مفارقات عجيبه (وسعواصدوركم )..

خبر يقول ان دول الخليج اعفت الحمير المستوردة من الرسوم .
ظنكم يدورون بدائل للسيارات من الحين ؟؟!! ذبحونا بهالمفردة بدائل حتى بوسائل النقل. يعلق على الخبر واحد من اهل شقراء العيارين شوي ، ويقول لي يا ابوخالد في السبعينات ميلادي كان الحمار الحساوي بعربته ومزبرق ومعدل بـ 12000 ريال وسيارة تويتا نسيت اسمها 5700 ريال. كبير يا الحمار . ( تكرمون جميعا)





خبر ثاني وحدة سعودية مراهقة وابوها راضي بتروح للقطب الجنوبي ، بس اهم شيء عندها انها محجبة ، نست ان القطب الجنوبي برد يعني غصبا عنها بتححجب مهوب خوف من الله . صورتها بالجريدة تؤكد انها نصاااااااااااااااابة.







خبر غريب جدا ،
بلدية الخبر مسوين مسابقة اجمل حديقة منزلية وناسين كل مشاكلهم ، تغطيات اعلامية لهذه المسابقة ، ما تحسون انهم يتعمدون اهانة المواطنيين اللي ثلاث ارباعهم في شقق؟






وحدة تقول لصديقتها انا اتلثم مافيها شيء ، يعني متحجبة وفوق هذا متلثمة ، زين ما قلنا شيء ، بس شركات المكياج وش تسوي بعيونك وجفونك وخدوك . من جد بعضهن يستهبلن بغباء .
الله يستر على بناتنا من هيك بنات.






واحد يقول :
هذي قصة لم استطيع مسحها من راسي ، ايام الجامعه طمرت وجبت بخاري دجاجة وببسي ولبن ، يوم فرشت السفرة بغرفتنا بالجامعه ، ورتبت كلش، لقيت الرجال يصارخ زعلان ، وش فيك يا ابوالشباب . قال انا قايل لك الف مرة ما اشرب ببسي الا دايت ؟؟؟؟؟؟؟؟؟؟؟؟؟ قلت في بالي اللي يسامح مدير الجامعه اللي مسكر درايشنا كان رميتها دون حسوفة.
بخاري يقطر زيت مع دجاجته ؟؟!!واخينا مسوي دايت بس على الببسي.





بنت في بيت اهلها صاجة امها جوعانه .. جوعانه ...... امها سنعه ، قالت روحي للمطبخ والخير في كل مكان اكلي اللي تبين . وبعد شوي ردت جوعانه .... جوعانه ...... وتحمق الام وتقول لها ليه تقولين لي جوعانه انا معدتك مثلا . وهي اللي تكرشها الى المطبخ . شويات عرفت الام السبب ، البنت ما تعرف تسوي سندويتش جبن ، الله يعين زوجها بس.





قهوجي بنغالي في ادارة ما ، مسلف نصف السعوديين اللي فيها ؟؟!!
وراتبه 700 ريال ، يبيعهم بطاقات سوا الين اخر الشهر وياخذ
خمسة ريال مقابل الدين . هل البنغالي ذهين او العلة في هؤلاء.





في السوبر ماركت . كل واحد يمشي ومعاه ورقة مقاضي ، الا الحريم بدون ورقة ، الحين عرفت وشلون تطير رواتبنا . مهوب كل الحريم طبعا ؟





احدهم معزوم بزواج ويقول :
كعادتنا بعد صلاة العشاء يكون العريس وابوه وابو العروس موجودين ، المعرس ما دخل الا الساعه 8:30 ، يعجبوني معظم الحضور محد راح يسلم عليه . وانا منهم يكفي باركت لابوه وابو العروس . ولكن من لا يحترم الناس لا يُحترم . بس اقول هذه اولها شلون تاليها ، الله يوفقة يارب.
نستورد مليون طن أرز ، ونكب نصفة في الزبالة ، يعني استهلاكنا الحقيقي نصف مليون طن ، قس على ذلك اشياء كثيرة بحياتنا ، ويتحملها وطنا .





في معظم البيوت مستودع او بالسطح قراشيع كثيرة ( قراشيع وصف لاشياء ما منها فايدة ومسوية زحمة) . وعادة الاب او الام يحتفظون بها يمكن يحتاجونها . وبعد عشر سنين يرمونها.
زين ليه ما نقرر اللي نبيه او ما نبية مبكرا بدل هالتشويه.




اتفهم جدا اذا لقيت بنت مقصقصة اظافرها و منعمتهن وعاملتهن منحنى ويلمعن ، هي بنت وتحب تكون انيقة وجميله ، بس القى تمساح مسوي كذا ؟ صعبة اقبلها . اليوم شفته بالسوق . بس ما اقول اللهم لك الحمد ، اللهم عافة ولا تبتلينا


عجبتني نكتة سعودي وزوجته راحوا الى لندن شهر عسل وما يعرفون انجليزي ، طلع لهم فار بالغرفة ، وتنط العروس فوق السرير خوفا وتستجد بالزوج ( فرصة لاثبات القوة والمسئولية ) اتصل على ادارة الفندق ويبي يعلمهم ان الغرفة فيها فار بس ما يعرف انجليزي ، قال لهم تعرفون توم وجيري ، قالوا نعم ، قال جيري عندنا .

شكرا