتقٍ يعطي شموخ ومهابه
اليا مسح وجهه ونهض مواطيه = يطري علي اللي عزيزٍ جنابه
به من طبوعه مشبع اللي حواليه = وماخذ من طبوعه ليان بصلابه
وجهه ليا من صاد يشبه محاليه = لا بشر بضيفٍ وردد هلا به
لا تل سبقه قلت يا طير لبيه = خذهن وكني كاسبٍ به ثوابه
وجاهن وهو كن المنايا تباريه = زيزوم قوم وفزعوه القرابه
اللي معه بالطلع ما عاد يمديه = ياصل مطاليعه وهو ما درا به
من عادته برق الدواغر مداميه = في صيدته هالطير غمقٍ صوابه
اليا ضرب ما وافق الضرب يفريه = كن بيمينه من سيوف الصحابه
ينقا كبير العرف ما هو يخليه = من خيشت قدمه نهبها نهابه
يا سعد عين اللي قنص عانيٍ فيه = طيرٍ وماخذ من طبوع الذيابه
ولا صارت الدعوى عناد ومشاريه = أخذه وكنك ما خذن معك لابه
هالطير أحبه حيل من حب راعيه = عبد العزيز اللي عزيزٍ جنابه

تقبلواا تحياتي

تعااااااال يا اتيكا

جوك الر بع بمشاركاتهم

مشكوووور يا امير الحروف على هذي اللفته الكريمه منك

وهذي بادره طيبه تشكر عليها

وبحق الساحات البريه بحاجه لدعمكم

مشكووووووووووووووور


سلام

العفو يا خوي الغالي هادي

ومشاركتنا بالساحة شي يشرفنا

قنص وعلوم طيبه

بس ماش ما ممن مواضيع والقنص ما الله عطانا فيه

نقنص بس قصايد هذا حدنا

وإن شاء الله اللي يشرفنا بالحضور بينكم ما راح نقصر فيه

مشكووور يالغالي

وتقبل تحياتي

واللة روعة روعة بارك اللة فيك

تسلم والله يا أمير الحروف على هذا الأختيار المميز والذوق الرفيع

مشكور على هذه القصائد الرائعه والله لا يهينك ولا شلت يمناك

وصح لسان الشاعر ألذي ابدع في الوصف

حياك الله وترى ننتظر المزيد منك


وتقبل التحيه

الله يعافيك أخوووي الغالي اتيكا

مشكووور على كلامك الجميل

وإن شاء الله نتواجد معكم بالجميل دائماً

الله يسلمك أخوووي


تقبل كل الود

هي طب من نكل به القيـظ تنكيـل
اللـي يحسـب ظاهـرات الأهـلـه
يا عاذليـن القلـب والله مـا شيـل
عديـت كـل نجومنـا المستجـلـه


صح لسانك

والقصيدة جميلة


المعاصر
حائل

اختيار حلو لابيات رائعه

ذوقك في الاختيار يدل على قريحه شعريه تحتفظ بها

اخوك مثير

أخواني

المعاصر

مثير

مشكورين على مروركم الكريم

والحمد الله المشاركة نالت استحسانكم

الله يعطيكم العافية