قصـائد ,, لاتنسـى

بسم الله الرحمن الرحيم




حينمـا ننتهـي من قـراءة قصـيدة

تبقى أبيـات منها عـالقة في الذاكـرة ونرددهـا باستمـرار

والاجمـل أنها تعيش معـنا

في عقولـنا ,, وقلوبنـا

.
.


اذاً هـذه الصفحـة .. لتلكـ القصـائد الخـالدة

التي لاتنسـى





,؛,






تعبت واتعبت فكري في تفاكيرة
..................اللي لها داع واللي مالها داعي

اللي لها في جليل الملك تذكيرة
.................في تالي الليل يوم الناس هجاعي

من ضاع له شي لو كثرت تحاسيرة
.................كد قيل مايحيي الميت بكاء الناعي

يامل قلب تقل في داخله نيرة
................مافيه عرقٍ متين وغض ماماعي

امسى مثل وادي خضراء نواويره
...............واصبح مثل وادي مافيه مرباعي

حطيتني يازمان الغدر في حيرة
...............ضيعتني بين مدخالي ومطلاعي

الهم دقيت في كبدي مساميرة
...............سم الافاعي تجرعني تجراعي

الغيب لغز ولا يعلم بتفسيرة
...............ياكود من ترقد العالم وهو واعي

الملك بيدين راع الملك تدبيرة
...............مايملكه لاملك دوله ولا راعي

ربي وانا ارجيه ماارجي واحد غيرة
...............هو الذي في يده تحسين الاوضاعي

يالعبد لو طرت مالك عن مقاديرة
...............الليا نوى شي ماله عنه مناعي

لو تشلق الثوب من ذيله لازاريرة
...............والا تقطع من الفرحة تقطاعي

الوقت لابد له ضحكة وتكشيرة
...............متعرض للتقلب والتزعزاعي

اسري مع الليل من ديرة الى ديرة
................والليا اصبح الصبح ضعت وضاع مرماعي

ألعب بشعر النبط وأوزن معاييرة
................وزن الذهب بين متسوق وبياعي

والصعب ماهو عليه صعب تصخيرة
.................الليا بغيته يطيع يصير مطواعي

واليوم كثروا على الساحه مغاويرة
.................كلٍ ركب له جواد وجاك فزاعي

مافيه عدٍ يعرفون العرب بيره
..................الا بجنبه ثمانين الف نباعي

((وكل لحاله تصفق له جماهيرة
.................ياكثر صفق الكفوف وطق الاصباعي ))

لو يابس السدر ماعاشت عصافيرة
................تصرعت قبل مايابس تصراعي

كلٍ يقيَم وقدرة مثل تقديرة
................الحج لله واجر الحج للساعي

وكل يحاسب على مبلغ فواتيرة
................والخام بالياردة والكيل بالصاعي

لو البضايع تباع بدون تسعيرة
................مايمرح الفقر في مخباة طماعي





عبد الله زويبن

ياالله ياربـي عليـك التساميـح
...............لولاك عرجات السنيـن عرجتبـي
منك أستمد العون رهبه وتسبيح
..............والعفو كان جروح وقتي صطتبـي
الحظ كوره والنوادي ضحاضيـح
................سددتهـا بالعارضـه واحدرتبـي
شوطين أضافيه وركلات ترجيح
................وآخـر نهايـه مابعـد سجلتبـي
أقول لحظه للجماهيـر وتصيـح
..............خسرتها كاس الفرح واخسرتبـي
لو طاحت انفوس الرياجيل ماطيح
...............عليـت نفسـي للعـلا واعتلتبـي
صم الجبال اللي حجرها صلافيح
..............لو جيت أهـز حيودهـا مادرتبـي
لكن لي مبـدا معـزه وتصفيـح
..............أبـوي سمانيبـهـا واستمتـبـي
اذخر بواعيس الرجال الطحاطيح
..............وأبقى على هقواتها اللي هقتبـي
اقدر ظروف الوجيـه المفاليـح
...............اللـي ليامـن جيتهـا رحبتـبـي
قولت هلا واقلط على هبت الريح
...............ثروة غنى فيها أغتني واغتنتبـي
ماهو كلام ملاعبيـن المسابيـح
...............اللي نموذج كتبهـم غيـر كتبـي
ملقحين منمـق الهـرج تلقيـح
...............ياما حكت عنـدي ويامـا حكتبـي
تصوم وتصلي قيـام وتراويـح
...............لكنهـا بالـشـذب ماقصرتـبـي
عيال رعيان الحلال السواريـح
.............لو حصلت ضحكن علي ضحكتبـي
لولا العصا كان الكلاب النوابيـح
.............عن مشرب العد العذي صدرتبـي
والصبر زين وللمغانـم مفاتيـح
...........واكحل عيونن بالحسـد تلتفتبـي

