ابيك بع دنياك لا ترخص ابيك .. لو يجبرك في شيء نفسك ما تبغاه ♡

ــــــ

ابيك بع دنياك لا ترخص ابيك
لو يجبرك في شيء نفسك ما تبغاه

قله على خشمي وحاضر ولبيك
ما دامك انت وكل ما فيك يفداه

لا تقول أنا وانا .. انت وشفيك
هذا ابيك اللي من الحق ترعاه

هو اللي يتعب لك هو اللي مربيك
هو اللي يسهر لك ونومه فلا جاه

هو اللي يفخر بك هو اللي مسميك
هو اللي عدك ذخر من هم دنياه

لا تكبر وعقبه .. تشك بمباديك
وتغريّك نفس السو باللامبالاه

عليك باللي من محبتك .. يوصيك
من قبل كان الناس تشري وصاياه

ان سرت في دربك ورجله تباريك
توخر اليا سار حذرى تعداه

يومك صغير يسابقك لجل يرضيك
ويشّلك من القاع من فوق يمناه

وان جاك صوته لو على البعد يدعيك
فز بعجل .. لا تنتظر صوت يثناهّ

يومك صغير ان قلت يابه يلبيك
والحين جاك الدور .. وترد لباه

وان الزمك في حاجته اجر ويجيك
رزق من الله من قضى حاجة آباه

يومك صغير ان قلت في خاطري ذيك
ما رد لك خاطر بشي " تمناه

والى حكى للناس وقف حكاويك
لا تسولف لغيره ولا تقطع حكاه

يومك صغير تهذري بكل ما فيك
ويضحك لحكيك لو جهل كل معناه

والى جلس ياكل فلا تمد كفيك
قبل يمد لمايدة لاكل يمناه

يومك صغير .. تخرب الاكل بيديك
ولا زعل منك ولو كنت تملاه

والى نهاك فطعه والصبر يعفيك
من ضيقة الدنيا وهم المعاناه

يومك صغير تجيه تبكي ويرضيك
في ذمتك منهو يسوي سواياه ؟

وانشد يتيم الاب والرد يغنيك
لا طاحت دموعه على شان طرياه

ما يبغي الدنيا ولا ذي ولا ذيك
وده يشوف ابيه ويحب ماطاه

ان قصرت نفسك ترى عاد يمديك
تغانم اللي جاي والماضي انساه

ابيك بع دنياك لا ترخص ابيك
لو يجبرك في شيء نفسك ما تبغاه

ان كان تبغي جنة الخلد .. بيديك
بره ويرضي ربك ان حس برضاه

،’
لــ الشاعر .. حمد البريدي

الله يرزقنآ برهمَ
سلمتِ يمناكِ على الأبداع يَ مبدعة ،

رائعه ونصائح من ذهب
وبر الوالد او الوالدين شي عظيم واجره كبير
وهالابيات جدا رائعه عافاك الله على هالاختيار الله يحفظك

اقتباس: المشاركة الأصلية كتبت بواسطة » اِلـَوَفْآءْ بـِنْـتْ    الله يرزقنآ برهمَ سلمتِ يمناكِ على الأبداع يَ مبدعة ،

الله يسسلمك ويخليك ع حضووورك الغالي ..
منوره بتواجدك ..

اقتباس: المشاركة الأصلية كتبت بواسطة النادر    رائعه ونصائح من ذهب وبر الوالد او الوالدين شي عظيم واجره كبير وهالابيات جدا رائعه عافاك الله على هالاختيار الله يحفظك

حياك الله شاكره حضورك وتواجدك الجميل ... وياهلا فيك ..