مرثية ناصر القحطاني في زوجته

مسا الخيرات وان طال البطى يالمنزل المهجور
----- ترا مــا ابطــــابي الا حـــالة مثلك يقـــدرهــــا

اذا عندك عتب لا مانع من معاتب المذكور
----- واذا عــز الرضى تفـــداك الاعــــذار ومقــابرها

انا اللي جيت لك والريح تعوي والشتا مسعور
----- ولابه مــــن دفى والمربعـــانيه بــاواخــرهـــا

تغير وانطبع دربك بلون المسك والكافــــــــور
----- وهذي رعشـة كفوفي ولابه مـــن يدثـــرهـــا

بعد ماكنت اجي بابك بدستور وبلا دستور
----- ولا ادري الا وذيك الدرفه اليمنى على آخــرها

طموحي عارضته اللي معاها كل شي يبور
---- وجا كسر الطموح اهون علي من كسر خاطرها

سنة ماقبل نذير الشيب كانت بأول الطابور
----- وكنت احلامــهـا ذيك السنه واول ســرايــرهــا

لقت قدامها فوضى وقلب وشاعر وجمهور
----- وجــات ورتبتني مـــن جديد وصرت شــاعــرها

بقيت اسري لها لا همني وحشه ولا ديجور
----- اشيل احلامنا تحت النــــجوم وهي تفســرهــا

سقى الله يوم جابت لي قبل يومين من عاشور
----- هذاك العسجد اللي جابه الله من عشايرهــــا

غلاها كان تحويشة عمر بشعور فوق شعور
----- الين اكتضت الاشــــــواق والهاني تكــاثرهـــا

ربت ماهي تحت ريشة نعام وفي بلاط قصور
----- ولكن لاترف لـــــه قيمـــه الا تحت اوامـــرهــا

يحملن امهات البيض تسع شهور تسع شهور
----- على رجوى بشايرهـــــا ولا لاحت بشــايرهــا

تقـــل بدر ولا بيـــات بدر تقـــول بـــدر بـــــدور
----- ولا بيات بــــــدر بــــدور يعني مـــانت خابرهــا

لو استقصوك عنها مانت محتاج لشهادة زور
----- تحت سقفك سحايب ملحها وامواج سكــــرها

مرق المتحف اللي من ورا اضلوعك فدتك الدور
----- وانا ما اقوى نظرما فيه بعد غياب ناظــــــــرها

حديقة بيت اهلها

سورها العــــالي

حمام الســــــور

زخارف بابـــهـــا

شباك غرفتـــها

ستــــايـــرهـــا

ورق جدرانها..سجادها..تقسيمة الديكـــــــور
----- خزاينــهــا ..هداياهـــا..رسايلـــها..خــواطـــرهــا

تحفها..مزهريتها..قصصها..شعرها المكسور
----- صورها..مكتبتها..اقلامــهــا..لـــمــة دفـــاتـــرهــا

زمام السيف ..شال الليل..حنا الكف..كحل الحور
----- حلقها..عطرها..فستانها الابيــــض..جــواهــرهــا

مرايتها..فصوص الساعه البيضا ام خمس سيور
----- خواتمها..قـــلايد جيــــدها..نقشـــات اســـاورهــا

ملابسها..بروق الوانهـــــا..دولابهـــــا الممطــور
----- من ازرقها..الى احمرها الى اخضرها الى اصفرها

نسانيس الهوا اللي ترتشف يشمومها المنثور
------ صخيفات المناديل اللــــــي احتضنت عبـــايـــرها

مصابيح المكان اللي خذا منه النهار النـــــــور
------ سنون مشاطها اللـــي مانست عشرة ظفايرهــا

بطاقات(ن) يطرزها صغار(ن) يحملون زهـــور
----- رحيل الدبلــــه اللـــي مــاتهنت في خنــاصــرهــا

زوايا كنهــــــــا بلــــور في بلــــور في بلـــور
----- مسى رزنامة(ن) غـاب الحـــرير اللـــي يغيـــرهــا

وش اقول لـ يتاماها الكثير الممتلين كسور
----- وانا اشياهـــا تحـــاصـــرني واحسبني محاصــرها

بكيت وصارت الدنيا قفص واستوحش العصفور
----- ضحكت وملت شبوك القفص من كذب طـــــايرهـــا

عرفت شلون الارض تدور وايام الزمان تدور
----- والاعيان انصفت كيف ومتى تذبـــــح مــحـــاجرهــا

ومتى تصير القبور بيوت وتصيرالبيوت قبور
----- وكيف الذكريـــــــات يذوب مـــاضيهـــا بحـــاضـرهــا

على الله وانت ابيك المتحف اللي للعرب معذور
----- الى جتك العيـــون وصـــــدت ابوابـــك نواظـــرهـــا

تمر اجيال وتصدر سواليف وتعيش عصـــــــــور
------ وتروي سالفة عمري مــــن اولهـــا الــى اخرهـــا


هذه القصيدة الجميله للشاعر ناصر القحطاني في رثاء زوجته

دمتم بخير وعافيه

الله الله على شاعر الاندلس قصيدة روعة

صح لسان الشاعر وسلمت ايدي الناقل ....

مخــــــاوي ســــــدير ..

بكيت وصارت الدنيا قفص واستوحش العصفور
----- ضحكت وملت شبوك القفص من كذب طـــــايرهـــا



ياسلام على هذا الشاعر كم تطربني أبياته
شاعر الأندلس صح لسانك ومشكور يازمن بنقلك إحدى روائع الشاعر ناصر


دمت بحفظ الرب الكريم

	يامخاوي سدير و ياالضامي(ابوحمد)

دئمآ يازمن شعلة فى هذا المنتدى الجميل

اللة يعطيك العافية

	الله يعافيك الشمالي