سلطان الهاجري

احذر تجامـل واحـدٍ مايجاملـك
.................لو أقـرب الجـدان جـدك لجـده
.عامل عبـاد الله مثـل ماتعاملـك
................من شان كلن توقفـه عنـد حـده
واللي بهرجه وده انـه يزعلـك
................اسمع كلامه وازعلـه مـن مـرده
وان كان رايك مايعالج مشاكلـك
..............كلن تصـرف بـك علـى مايـوده
وان كان طيبك مايغطي خواملـك
..............مالك سوا تصبر على كـل ضـده
ترى العفو ماهو من الناس شاملك
...............ومن طال صبره بيح الوقت سـده
وأكال غيرك لاتجي معـه ياكلـك
..............لو يعترض بالـدرب قدمـك تعـده
ومن أفطربنصك تعشـى بكاملـك
..............لكـن تريـق فـيـه وإلا تـغـده
ومن لا رجا نفعك ولا خاف باطلك
..............عن الخطا في واجبـك وش يـرده
ورفيقك اللي بالشدايـد يلازمـك
..............لاصار باللازم علـى النفـس بـده

سعود جمعان

الوقت يامقسى عنـاه وعذابـه
.................حطاب ليـل ولـه معاويـن وفـزوع
أحد ٍ منه يمكن يعالـج صوابـه
..................وأحد ٍ يموت بعلتـه مـوت جربـوع
يروح مثل مقاط مااحـدٍ درابـه
.................لاحبل يرقابـه ولا صـوت مسمـوع
بغا يجيب رشاه ورشـاه جابـه
...............من عالي الشفه ضرب به على القوع
هذا مقاط اللي رشـاه التوابـه
...............وأصبح مثل للناس في كل موضـوع
قصت مقاط وقصتـي ماتشابـه
.................أسباب وقت وكل قصـه لهـا نـوع
مقاط صفى في زمانـه حسابـه
...............وأنا بلشت بوقـت طامـع ومطمـوع
ناسٍ يحسبون المراجـل نهابـه
...............وهيـه عليهـم كنهـا حبـة الكـوع
ودك بعضهم تربطه في رسابـه
..............تصبح وتمسي فوق راسه بكرسـوع
كم واحدٍ وقت اللـزوم تهقابـه
.................وأليا نصيته غيـر الطبـع بطبـوع
الصاحب اللي صحبته ضحك نابه
.................يبيني أبقى له على الـدوم مـزروع
لا شاف وجهي قال يامرحبابـه
..............وإن غبت ينساني على راس الأسبوع
واليا نسيني منه حضرة جنابـه
................أنساه واجعل دونـه الخـط مقطـوع
وعيبٍ عليه كان طقيـت بابـه
................لو إني أمسي بالخـلا ميـتٍ جـوع
من خلقت الدنيا تجوع الذيابـه
.............بس المهم تعيش والـراس مرفـوع
وتكسب بعز النفس قدر ومهابه
...........وتمشي على خط ٍ سليم ٍ ومشـروع

