كلاكيت ثاني مره ... انا مهبول وجايز لي هبالي

يحلمون اللي فيك يفكرون ... بنشر نسائي
مدري وش اسمي مجتمعنا اللي هذا اكبر همه .. نساء المجتمع وكبار مثقفاته وكاتباته وكتابه كلهم على موضوع قياده المراه للسياره وشرعت اقلامهم وزواياهم الصحفيه لهذا الموضوع وكانه اكبر هموم الامه .. طبعا لو سالت انا شخصيا عن رأيي في قياده المرأه ومثلا لو كلمني الزميل خادم الحرمين الشريفين ( بحكم اننا كلنا ملوك اللهم انه هو ملك بالواقع وانا ملك بالحلم ) فلو كلمني واستشارني كنت بقوله شف يابو عابد انا مع سواقه الحريم وضدها .. فان اخذت قرار بالموافقه فتراني ابزعل وان رفضتوا هالقرار تراني بعد ابزعل يعني ناشب ناشب الله لايعوق بشر .. فالان الاصوات المعارضه لقياده المرأه بدوافع دينيه مدري وش موقفها من مئات الالاف السائقين اللي يلفون مدننا واحيائنا ليل نهار حاملين معهم نسائنا .. واطفالنا ..
واما االاصوات المؤيده .. فودي اأسألهم لو تخيلنا ان هالشي صار .. توقعون كم حادث نسائي كل يوم ،، وبعدين لو فرضا فرضا صار هالشي وواحد مثلي هواوي وقلبه خضر ومايداوم الا متاخر وكل يوم صاكينه بخصميه كبر ابليس وش موقفه لاصار الصبح في طريقه متاخر لدوامه ومر من جنبه فرخ تو اهله فاطمينه ثم قدر الله على هالفرخ وبنشر .. اتوقع ممكن الواحد يقدم استقالته لو خير بين التأخير وبين اصلاح بنشرها .. وبتزيد عندنا عوامل الازدحام ... يعني بحكم اننا مشافيح حتى للحوادث ونص الزحمات اللي نشوفها بشوارعنا هو لان حبايبي المواطنين مخلين اشغالهم ومشاوريهم وقاعدين يتفرجون على حادث .. ومع قياده المرأه للسياره .. بتسكر شوارع وطرق سريعه يمكن عشان بناشر نسائيه .. .. احد الزملاء يقولي قبل يومين ان زوجته راحت لمناسبه مع سائق الجيران وكانت جاره اخرى رايحه معها المهم بعد ماخلصت من الزياره اتصلت علي عشان اجي اخذها فرفضت تلك الجاره انها ترجع معي يقول قلت لزوجتي الحين مع السواق الاجنبي اللي ماندري وش وراه ومن وين جاي صارت تركب معه عادي ومعي انا اللي زوجتي معي محرم وفوق هذا جار من سنين وتعرفني مثل اخوها صار عيب وشق جيب .. واقع مؤلم وعجيب


دلـــــــــع بــــــــنات ..