رشيد الزلامي

قـال الـذي نفسـه بعقلـه حكمهـا
عن كلمة (ن) مضمونها يجـرح شعـور
مـا ذم نـاس ولا تخطـرا شيمهـا
وليا خصـم يفلـج علـى شاهـد الـزور
وناس(ن) تكا في شرها مـا شتمهـا
يرعى الحقوق ولا كشف ستـر مستـور
والقافيـه لا لاوحـت مـا غشمهـا
ماهـو علـى البهتـان والظلـم مجبـور
لو هو ليا مـس الحبـال وحزمهـا
يبـل بهـا محـدود الأفكـار ويـخـور
ما هو عمـى عينـه تقـدي قدمهـا
جـرب ومـن كثـر التجاريـب دكتـور
والطيبـه لاوافقـت مــا لطمـهـا
يفتح لهـا المصـراع والبـال مسـرور
مـا غرتـه دنيـا النهايـة عدمهـا
مصيـر اهلهـا تحـت الألحـاد بقبـور
الدايـم اللـي بيـن خلقـه قسمـهـا
اللي دعاء موسى علـى جانـب الطـور
مـرارة الدنيـا تخـرب طعمـهـا
ابا انصـح الجاهـل بهـا يقبـل الشـور
قـدام تـردم فـوق راسـه اردمهـا
في ماقف(ن) عن شوف الاحباب مهجـور
من لاعرف مقـدار نفسـه ظلمهـا
بالكـذب والبهتـان مغـراء وممـهـور
اما شـرع بالنـاس ياكـل لحمهـا
والا ورى دنيـا الفنـى تقـل مسـعـور
يخطي على نفسـه ويتبـع وهمهـا
والنفس ماتحمـل وزن ريـش عصفـور
وش حيلها كان ان مـا الله رحمهـا
في ساعة(ن) فيهـا معـذب ومـا جـور
في ما قف(ن) شمسه شديد (ن) وحمها
تشخص بـه الأبصـار والكبـر مكبـور
مـا ينفـع النفـس الذميمـه ندمهـا
خص النفوس اللي بهـا كبـر وغـرور
كـل جـزاه بصفحتـه لاستلمـهـا
يبـي يشـوف اللـي بالاحكـام مذكـور
تفقد بـه النفـس الرهينـه كرمهـا
لـو كـان بالدنيـا لهـا ذنـب مغفـور
حسيبهـا الخـلاق مجـري نسمهـا
اللي علـى ظلـم الجهـل سلـط النـور
ومن صان نفسه با حترام وعصمهـا
يخشى الكريـم ويجتنـب كـل محـذور
ويسايـر العالـم ويقـرق قيمـهـا
النفـس مثـل النفـس مـا تقـل الجـور
واللي عرف للنفـس قـدر وحشمهـا
يجعل لها من حسـن الاخـلاق ميسـور
واللي من اخـلاق المكـارم حرمهـا
يعـيـش بالدنـيـا معـقـد ومقـهـور
اخـص نـاس(ن) ماتبـري ذممهـا
حديثهـم بالنـاس غيـبـات وفـجـور
اللـي بنفسـه شـك هـو متهمهـا
واللـي يحقـر النـاس بالعيـن محقـور
مـن دق بحقـوق العبـاد وهظمهـا
اقرب حراه اردى العرب بـاع وشبـور
ان حب يبـدي حجتـه وان كتمهـا
قيـده ثـلاث اقفـال والحبـل مقصـور
وان العقـول التايهـه مـا عزمهـا
وان سيرت تقلـط علـى غيـر مخسـور
تقلط على اللي سمهـا فـي دسمهـا
للقـلـب جنبـيـه وللكـبـد دافـــور
هـذا دواء القلـوب .... وشممـهـا
وباقي الدواء لأمراض الاعصاب مصرور
ودرعـي ليامـس الذريبـه دمقهـا
يوم البراء مكشـوف والـدرع لـه دور
لاعشرت عـوب النفـوس نخزمهـا
ايـام وضـع النـاس ظافـر ومظفـور
نوفـي ونافـي للرجـال بلزمـهـا
يوم العرب مـن بينهـم خـوف ونـذور
على النقاء دهـم الجمـوع نهزمهـا
يـوم السبايـا عجهـا يركـب الـقـور

بدر الحويفي المحمدي الحربي

رفيقـك اللـي مـا يقـدر مواقفـك"
"ترى ربيـع القلـب بعـده وفرقـاه
ليا صار لا رجلن مقامـه يشرفـك"
"ولا طيبـن تقـدر تحمـل خطايـاه
أحرص على فرقاه لو من طوايفـك"
"ليا صار ما تقوى على شيل عوجـاه
ليا صار دايـم بالمواقـف يخالفـك"
"ويفرض عليك الراي من غير ترضاه
منت أولـد لـه يستهينـك ويعسفـك"
"ولا والدن ودك على مكسب رضـاه
ولو لا لزومه بـول العـام عايفـك"
"ولو شاف طيبك عقب يومين ينسـاه
وان قلت له مخطي فضحك ابمعارفك"
"وليا تجاوزت الخطى عنـه مرضـاه
وليا سكت وشمت يجـرح عواطفـك"
"ضحوك في وجهك وسـودن خفايـاه
وان قمت ما يسوى هبايب عواصفك"
"وان شلت له عرقا على الكبد عرقـاه
وان جيت له محتاج ما تقل يعرفـك"
"ويعطيك مع بيض المعاذيـر علبـاه
ليا صار عند اللازمة مـا يساعفـك"
"وقت الرخا منتـه بعـازت حمايـاه
لا تشتكـي عنـده يكبـر سوالفـك"
"فرقاه تغني عـن مسـرات جـدواه
وحاذور عنـه لا يسـود صحايفـك"
"ولا تقربه مـا دام تعـرف نوايـاه
وبعدك عنه في ديرتن مـا يشاوفـك"
"أخير مـن قربـه وشوفـه ولامـاه
وموتك بعـزك جنتـن مـا تكلفـك"
"ولا حاجتن عنـد المنـون وترجـاه
وموت الكرامة عن جنابـه تشرفـك"
"ولا منتـه عسـى نواعيـه تنـعـاه
ومن يجهلك في منطق العرف ياصفك"
"وعرف الفتى تنبيـك عنـه مزايـاه
وترى الرفيق اللي يهمـك يناصفـك"
"ويفزع ليا شاف الخلل فيـك يرفـاه
ودايم صـدوق وبالحمـوه يلاطفـك"
"ويقوم في واجبك مـن قبـل تنخـاه
رجل على كـل المواجيـب عارفـك"
"ودايم طواريق الشرف ساس ممشـاه
وان حلت الرفقـة يشيـد بوصايفـك"
"مـا كنـك إلا واحـد مـن دنايـاه
ليا جاء مجالك جاب عنك طرايفـك"
"وليا ذكـرك بجملـة الخيـر مبـداه

جزاء بن صالح الحربي

سمعت لي كلمة ٍ مدري وش أقصاهـا
حزت بصدري وأنا مانـي بهارجهـا
لو كـل كلمـه ليـا جتنـا طردناهـا
بعنا الثمينـه بسعـر ٍ مـا يخارجهـا
لو مرت السمـع مـا كنـا سمعناهـا
وانقفّل الـراس عنهـا لا يبرمجهـا
ومـن يـم هـذا لهـذا مـا نقلناهـا
والناس واجد وتلقـى مـن يروجهـا
من جابها بيـن خلـق الله ووداهـا
لو به مراجل ترى نفسـه يسمّجهـا
من عامل الناس فـي سابـق خطايـا
يقعد بـدار ٍ خـلا مـا داج دايجهـا
في كنّة ٍ تشوي الجربـوع رمضاهـا
تابس غصون الشجر من حر واهجها
والناس بالحق حكم الشيخ ما ارضاها
ما ترضي الناس لـو انـك تحججهـا
ياللي تبي الطيبـه خذهـا وعطناهـا
وخـل الطريفـه طريـه لا تثلّجهـا
واقضب طريق الأوادم وامش ممشاها
واتبع دروب العرب وادرج مدارجهـا
وارسـم لنفسـك حـدود ٍ لا تعداهـا
من حط نفسه بدرب الضيق يحرجهـا
وان كان نفسك هواهـا قـام ينحاهـا
حط الأعنه بروس الخيـل وأسرجهـا
وفكّـر بمنكافهـا قــدام مغـزاهـا
واضرب حساباتها وتشـوف ناتجهـا
وكل ٍ بعضده يمـوح الدلـو برشاهـا
وتلقى كبود الضوامي مـن يبرهجهـا
وان كان توك على صـدرك تهجّاهـا
حنـا ترانـا نـدرّس فـي مناهجهـا
من يـم مصباحهـا نبعـد معشاهـا
اليـا قعـد راعـي الضلـع يدرجهـا
لو هي صعيبه اليا انعاجـت عدلناهـا
واللي تجي مستقيمـه مـا نعروجهـا
نهتم فـي وزنهـا وإبـرام معناهـا
ومـن الكرستـال واللولـو نتوّجهـا
مثل الجواهـر ليـا منـا نضمناهـا
وسلوكها من جديد الـزري ننسجهـا
مخايـل ٍ ترتـدم والصـدر منشاهـا
ان دك بالبـال داكــوك ٍ يهيّجـهـا
واليا امطرت ضاقت الوديان في ماها
تاخذ اليا الحول ما يبسـت مدالجهـا
ان صدت الناس عنا ما اعترضناهـا
ما تقفـي النـاس عنـا ونتولّجهـا
وان جاتنا الطيبـه بالطيـب زدناهـا
الطيبـه بالعسـل والسمـن نمزجهـا
وان جاتنا الثانيـه نصبـر ونرفاهـا
يمكـن ليـا فـاق راعيهـا يعالجهـا
وان عادها عودة س ما عاد ينساهـا
من حربة س في صميم الصدر نولجها
مسمومـةٍ يبلـش الدكتـور بدواهـا
ما يقنع الخبـل ليـن إنـه يلامجهـا

عبد الله زويبن

شكرآ لك يالغلا على انتقآءك للقصآئد المميزه
ويعطيك العآفيه

موضوع جميل وانتقاء رائع
مسموح بالمشاركة ؟

اقتباس: المشاركة الأصلية كتبت بواسطة الراقيه    شكرآ لك يالغلا على انتقآءك للقصآئد المميزه ويعطيك العآفيه

تسلمين غلاي على روعة حضورك

وبأنتظار مشاركاتك هنا

تقديري لكِ