المراه والرجل في مجتمعنا السعودي مثل ( أذاني الحمار ) دايم متعاكسه وكل منها باتجاه عكس الاخر .. وكلن ماهوب راضي باللي عنده .. لا رجالنا راضين عن حريمنا ، ولاحريمنا راضيات عن رجالنا ..
ولكن هذا ماهوب محور نقاشنا هنا .. فالمحور هنا هن البنات اللي للحين ماطلعن استمارات يعني البنوتات .. مدري وش هالصراع والسباق العجيب لكل ماهو غريب .. بدء من كوووووووووووول مرورا بستار اكاديمي وتهافت جزء من مراهقاتنا على متابعته وليتها وقفت على المراهقات بس بعضهن ربات بيوت وامهات عيال ..
ومعلمات وغير ذلك .. والسالفه شفتي فلانه امس بالبرايم وش سوت وشفتي فلان .. غير التهافت على المجلات اللي اغلفتها تحكي عن البرنامج .. سذاجه كبيره وواقع مؤلم تجسدها هالبرامج وقناعات وميول فكريه منحرفه تولدها مثل هالمواد الهابطه .. وانعكست في اخلاقيات كثير من البنات وطبايعهن .. كنت الاسبوع الماضي بالرياض عند احد الاشارات .. بشارع الثلاثين بالعليا وبجنبي سياره فيها ثلاث بنات طبعا اول ماراح بالي انهم غير سعوديات حيث ان الشوش طايره وانواع الهبال .. واشوف الدريشه انفتحت وتحكي وحده منهم ( هالاشكال هم اللي اقولكم متأثرين بقوه بستار اكاديمي ) طبعا شوشتها طايره وانا مادققت الا بالشوشه لان الخشه غايصه كلها بوسط الشوشه ماشوف الا طرف الخشم والبرطم وصوت يطلع مدري من وين تكلم صديقاتها .. والظاهر مختلفات في المكان اللي يبن يروحن له .. ومثل اللي تقول اسمعنا .. مير وانا اللي التفت لها قلت وش تحسين به لو الحين بالولاعه اشب بها الشوشه اللي كنها ( عوشزه ) .. مسويه فيها مريام فارس هالحين .. طبعا سكرت الشباك على طول واشوف البرطم اللي قلت لكم عنه يتحرك ولا ادري وش يقول ..
..
تقليعات غريبه وصفات اغرب احسها طبت علينا فجأه مدري من نلوم فيها ولا من المتسبب فيها لان الاسباب كثيره والمتسببين كثر ..



وش رايـــــــــــكم ؟ ... إستشــــــاره



في سنوات الدراسه المتوسطه ( الله لايواخذني .. ) قدر الله علينا وبحكم اننا خايفين من الرسوب باحد المواد ( الانجليزي في ذاك الوقت ) وطبعا ذاك الوقت صعب لان مانشوف الا القناه الاولى يعني مافيه مصادر تعلم في الدنيا غير الاستاذ عثمان الله يذكره بالخير .. وثلاث ارباع الحصه يتكلم بالعربي والربع الباقي يصفق فينا وانصدمت بصراحه ان اللي درسته في تلك الايام اكتشفت مؤخرا ان ولد اختي اللي بثالث ابتدائي يدرسه يعني بغيت اروح غلطه بسبب انجليزي يدرس بثالث ابتدائي .. المهم ومالكم بالطويله .. وبحكم اننا الحمد لله مسلمين عيال مسلمين والمسلم نفسه تلومه على الخطأ .. وخير الخطائون التوابون فقد تذكرت اننا في الثاني متوسط عدلنا ورقه الاجابه حقت الانجليزي يعني نجاحي مبني على باطل ومابني على باطل فهو باطل .. والواحد وده يبري ذمته فمدري وش اسوي هل اروح ادرس صف ثاني متوسط بروحه من جديد يعني اسجل لي بمدرسه ليلي ولا منازل واختبر معهم ولا وش اسوي .. ؟



على الهامش :

لا زالت الأيام تأتي .. ولا يأتون ..
كلما سمعت ضحكة في الجوار شعرت بقلب أحدهم وهو يحترق ، لأن عابرا يتلذذ بدفئة ..ويضحك ..!
أوهموني أني حزين ..
مع أني كنت أضحك ..
أوهموني اني أسكن وحدي في مكان اختاروه لي ، فضحكت كطفل يا أمي ، فقالوا لا يليق بحزين مثلك أن يضحك !
وقالوا أيضا يا أمي .. لا تخف ..
وأنا خائف من أن أخاف ..


رساله الى شخص مــــا في مكان مـــــــــــا ...

الذيب من صلبه يجيب الذيابه **** ولاّ الثعالب مابعد جابت فهود
والسيف تحمي سلته عن نصابه **** والطيب ماياتي بلا فعل وجهود
ومن لاكسب كلمة نعم في شبابه **** والله ولا تنقاله لا غدى عود

شواق

الله يعين نفسك عليك متعبها باالهواجيس وشكلك ودك الحريم تسوق بس الله لايقوله واعادة السنه اللي غشيت فيها والله فكره ماهي شينه بس ان قدرت

نفس كلاااااااام اختي احلااااااام ورديه